ខេត្តក្រចេះ ៖ ប្រធានសហគមន៍លោក សំអឿន បានលើកឡើងថា ចាប់តាំងពីឆ្នាំ 2015 មកទល់ពេលនេះ មានជនជាតិឥស្លាមជាង600គ្រួសារ ហើយគឺជនចំណាកស្រុក បាននាំគ្នាមកកាប់ព្រៃសហគមន៍ និងអង្គការជាដៃគូ អភិរក្សតែការទប់ស្កាត់នោះហាក់ដូចជាគ្មានប្រសិទ្ធិភាពទាល់តែសោះពីសំណាក់អាជ្ញាធរមូលដ្ឋាននិង សមត្ថកិច្ចក្នុងខេត្ត ។ ហេតុនេះលោកក៏បានសំណូមពរដល់ប្រមុខរាជរដ្ឋាភិបាលដែលជាថ្នាក់ដឹកនាំ និងសូមជូនដំណឹងនេះទៅដល់សម្ដេចអគ្គមហាសេនាតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាឱ្យជួយអន្តរាគមនិងចាត់វិធានការក្ដៅទៅលើជនល្មើសទាំងនេះផង។
អ្នកយកព័ត៌មានយើងបានទាក់ទងទៅលោកកែវ បុប្ផាមេឃុំអូគ្រៀង លោកបាននិយាយថា ពិតជាមានការកាប់រុករានទន្ទ្រានដីព្រៃមែនតែអាជ្ញាធរនិងសមត្ថកិច្ចបានទៅចុះបង្ក្រាបដែរ តែមិនឈ្នះនោះទេ ពីព្រោះពួកគេលួចកាប់នៅពេលយប់។
បើតាមការលើកឡើងពីស្ត្រីវ័យចំណាស់សម្តីខែងម្នាក់ ឈ្មោះលី សារ៉ស់ ដែលជាមេខ្លោងដើរគៀងគរពលរដ្ឋមកទិញដីនៅចំណុចភ្នំសេះនោះតែងតែអូតក្អេងក្អាងថាខ្លួនបានរត់ការដល់ថ្នាក់ជាតិអស់ហើយ ដោយអស់ ថ្លៃរត់ការ20ម៉ឺនដុល្លារ ហើយក្រុមរបស់គេបានរើអស់ 3 កន្លែងហើយ ទីមួយស្រុកស្នួល ទីពរីស្រុកសំបរូ និងទីបីចំណុចភ្នំសេះ ។
ជុំវិញរឿងនេះដែរ លោកថាច់ មេត្រី អ្នកសម្របសម្រួលខាងអង្គការរីគោសជាដៃគូរដ្ឋាភិបាលព្រៃឈើបានឱ្យដឹងថា រឿងដែលមានច្បាប់នោះ ពិតក៍ដូចជាមិនពិតដែរ ពីព្រោះមានចុះហត្ថលេខារបស់អាជ្ញាធរចាប់ពីថ្នាក់ឃុំដល់ថ្នាក់ខេត្តមែនតែគ្រាន់តែជាការស្នើសុំទេ ហើយថ្នាក់ជាតិមិនទាន់បានសម្រេចនៅឡើយទេ។ ការចុះហត្ថលេខានេះហាក់បីដូចជាគ្មានភាពប្រក្រតីទេ រវាងអាជ្ញាធរនិងមេខ្លោងឈ្មោះលី សារ៉ស់នោះ។
លោកក៏បានបន្តសហការឱ្យអ្នកព័ត៌មានជួយផ្សព្វផ្សាយនិងអន្តរាគមន៍ដល់ថ្នាក់ជាតិឱ្យបានជ្រាបផងដើម្បីចូលរួមការពារព្រៃទាំងងនេះជាព្រៃសហគមន៍និងព្រៃជំនឿរបស់ជនជាតិភាគតិច និងព្រៃកប់ខ្មោចដូនតារបស់ពួកគេផងដែរ៕
ដោយ ឡាយ ធុល
