ប្រទេសថៃ ៖ យ៉ាងហោចណាស់ក៏មានពលករខ្មែរម្នាក់បានស្លាប់ភ្លាមៗ នៅក្នុងហេតុការណ៍គ្រោះថ្នាក់ចរាចរណ៍ នៅក្នុងប្រទេសថៃ ខណៈដែលពួកគេបានបើកបរម៉ូតូយ៉ាងលឿនត្រង់ចំណុចផ្លូវកោង ដើម្បីទៅធ្វើការក៏បានបុកទៅលើបង្គោលភ្លើងទាំងព្រឹក។
តាមរបាយការណ៍របស់សមត្ថកិច្ចថៃ បានអោយដឹងថា ហេតុការណ៍នេះបានកើតឡើងនៅវេលាម៉ោង ៦ និង ៣០ នាទីព្រឹក ថ្ងៃទី២១ ខែវិច្ឆិកា ឆ្នាំ២០១៦ ត្រង់ចំណុចផ្លូវកោងមួយកន្លែង ក្បែផ្លូវបំបែក ណងឆៃរឿ ក្នុងស្រុកបានបឹង ខេត្តឆុនបុរី ប្រទេសថៃ ។
របាយការណ៍បានបន្តថា នៅមុនពេលកើតហេតុខាងលើ គេបានឃើញយុវជនពីរនាក់ដែលជាពលករខ្មែរទៅធ្វើការនៅទីនោះ បានជិះម៉ូតូឌុបគ្នាដោយបានបើកបរយ៉ាងលឿនដែលទំនងជាមានការប្រញ៉ាប់ទៅធ្វើការផង ។ លុះទៅដល់ត្រង់ចំណុចខាងលើ ដែលជាចំណុចផ្លូវកោង ប្រហែលជាគេមិនអាចយកចង្កូតបានទើបជ្រុលទៅបុកនឹងសសរដងគោម( បង្គោលភ្លើង ) យ៉ាងពេញទំហឹង បណ្តាលអោយមនុស្សម្នាក់ត្រូវបានស្លាប់ភ្លាមៗនៅនឹងកន្លែង ម៉ូតូនឹងមនុស្សបានជ្រុលទៅធ្លាក់ក្នុងទឹកប្រលាយ ចំណែកម្នាក់ទៀតក៏រងរបួសយ៉ាងធ្ងន់ធ្ងរ ដោយត្រូវបានប្រជាពលរដ្ឋជួយដឹកបញ្ជូនទៅសង្គ្រោះនៅឯមន្ទីរពេទ្យ ។
រហូតមកទល់នឹងពេលនេះ គេនៅមិនទាន់ស្គាល់អំពីអត្តសញ្ញាណជនរងគ្រោះទាំងពីរនាក់ថាជាអ្នករស់នៅក្នុងខេត្តណា នៃប្រទេសកម្ពុជា នៅឡើយទេ ហើយក៏មិនយូរដែរ ស្ថានអគ្គកុងស៊ុល ប្រចាំប្រទេសថៃ ប្រាកដជាជួយសម្រួលដល់ការដឹកសពពលកររូបនោះវិលត្រឡប់មកកម្ពុជាវិញជាមិនខាន ដើម្បីអោយក្រុមគ្រួសារ សាច់ញាតិរៀបចំធ្វើបុណ្យតាមប្រពៃណីនៅឯស្រុកកំណើត ៕
