ឯកឧត្តម ញ៉ឹម វណ្ណដា អនុប្រធានទី១ គណកម្មាធិការជាតិគ្រប់គ្រងគ្រោហមហន្តរាយបានអញ្ជើញចូលរួមជាគណអធិបតី ក្នុងកិច្ចប្រជុំ ពិនិត្យក្តាប់សភាពការណ៍ ស្តីពីការគ្រប់គ្រងគ្រោះមហន្តរាយ ដែលកើតមានក្នុងខេត្តបាត់ដំបង កាលពីថ្ងៃទី២៨ ខែសីហា ឆ្នាំ២០១៤។
ក្នុងរបាយការណ៍របស់ឯកឧត្តម ច័ន្ទ សុផល អភិបាលនៃគណអភិបាលខេត្ត និងជាប្រធានគណកម្មាធិការគ្រប់គ្រងគ្រោះមហន្តរាយខេត្ត បានបញ្ជាក់ពីសភាពការរួម ពាក់ព័ន្ធទៅនិងគ្រោះមហន្តរាយ ក្នុងនោះមានភ្លើងឆេះផ្ទះ ផ្ទុះមីន និងខ្យល់កន្ត្រាក់ កើតមាន ៤៧លើក ប៉ះពាល់ផ្ទះ ជាង ៩០ ខ្នង សាលរៀន ៧ ខ្នង អគ្គីភ័យកើតមាន ៧ ករណី រន្ទះបាញ់ ១៧ លើក ផ្ទុះមីនកើតមាន ៤ ករណី សរុបធ្វើឱ្យមានមនុស្សស្លាប់ ២២នាក់ និងរបួស ៣៥នាក់ ។
ដោយឡែកគ្រោះរាំងស្ងួត ក្នុងខែកក្កដា ដល់ខែសីហា កើតមាន ៧ ក្រុងស្រុក។ របាយការណ៍បានបន្តទៀតថា ការបង្កបង្កើន ផលស្រូវ រដូវវស្សាឆ្នាំនេះ ប្រជាកសិករអនុវត្តបាន ២៤៣,៣៤៧ ហិកតា លើកផែនការ ២៥១,០០០ ហិកតា។ ផលប៉ះពាល់គ្រោះរាំងស្ងួតមាន ចំនួន ៣៩៥៨ ហិកតា ក្នុងស្រុក៣ ត្រូវខូចខាតធ្ងន់ធ្ងរជាងគេ គឺស្រុក មោងឬស្សី ស្រុកសង្កែ និងស្រុកថ្មគោល ។
ទន្ទឹមនិងនោះ អាជ្ញាធរ និង មន្ទីរជំនាញ បានខិតខំពុះពារ ស្វះស្វែងក្នុងការរកទឹក ឱ្យប្រជាកសិករ ដោយធ្វើការចាល់ទឹក ពីសំណង់ស្ទាក់ទឹកកង្ហត ក្នុងស្រុកបាណន់ ធ្វើឱ្យទឹកហូរ បានខ្លះតាមប្រឡាយធ្វើឱ្យប្រជាកសិករ បានបូមដាក់ស្រែជាបណ្តើរៗហើយ។ ជាមួយគ្នានោះដែរមន្ទីរកសិកម្ម ក៏ដូចជាមន្ទីរធនធានទឹក និង ឧតុនិយម និងសាលាកបាតក្រហមខេត្ត បានរៀបចំកម្លាំងចុះតាមដាន ពិនិត្យមើលការខ្វះខាតជាប្រចាំ និងត្រៀមពូជស្រូវ ម៉ាស៊ីនបូមទឹក និង ប្រេង ចាំជួយប្រជាកសិករផងដែរ។
ឯកឧត្តម ញ៉ឹម វណ្ណដា បានកោតសរសើរដល់ការខិតខំ អភិវឌ្ឍន៍លើគ្រប់វិស័យរបស់ខេត្ត និងបានត្រៀមគ្រប់លក្ខណៈជួលដល់ប្រជាកសិករ យើង។ ឯកឧត្តមបានជួយអង្ករ ១០០តោន ស្រូវពូជ ១០០តោន និងប្រេង ១០០០០លីត្រ សម្រាប់ជាសេចក្តីត្រូវការរបស់ប្រជាកសិករយើង ៕