រាជធានីភ្នំពេញ ៖ បុរសវ័យចំណាស់ម្នាក់បើករថយន្ត LEXUSRX300 ស្រវឹងស្រាជោគ បានជ្រុលទៅបុករបាំងថ្មចែកផ្លូវវៀច១កង់រថយន្តខ្ទេចខាងមុខ ទៅលែងរួច ។ ហេតុការណ៍គ្រោះថ្នាក់ចរាចរណ៍នេះ កើតឡើងនៅវេលាម៉ោង១២.៣០នាទី រំលងអធ្រាតឈានចូលថ្ងៃទី៣០ ខែវិច្ឆិកា ឆ្នាំ២០១៦ ស្ថិតនៅចំណុចមុខបណ្ណាគារសន្តិភាពក្នុងសង្កាត់បឹងព្រលឹតខណ្ឌ៧មករា។
យោងតាមព័ត៌មានពីកន្លែងកើតបានអោយដឹងថា មុនពេលកើតហេតុ គេឃើញបុរសវ័យចំណាស់ម្នាក់បើករថយន្តLEXUS.RX300 ពណ៌ស្កពាក់ស្លាកលេខភ្នំពេញ.2.W.1422 បើកតាមបណ្ដោយផ្លូវមុនីវង្ស ទិសដៅពីជើងទៅត្បូងដោយល្បឿនលឿន និងក្នុងស្ថានភាពស្រវឹងស្រាជោគជាំ ខណៈមកដល់ចំណុចកើតហេតុខាងលើ បានរេចង្កូតទៅបុករបាំងថ្មចែកផ្លូវវៀច១កង់រថយន្តបែកពោង ទាំងខ្ទេចរថយន្តមួយកំណាត់មុខ កល់ជាប់នឹងរបាំងថ្ម ទៅលែង រួចតែសំណាងល្អមិនបង្កអោយអ្នកណាម្នាក់រងរបួសនោះទេ។
ម្ចាស់រថយន្តបានបើកទ្វារថយន្តចុះមកទាំងទ្រេតទ្រោតនិយាយខុសត្រូវៗ ក្រោយកើតហេតុ សមត្ថកិច្ចមូលដ្ឋានចុះមកកន្លែងកើតហេតុភ្លាមៗ បានទាក់ទងហៅមន្ត្រីជំនាញមកធ្វើការវាស់វែងយករថយន្តបង្កព្រមទាំងម្ចាស់រថយន្តទៅកាន់ការិយាល័យចរាចរណ៍ផ្លូវគោកនៃស្នងការរាជធានីភ្នំពេញ ដើម្បីធ្វើការដោះស្រាយទៅតាមផ្លូវច្បាប់៕
