ខេត្តរតនគិរី៖ កម្លាំងនគរបាលអន្តោប្រវេសន៍ច្រកទ្វារអូរយ៉ាដាវប្រចាំគោលដៅផ្លូវចូលភូមិភិះ ឃុំប៉កញ៉ៃ ស្រុកអូរយ៉ាដាវ បានឃាត់ខ្លួនបុរសជនជាតិវៀតណាម ម្នាក់ពីបទលួចចូលក្នុងទឹកដីកម្ពុជាខុសច្បាប់នៅវេលាម៉ោង១០និង៣០នាទីព្រឹក ថ្ងៃទី២៥ ខែវិច្ឆិកា ឆ្នាំ២០១៦ លោកវរសេនីយ៍ឯកសុខ សំអាន នាយប៉ុស្តិ៍ភូមិភិស្តីទីបានឲ្យដឹងថា បុរសជនជាតិវៀតណាមដែលបានឃាត់ខ្លួនខាងលើមានឈ្មោះ Pham Van Oanh អាយុ៣៨ឆ្នាំ រស់នៅភូមិយាទម ស្រុកដាកគឺ ខេត្តយ៉ាដាឡា ប្រទេសវៀតណាម ។
សមត្ថកិច្ចបានបញ្ជាក់បន្ថែមទៀត ថា នៅវេលាម៉ោង១០និង៣០នាទីព្រឹក ថ្ងៃទី២៥ ខែវិច្ឆិកា ឆ្នាំ២០១៦ កម្លាំងនគបាល អន្តោប្រវេសន៍ ប្រចាំនៅប៉ុស្តិ៍ភូមិភិះបានត្រួតពិនិត្យឃើញជនបរទេសចំនួន១នាក់ ដោយមានការសង្ស័យកម្លាំងប្រចាំការបានធ្វើឃាត់ខ្លួនជននោះបណ្តោះអាសន្ន ដើម្បីសាកសួរនិងឆែកឆេរឃើញថា ជនបរទេសខាងលើពុំមានឯកសារធ្វើដំណើរអ្វីទាំងអស់ ឃើញតែអាវុធខ្លីប្រភេទK59 មួយដើមនៅក្នុងខ្លប់ម៉ូតូ ម៉ាក់Wave ពណ៌កាប់ស្តាំង ពាក់ស្លាកលេខ81PI04532 ដែលជាមធ្យោបាយធ្វើដំណើរ ក្រោយពីត្រួតពិនិត្យឃើញកម្លាំងជំនាញបានធ្វើការឃាត់ខ្លួនរួមនិងមធ្យោបាយ និងអាវុធយកមកទីបញ្ជាការប៉ុស្តិ៍ចាត់ការតាមនីតិវិធី។
នៅថ្ងៃដដែលជនខាងលើរួម និងវត្ថុតាងបានបញ្ជូនមកអធិការដ្ឋាននគរបាលស្រុកអូរយ៉ាដាវ ដើម្បីអនុវត្តនីតិវិធី៕
