ខេត្តព្រះសីហនុ៖ លោកចៅ ម៉េង នាយការិយាល័យនគរបាលសេដ្ឋកិច្ច នៃស្នងការដ្ឋាននគរបាលខេត្តព្រះសីហនុកាលពីវេលាម៉ោង២១និង៣០នាទី ថ្ងៃទី១៧ ខែវិច្ឆិកាឆ្នាំ២០១៦បានបើករថយន្តទាំងស្រវឹងជោកជាំទៅបុកម៉ូតូជនបរទេសបណ្តាលឲ្យរងរបួសតែមិនព្រមចេញមុខទទួលខុសត្រូវនោះទេបែរជាប្រឹងបន្ថែមល្បឿនគេចចេញពីកន្លែងកើតហេតុបានចម្ងាយ១គីឡូម៉ែត្រក៏ទៅបុកការដ្ឋានដែលកំពុងសាងសង់រង្វង់មូលត្រីដូលហ្វីន ទៅមុខលែងរួចទើបផ្អើលគេឯង ។ មហាជនកំពុងរង់ចាំមើលថាតើលោកជួនណារិនស្នងការនគរបាលខេត្តព្រះសីហនុចាត់ការកូនចៅរបស់ខ្លួនដើម្បីឲ្យប្រជាពលរដ្ឋមើលជាគំរូយ៉ាងដូចម្តេចទៅ?។
ករណីគ្រោះថ្នាក់ចរាចរណ៍នេះ បានកើតឡើង នៅចំណុចជិតផ្ទះពស់ ស្ថិតក្នុងភូមិលេខ៣ សង្កាត់លេខ៣ ក្រុង-ខេត្តព្រះសីហនុ ដែលបង្កឡើងដោយលោកចៅ ម៉េង បើករថយន្ត១គ្រឿងម៉ាកហាយឡេនឌឺ ពណ៌ខ្មៅ ពាក់ស្លាកលេខ ព្រះសីហនុ ២A-៣៧៨៧ បានធ្វើដំណើរក្នុងទិសដៅពីត្បូងមកជើង លុះមកដល់ចំណុចកើតហេតុ ក៏បានបុក ម៉ូតូមួយគ្រឿងម៉ាក អ៊ែរប្លែក ពណ៌ក្រហម លាយខ្មៅ គ្មានស្លាកលេខ បើកបរដោយបុរសជនជាតិឥណ្ឌូនេស៊ីម្នាក់ឈ្មោះ Yufuf Chandra អាយុ២៧ឆ្នាំ មានទីលំនៅភូមិលេខ៣ សង្កាត់លេខ៣ ក្រុង-ខេត្តព្រះសីហនុ រួមដំណើរជាមួយបុរសម្នាក់ទៀតដែលជាជនជាតិឥណ្ឌូនេស៊ីដូចគ្នាបណ្តាលឲ្យយុវជនជនជាតិឥណ្ឌូនេស៊ីទាំង២នាក់រងរបួសមធ្យម ។
បន្ទាប់ពីបុកជនជាតិឥណ្ឌូនេស៊ីនេះហើយ លោកចៅម៉េងដែលមានជាតិស្រវឹងខ្លាំងក្នុងខ្លួនក៏បានបួងចង្កូតគេចចេញពីកន្លែងកើតហេតុ ហើយបន្ថែមល្បឿនរថយន្តបានប្រហែល១៣០០ម៉ែត្រ ក៏បានទៅបុកការដ្ឋានរង្វង់មូលត្រីដូលហ្វីននៅផ្លូវឯករាជ្យ ក្បែរស្នងការដ្ឋាននគរបាលខេត្តបណ្តាលឲ្យរថយន្តដាច់កង់ទៅមុខលែងរួច ពេលនោះលោកចៅ ម៉េងក៏បានបើកទ្វាររថយន្តគេចខ្លួនបាត់ភ្លាមៗដែរ ។
ប្រជាពលរដ្ឋ ក៏ដូចជាមន្ត្រីរាជការដែលស្គាល់លោកចៅ ម៉េង និយាយថា ជាទម្លាប់ មន្ត្រីនគរបាលជាន់ខ្ពស់នៅខេត្តព្រះសីហនុម្នាក់នេះមិនមែនជាអ្នកដែលចេះទទួលខុសត្រូវនោះទេ។ករណីនេះកំពុងតែធ្វើឲ្យប្រជាពលរដ្ឋក្នុងខេត្តព្រះសីហនុចាប់អារម្មណ៍យ៉ាងខ្លាំងព្រោះថាថ្មីៗនេះនៅខេត្តព្រះសីហនុហ្នឹងដែរស្នងការងម្នាក់ដែលគេស្គាល់ថាជាកូនប្រសាយាយផាប្រធានក្រុមហ៊ុនផានីម៉ិចជិះដល់ទៅឡានលិចស៊ីសតែធឺឬកថោកស្រវឹងខឹងហៅស្រីទៅដេកមិនបានដកកាំភ្លើងបាញ់បោះសេរីគម្រាមសន្តិសុខដូចស្រុកអត់ច្បាប់ទីបំផុយអត់មានរឿងអីមែនស្ងាត់ឈឹង។ ចំពោះករណីមេនគរបាលសេដ្ឋកិច្ចខេត្តស្រវឹងបើកឡានបុកម៉ូតូជនបរទេសហើយបើករត់នេះប្រជាពលរដ្ឋក៏បានគិតទុកជាមុនដែរថា៖គ្មានបញ្ហាព្រោះលោកចៅម៉េងជាអ្នករកលុយជូនមេអ្នករកស៊ីណាមិនដឹងនោះបើចឹងមេម៉េចហ៊ានចាត់ការ?៕
