មណ្ឌលគិរី៖ រដ្ឋមន្ត្រីក្រសួងបរិស្ថាន ឯកឧត្ដម សាយ សំអាល់ បានបញ្ជាឱ្យប្រធានមន្ទីរបរិស្ថានខេត្តមណ្ឌលគិរី ដែលទើប ឡើងកាន់តំណែងថ្មី ត្រូវអនុវត្តឱ្យបានលើការងារការពារបរិស្ថាន ធនធានធម្មជាតិ និងទប់ស្កាត់បទល្មើសឲ្យខាងតែបាន ព្រោះនេះជាតម្រូវការចាំបាច់របស់ពលរដ្ឋចង់បាន ។ឯកឧត្ដមរដ្ឋមន្ត្រីក្រសួងបរិស្ថានលើកឡើងយ៉ាងដូច្នេះក្នុងពីធីប្រកាស ផ្ទេរភារកិច្ច និងតែងតាំងមុខតំណែងថ្មី ប្រធានមន្ទីរបរិស្ថានខេត្តមណ្ឌលគិរី ដោយលោក កែវ សុភក៌ អតីតជាមន្ត្រីបម្រើ ការងារនៅនាយកដ្ឋានអភិរក្សធម្មជាតិដីគោកខាងកើតទន្លេមេគង្គ នៃនាយកដ្ឋានរដ្ឋបាលការពារនិងអភិរក្សធម្មជាតិ ត្រូវកាន់តំណែងថ្មីជាប្រធានមន្ទីរបរិស្ថានខេត្តមណ្ឌលគិរី ជំនួសលោក ឈិត សុផល ត្រូវផ្ទេរភារកិច្ចទៅបម្រើការងារនៅ ក្រសួងបរិស្ថាន កាលពីថ្ងៃទី០៦ ធ្នូ ២០១៦ នៅសាលាខេត្តមណ្ឌលគិរី ។
ឯកឧត្ដម សាយ សំអាល់ បានថ្លែងទៀតថា ពាក់ព័ន្ធនិងការងារសម្អាតសម្រាមនៅក្នុងទីក្រុង ឯកឧត្ដមពិនិត្យឃើ ញថា គ្រប់ក្រុងទាំងអស់នៅក្នុងប្រទេសកម្ពុជា គឺគេសុទ្ធតែអាចអនុវត្តលើការងារនេះបានល្អប្រសើរក្រោមកញ្ចប់ថវិកាជាតិ បានផ្តល់ឱ្យ ដោយឡែកហេតុអ្វីសម្រាប់ក្រុងសែនមនោរម្យ-ខេត្តមណ្ឌលគិរី មិនអាចសម្អាតក្រុងឱ្យមានសោភ័ណ្ឌភាពល្អ បាន ដូច្នេះឯកសូមស្នើទៅលោកប្រធានមន្ទីរបរិស្ថានថ្មី ត្រូវអនុវត្តលើការងារនេះឲ្យខាងតែបាន ។
ឯកឧត្ដមរដ្ឋមន្ត្រីក្រសួង បរិស្ថានបន្តថា ជុំវិញបញ្ហាកាប់បំផ្លាញព្រៃឈើឯកឧត្ដមក៏សូមឱ្យប្រធានមន្ទីរថ្មីត្រូវអភិរក្សឱ្យបានដូចគ្នាដែរ ដោយតម្រូវឱ្យ មន្ត្រីជំនាញ ត្រូវចុះទៅពន្យល់ពលរដ្ឋនៅតាមសហគមន៍ឱ្យចេះកែច្នៃគំនិត ទៅប្រកបរបរផ្សេងក្រៅពីការកាប់ឈើ និងច្នៃ គំនិតពួកគាត់ឱ្យចេះអាស្រ័យផលពីធនធានធម្មជាតិ មិនមែនការកាប់បំផ្លាញព្រៃឈើយកទៅលក់ឱ្យឈ្មួញដូចមុនទៀត នោះទេ ។
រដ្ឋមន្ត្រីក្រសួងបរិស្ថាន ឯកឧត្ដម សាយ សំអាល់ បានសង្កត់ធ្ងន់ថា ជាមួយការកាប់បំផ្លាញព្រៃឈើនៅខេត្តមណ្ឌ លគិរីកាលពីពេលកន្លងមក គឺឯកឧត្ដមដឹងច្បាស់ថា មានមន្ត្រីមួយក្ដាប់តូចបានជាប់ពាក់ព័ន្ធ និងទទួលផលប្រយោជន៍ពី បទល្មើសព្រៃឈើ ដូច្នេះអ្នកដែលដឹងខ្លួនសូមបញ្ឍប់ ហើយប្រសិនបើនៅតែបន្តសកម្មភាពនេះ ទោះបីស័ក្កិប៉ុន្មានក៏រាជរដ្ឋា ភិបាលនិងចាត់វិធានការទាំងអស់ ។
ឯកឧត្ដមបញ្ជាក់ថា សម្រាប់ប្រទេសកម្ពុជាក៏នឹងលែងមានការកាប់បំផ្លាញព្រៃឈើ ដូចមុនទៀតនោះដែរ ហើយរាជរដ្ឋាភិបាលក៏មិនបានផ្ដល់ដីសម្បទានទៅឱក្រុមហ៊ុនឯកជនវិនិយោគទៀតនោះទេ ។
មានប្រសាសន៍ក្នុងឱកាសនោះដែរ លោក កែវ សុភក៌ ប្រធានមន្ទីរបរិស្ថានដែលឡើងកាន់តំណែងថ្មី បានប្ដេជ្ញាថា និងខិតខំអនុវត្តការងារឱ្យបានល្អប្រសើរ ពង្រឹងការងារផ្ទៃក្នុងអង្គភាពឱ្យដំណើរការទៅរលូន ការពារបរិស្ថាន ធនធានធម្ម និងបង្ក្រាបបទល្មើសព្រៃឈើមិនឱ្យកើតមានដាច់ខាត ៕
