ពោធិសាត់៖ លោកអៀ អៀម ប្រធានថ្មីនៃពន្ធនាគារខេត្តពោធិសាត់ បាននិងកំពុងយកយកពន្ធនាគារថ្វើអាជីវកម្មដោយមិនខ្លាច្បាប់ប្រឆាំងអំពោះពុករលួយឡើយ។ ប្រភពពីមន្ត្រីនៅក្រោម ឱវាទលោកអៀ អៀម បានបង្ហើបឲ្យដឹងថា៖ មេរបស់ពួកគេបានប្រព្រឹត្តអំពើមិនប្រក្រតីក្នុងការងារគ្រប់គ្រងក្នុងតួនាទីជាប្រធាន ដូចជាការ កិបកេងប្រាក់របបអាហារ
ហូបចុករបស់អ្នកទោស យកប្រាក់ពីការជួបគ្រួសាររបស់អ្នកទោស យកប្រាក់ពីការធ្វើសិប្បកម្មធ្វើតុ ទូ និងគ្រឿងចម្លាក់ រួមនិងការប្រមូលប្រាក់ពីការទូរស័ព្ទរបស់អ្នកទោស និងការ បង្កើតតុងទីន ក្នុងពន្ធនាគារប្រមូលចំណូលតែម្នាក់ឯង ។តាមប្រភពបានឲ្យដឹងថា ក្នុងរយៈពេលប៉ុន្មានខែមកនេះ អង្គភាពពន្ធនាគារដែលបានកើតមានឡើង នូវរឿងអាស្រូវដ៏ធ្ងន់ធ្ងរ ដែលបង្កឡើងដោយលោកប្រធាន អៀ អៀម និងលោកប្រធានការិយាល័យ មធ្យោបាយ អ៊ុន សុខេមរៈ និងមន្ត្រីមួយចំនួនតូចទៀត ។
ក្នុងនោះទី១ គឺកិបកេងប្រាក់ចំណាយ លើរបបអាហារអ្នកទោសជាង៣៦០នាក់ ដែលមួយថ្ងៃត្រូវចំណាយប្រាក់ជាងមួយលានរៀល សរុបមួយខែត្រូវចំណាយប្រាក់ជាង៣០លានរៀល។ ប៉ុន្តែការចំណាយជាក់ស្តែងក្នុងមួយខែ គឺការចំណាយទៅលើ ការទិញម្ហូបដែលប្រធានពន្ធនាគារបានផ្តល់ជូនលោកសូ សារី ឲ្យទៅទិញម្ហូបសំរាប់យកមកចំអិនធ្វើ អាហារឲ្យអ្នកទោស ក្នុងមួយខែមានទឹកប្រាក់តែជា៤លានរៀល បូករួមនិងការចំណាយទិញអង្ករនិង អុស សំរាប់ដាំបាយឲ្យអ្នកទោស ក្នុងមួយខែ ត្រូវគេបានដឹងថា ចំណាយអស់ទឹកប្រាក់មិនលើសអស់ ៧លានរៀលនោះទេ។ ដូច្នេះសរុបការចំណាយលើរបបហូបចុករបស់អ្នកទោស ក្នុងមួយខែត្រឹមតែ១២លានរៀល ដោយ២០លានរៀលទៀត ត្រូវបានលោកប្រធានពន្ធនាគារនិងប្រធានការិយាល័យមធ្យោបាយ លេបត្របាក់ទាំងស្រុង? ។
ទី២ ការជួបគ្រួសាររបស់អ្នកទោស ក្នុងការជួបមួយលើកគឺត្រូវបង់តម្លៃចំនួន ៥០០០រៀល ដោយមានឈ្មោះ ភី ភក្តី ជានាយផ្នែកនិងឈ្មោះ ហេង ណារិន ជានាយរងផ្នែក ជាអ្នកលក់សំបុត្រ ឲ្យក្រុមគ្រួសារអ្នកទោស ហើយក្នុងករណីជួបក្នុងលក្ខណៈពិសេសគឺត្រូវបង់ពី៤ម៉ឺនទៅ១០ម៉ឺនរៀល តាមសាច់ឈាមអ្នកស្នើសុំជួប ។ ចំពោះចំណូលដែលបានពីការជួបគ្រួសាររបស់អ្នកទោស ក្នុងមួយខែៗ មានទឹកប្រាក់ពី៦ទៅ៧លានរៀល ប៉ុន្តែការយកប្រាក់ពីការជួបគ្រួសារអ្នកទោស គឺជាការរំលោភលើសេចក្តីណែនាំរបស់អគ្គនាយកដ្ឋានពន្ធនាគារ ក៏ដូចជាក្រសួងមហាផ្ទៃ ដែលបានហាមមិន ឲ្យយកប្រាក់ពីការជួបគ្រួសាររបស់អ្នកទោស ។ ទី៣ ប្រធានពន្ធនាគារបានយកប្រាក់ពីអ្នកទោស ដែលបានធ្វើសិប្បកម្មតុ ទូ និងគ្រឿងចម្លាក់ ដែលពួកគេឲ្យបងប្អូនទិញយកចូលក្នុងពន្ធនាគារ សំរាប់កែច្នៃនិងយកទៅលក់នៅទីផ្សារខាងក្រៅវិញ ដោយយកតម្លៃពី៥ម៉ឺនរៀលទៅដល់រាប់សិបម៉ឺនរៀល តាម ប្រភេទគ្រឿងសង្ហារឹមធំឬតូច ដោយលោកប្រធានអះអាងថា យកថ្លៃភ្លើងនិងសេវាកម្មពន្ធនាគាររបស់ គាត់ ខណៈដែលការបង់ភ្លើងទាំងស្រុង ជាបន្ទុករបស់រដ្ឋ ថវិកាដែលគាត់ប្រមូលបានពីសិប្បកម្មក្នុង មួយខែៗ ខ្ទង់១០លានរៀល ដែលគាត់មិនបានចំណាយដើមទុនមួយសេន ។
ទី៤ លោកប្រធាន ពន្ធនាគារ បានយកអ្នកទោសចំនួន៥រូប ប្រុស៣ស្រី២ ដែលជាប្រភេទអ្នកទោសគ្រឿងញៀននិងប្លន់ ដែលមានទោសសុទ្ធតែជាង១០ឆ្នាំ ឲ្យមកលក់ដូរនៅក្នុងតុងទីន របស់ពន្ធនាគារនិងលក់ម្ហូបអាហារ កាហ្វេ ដែលតម្លៃខ្ពស់ជាងទីផ្សារខាងក្រៅទ្វេគុណនិងផ្តល់ទូរស័ព្ទ ឲ្យពួកគេកាន់យ៉ាងសេរី ។ ទី៥ គឺប្រធានបានផ្តល់ឲ្យអនុប្រធានការិយាល័យមធ្យោបាយ ជោ វណ្ណា គ្រប់គ្រងចំណូលពីការផ្តល់ទូរស័ព្ទ ឲ្យអ្នកទោសនិយាយ តេទៅកាន់គ្រួសារក្នុងមួយនាទី ១ពាន់រៀល បើគ្រួសារតេទៅ ជួប អ្នកទោសគឺ តម្លៃ ៥រយរៀល ដែលសរុបមួយថ្ងៃ ទទួលចំណូលបានពី៧ទៅ៨ម៉ឺនរៀល ។
ទី៦ លោកប្រធានបាន យកប្រាក់ពីអ្នកទោសដែលសុំប្តូរបន្ទប់ស្នាក់នៅ ពីអគារផ្សេងៗទៅអគារ C ជាន់លើ ក្នុងម្នាក់យ៉ាងតិច ១០០ដុល្លារឡើង ដោយប្រាក់នេះលោកប្រធានយកតែម្នាក់ឯង ។ ករណីមិនប្រក្រតីនៃចមណាត់ការរបស់លោកអឿអៀមនេះអនុប្រធានទាំង៣រូប ដូចលោកស៊ុន សៅ លោកកែវ អ៊ឹត លោក អ៊ុន គឹមហ៊ាន គឺមិនបានហ៊ានប្រកែកតវ៉ាជាមួយនិងលោកប្រធានទេ។សូម្បីតែនៅពេលថ្មីៗនេះ លោកប្រធានបានធ្វើសំណើសុំតែងតាំងលោក អ៊ុន សុខេមរៈ ដែលជាប្រធានការិយាល័យមធ្យោបាយទៅជាអនុប្រធានពន្ធនាគារ ក៏អនុប្រធានទាំង៣នេះមិនហ៊ានជំទាស់ ផង ទោះបីដឹងថា មន្ត្រីនៅក្នុងអង្គភាពស្ទើរទាំងមូលមិនគាំទ្រការតែងតាំងនេះក្តី ។
ទោះជាយ៉ាងណាមានសេចក្តីរាយការណ៍ថា៖ចំណូលដែលបានមកពីគ្រប់វិស័យដូចបានរៀបរាប់ខាងលើនេះ ក្នុងមួយខែៗ គឺលោកប្រធានបានផ្តល់ឲ្យ អនុប្រធានពន្ធនាគារចំនួន៣នាក់ ដោយម្នាក់ៗ ៤០ម៉ឺនរៀល ប្រធានការិយាល័យចំនួន៣នាក់ ម្នាក់ចំនួន១០ម៉ឺនរៀល អនុប្រធានការិយាល័យចំនួន៣នាក់ ម្នាក់ចំនួន៥ម៉ឺនរៀល ប្រធានផ្នែកចំនួន៩នាក់ ម្នាក់ៗ២ម៉ឺនរៀល សរុបអស់តែ១៨៣ម៉ឺនរៀល ដោយប្រាក់ក្រៅពីនោះ គឺបានជាប្រយោជន៍ផ្ទាល់ខ្លួនរបស់លោកប្រធាននិងប្រធានការិយាល័យមធ្យោបាយ ។
ទាក់ទងព័ត៌មាននេះ លោក សន កែវ អ្នកនាំពាក្យអគ្គនាយកដ្ឋានពន្ធនាគារបានអះអាងថា លោកមិនទាន់បានទទួលដំណឹងនេះទេ ប៉ុន្តែបើមានករណីនេះ វាជាការខុសច្បាប់យ៉ាងធ្ងន់ធ្ងរ ៕
