ខេត្តកណ្ដាល ៖ យ៉ាងហោចណាស់មានមនុស្សរបួសធ្ងន់ម្នាក់ និងស្ដាប់ម្នាក់ដោយសារតែឈ្លោះប្រកែងទាស់សម្ដីគ្នា ហេតុការណ៍នេះបានកើតឡើងនាថ្ងៃទី ២១.១១.២០១៦ វេលាម៉ោង០៦.៣០ នាទី នៅចំណុចផ្ទះជនរងគ្រោះ ស្ថិតក្នុងភូមិ ព្រែករុនក្រោម ឃុំព្រែកគយ ស្រុកស្អាង ខេត្តកណ្តាល ។
ជនរងគ្រោះម្នាក់បានស្លាប់មានឈ្មោះ ហួត លាងហេង ភេទ ប្រុស អាយុ ៥០ឆ្នាំនិងម្នាក់ឈ្មោះ ឃី សុខគីម ភេទ ស្រី អាយុ ៦៨ រងរបួសធ្ងន់ បញ្ជូនទៅមន្ទីរពេទ្យកាល់ម៉ែត ។ អ្នកទាំង០២មានទីលំនៅ ភូមិ ឃុំ កើតហេតុខាងលើ ។
ឯជនដៃដល់ត្រូវសមត្ថកិច្ច ឃាត់ខ្លួនបានមាន ឈ្មោះ ហួត សុងតិច ភេទ ប្រុស អាយុ២៦ឆ្នាំ មានមុខរបរ ជាកម្មកររោងចក្រ មានទីលំនៅ ភូមិ ឃុំកើតហេតុខាងលើ ត្រូវជាកូនជនរងគ្រោះ ។
ដើមហេតុដំបូងមកពី ឈ្មោះ ហួត លាងហេង បានឈ្លោះប្រកែកគ្នា ជាមួយ ឈ្មោះ ហួត សុងតិច ភ្លាមនោះ ឈ្មោះ ហួត លាងហេង បានកាន់កាំបិតបុ័ងតោ សំដៅមករកម្តាយ ឈ្មោះ ឃី សុខគីម ពេលឃើញដូច្នេះ ឈ្មោះ សុងតិច តាមមកមើល ឃើញឈ្មោះលាងហេង កាប់ក្បាលម្តាយជាច្រើនកាំបិត រំពេចនោះ ឈ្មោះ សុងតិច យកដំបងឈើមូលប្រវែងប្រហែល ១ម៉ែត្រ វាយក្បាល ឈ្មោះ លាងហេង ចំនួន ០១ដំបង ពេលជាមួយគ្នានោះ ឈ្មោះ លាងហេង បានប្រតាយប្រតបជាមួយ សុងតិច បណ្តាលឲ្យកាប់ត្រូវ កដៃ ឈ្មោះ សុងតិច ០១ កាំបិត ឈ្មោះ សុងតិច បានវាយ ឈ្មោះ លាងហេង ចំនួន០២ ដំបង ចំក្បាលបន្ថែមទៀត បណ្តាលឲ្យឈ្មោះ លាងហេង ស្លាប់នៅនឹងកន្លែងតែម្តង ។
បច្ចុប្បន្នជនសង្ស័យ រួមជាមួយវត្ថុតាង ត្រូវបានអធិការដ្ឋាននគរបាលស្រុកស្អាងឃាត់ទុក និងកសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់ ៕
