ក្រចេះ ៖ កម្លាំង កងរាជអាវុធហត្ថលើផ្ទៃប្រទេស សហការជាមួយអាវុធហត្ថស្រុកស្នួល បាននាំគ្នាធ្វើការឡោមព័ទ្ធបន្ទាយទាហានអនុសេនាធំលេខ៣នៃវរះការពារព្រំដែនលេខ២០៤តំបន់ប្រតិបត្តិការសឹករងខេត្តក្រចេះស្ថិតក្នុងនៅតំបន់កាបី បន្ទាប់ពីក្រុមទាហានខាងលើនាំគ្នា ទៅរំដោះយករថយន្តដឹកឈើមួយគ្រឿង ពីកម្លាំងកងរាជអាវុធហត្ថលើផ្ទៃប្រទេសក្រោយស្ទាក់ចាប់បាននៅលើដងផ្លូវ៧៦ស្ថិតក្នុងភូមិក្រញូងសែនជ័យឃុំ២ធ្នូស្រុកស្នួលខេត្តក្រចេៈកាលពីថ្ងៃទី២៨ខែវិច្ឆិកាឆ្នាំ២០១៦។
សេចក្ដីរាយការណ៏បានអោយដឹងថា នៅថ្ងៃទី២៨ ខែវិច្ឆិកា ឆ្នាំ២០១៦ នេះ កម្លាំងអ.ហលើផ្ទៃប្រទេស ដែលចុះទៅឈរជើងនៅតាមផ្លូវជាតិលេខ៧៦ ចំណុចកាបី ក្នុងស្រុកស្នួល ខេត្តក្រចេះ ស្ទាក់ចាប់ បានរថយន្តប្រភេទឡង់គ្រីស័រមួយគ្រឿង ផ្ទុកឈើកកោះពេញ បើកក្នុងទិសដៅពីស្រុកកែវសីម៉ា ខេត្តមណ្ឌលគិរី ឆ្ពោះមកចំណុចកាបី ដើម្បីនាំចេញទៅប្រទេសវៀតណាម តាមច្រករបៀងត្រពាំងគ្រញូង ។
បន្ទាប់មកកម្លាំងកងរាជអាវុធហត្ថផ្ទៃប្រទេស នាំយកឡានដឹកឈើខុសច្បាប់ទៅកាន់កន្លែងរបស់លោកក្រោយមកក៏មានកម្លាំងទាហានមួយក្រុម ដែលគេស្គាល់ថាជាទាហាននៅអង្គភាពវរៈការពារព្រំដែន ដែលមានទីបញ្ជាការនៅភូមិគ្រញូង សែនជ័យឃុំ២ធ្នូ ស្រុកស្នួលប្រដាប់ដោយអាវុធ នាំគ្នាទៅរំដោះយករថយន្តដឹកឈើពីមន្ត្រីអ.ហ ហើយបើកយកទៅទុក នៅក្នុងបន្ទាយបាត់ទៅ។
ចំណែកកម្លាំងអ.ហ ក៏ហៅកម្លាំងមកថែមរួចហើយធ្វើការឡោមព័ទ្ធបន្ទាយ ទាហានខាងលើ តាំងពីព្រឹករហូតដល់ល្ងាចថ្ងៃទី២៨ ខែវិច្ឆិកា ឆ្នាំ២០១៦ ទើបមេនៅខាងលើហៅមកធ្វើការចរចាគ្នា។
លោក ស៊ូ សុងប៊ុន ជាអាវុធហត្ថលើផ្ទៃប្រទេសបានប្រាប់កាល២៨ ខែវិច្ឆិកា ឆ្នាំ២០១៦ថា រហូតមកដល់ម៉ោងនេះ លោកនៅមិនទាន់ដឹងថា ករណីខាងលើមានការដោះស្រាយគ្នាយ៉ាងនៅឡើយនោះទេ ព្រោះលោកបានប្រគល់ជូនលោកមេបញ្ជាកាកងរាជអាវុធហត្ថខេត្តក្រចេះ ដើម្បីចាត់ការបន្ត ។ ចំនែកលោក ហួត ប៊ុនគីម មេបញ្ជាការកងអនុសេនាធំលេខ៣ នៃវរៈការពារព្រំដែន២០៤មិនអាចសុំការបំភ្លឺបាន ទេនៅព្រឹកថ្ងៃទី២៩ ខែវិច្ឆិកា ឆ្នាំ២០១៦ នេះ៕
