ភ្នំពេញ ៖ នៅក្នុងអគ្គនាយកដ្ឋានចំការកៅស៊ូ នៃក្រសួងកសិកម្មចាប់ ផ្តើមបែកធ្លាយជាបណ្តើរៗហើយនៅរឿងអាស្រូវដែល បង្កឡើងដោយសារតែលោកអគ្គនាយកថ្មី។បើតាមមន្ត្រីដែលមិនសប្បាយចិត្តបង្ហើបប្រាប់គឺថាលោកប៉ុល សុផាអគ្គនាយកថ្មីបានបង្កើតបក្សពួកនិងរៀបចំមនុស្ស ជំរិតរបស់ខ្លួន ឲ្យកាន់តំណែងសំខាន់ៗខុសពីគោលការកំណែទម្រង់របស់ រដ្ឋាភិបាលដើម្បីងាយស្រួលក្នុងការប្រព្រឹត្ត អំពើរលួយ ។
តាមប្រភពបានឲ្យដឹងថា តាំងពីរូបគាត់នៅជាប្រធាន នាយកដ្ឋានផែនការហិរញ្ញវត្ថុនិងស្ថិតិ រហូតដល់ គាត់ឡើងជាអគ្គនាយករងនិងក្រោយមកបានឡើងកាន់តំណែងជាប្រតិភូរាជរដ្ឋាភិបាល ទទួលបន្ទុកជា អគ្គនាយកនៃអគ្គនាយកដ្ឋានចំការកៅស៊ូ បន្តពីលោកលី ផល្លា ដែលទៅកាន់តំណែងជារដ្ឋលេខាធិការ ក្រសួងកសិកម្ម លោកប៉ុល សុផា បានបានចាយ ថវិកាជាតិ ដែលសំរាប់ចំណាយក្នុងអគ្គនាយកដ្ឋានចំការកៅស៊ូ ក្នុងមួយឆ្នាំៗ មានទឹកប្រាក់មិនតិចជាង១០០លានរៀលមិនមានតម្លាភាពនោះឡើយ ។
កាល នៅជាអគ្គនាយករង ទទួលបន្ទុកការងារហិរញ្ញវត្ថុនោះ ការចំណាយជាច្រើន បានប្រព្រឹត្តឡើង ដោយភាពមិនប្រក្រតី ដោយសហការយ៉ាងស្និតជាមួយលោកអនុប្រធានក្តាប់រួម នាយកដ្ឋានផែនការហិរញ្ញវត្ថុនិងស្ថិតិ អៀង ស៊ីថា និងលោកប្រធានការិយាល័យគណនេយ្យនិងហិរញ្ញវត្ថុ ទឹម ស៊ីថុន យ៉ាងរលូន ។ ក្រោយពីលោក ប៉ុល សុផា បានឡើងជាអគ្គនាយកមានអំនាចពេញដៃលោកប៉ុល សុផា បាន ធ្វើការផ្លាស់ប្តូរមន្ត្រីសំខាន់ៗ តាមអំពើចិត្តនិងចាត់ទុកអគ្គនាយករងមួយចំនួន រួមនិងមន្ត្រីមានសមត្ថភាពជាច្រើននាក់ ថាជាមនុស្សគ្មានប្រយោជន៍ ។
សូមរំលឹកថា អគ្គនាយកដ្ឋានចំការកៅស៊ូចាប់តាំងពីឆ្នាំ២០០៨ ក្រោយពេលរាជរដ្ឋាភិបាលបានសំរេច ប្រគល់ចំការកៅស៊ូរបស់រដ្ឋឲ្យឯកជនគ្រប់គ្រងនោះ ធ្វើឲ្យអង្គភាពមួយនេះលែងមានប្រាក់កាន់នៅក្នុងដៃ ប៉ុន្តែសំរាប់អគ្គនាយកនិងមន្ត្រីជំនិតអគ្គនាយកមួយចំនួន នៅតែមានឱកាសរកប្រាក់បានយ៉ាងច្រើន អាចទិញវីឡានិងប្តូរឡានបានតាមចិត្ត ខុសពីមន្ត្រីតូចៗ ដែលទង្ទឹងចាំតែប្រាក់ខែ ហើយអ្វីដែលពួកគាត់ ជួបការលំបាក គឺបានធ្វើដំណើរទៅបំពេញការងារមានចម្ងាយឆ្ងាយ ខុសពីមុននៅកន្លែងវត្តភ្នំចំកណ្តាលក្រុងជិតផ្ទះ ។
សំរាប់លោកអគ្គនាយក ប៉ុល សុផា ទោះបីបច្ចុប្បន្នគេមើលពីចម្ងាយឃើញថា ពុំមានឱកាសរកលាភ សក្ការៈបានដោយសារការនាំចេញកៅស៊ូពុំបានឆ្លងការអគ្គនាយកដ្ឋានចំការកៅស៊ូ ប៉ុន្តែក្រុមហ៊ុនចំការកៅស៊ូ ដែលរដ្ឋប្រគល់ឲ្យឯកជននិងក្រុមហ៊ុនដែលទទួលបានដីពីរដ្ឋ សំរាប់ដាំកៅស៊ូគឺនៅស្ថិតក្រោមក្តោបដៃ លោកអគ្គនាយកនៅឡើយ ហើយផលប្រយោជន៍ជាច្រើនក៏បានធ្លាក់ទៅលើលោកអគ្គនាយកដែរ។
បើនិយាយពីរឿងអាស្រូវ លោកអគ្គនាយក ប៉ុល សុផា ចាប់តាំងពីមុនឡើងអគ្គនាយករហូតមកដល់ពេល នេះគឺមានយ៉ាងច្រើន ប៉ុន្តែដោយលោកមានមន្ត្រីមានអំណាចនិងមានការជួយគាំទ្រពីថ្នាក់ដឹកនាំក្រសួង កសិកម្ម ទើបធ្វើឲ្យលោកមានឱកាសរហូត ។
ទាក់ទងព័ត៌មានខាងលើនេះ អ្នកយកព័ត៌បានសុំការបំភ្លឺ ពីលោកអគ្គនាយកប៉ុល សុផា តែលោកបានបដិសេធ ៕
