ក្រចេះ៖ ប្រជាពលរដ្ឋចំនួន ០២នាក់ ស្លាប់បាត់បង់ជីវិតក្នុងរណ្ដៅរ៉ែមាសដោយសារពុលផ្សែងម៉ាស៊ីន ខណៈពេលពួកគាត់ ចុះទៅពន្លត់ម៉ាស៊ីនបូមទឹកនៅក្នុងរណ្ដៅនោះ។
ហេតុការណ៍នេះ បានកើតឡើងកាលពីវេលាម៉ោង ៨យប់ ថ្ងៃទី០៨ ខែវិច្ឆការ ឆ្នាំ២០១៦ នៅចំនុចអូរទ្រូន ស្ថិតនៅឧបសម្ពន័ភូមិអូពោធិ ឃុំក្បាលដំរី ស្រុកសំបូរ ខេត្តក្រចេះ ។
លោក សុខ យឿន មេភូមិ បានឲ្យដឹងថា ពលរដ្ឋរស់នៅទីនោះរួមគ្នាប្រមាណជាង ១០គ្រួសារ ជីករុករករ៉ែដើម្បីជីវភាពរបស់ពួកគាត់ ប៉ុន្តែអកុសល់ បុរសចំនួន ០២នាក់ បានស្លាប់បាត់ជីវិត ។
លោក បន្ដទៀតថា ជនរងគ្រោះមានឈ្មោះ ៖ ទី១ ឈ្មោះ ខុន ណាក់ ភេទប្រុស អាយុ ៣០ឆ្នាំ ជនជាតិខ្មែរ មានទីលំនៅភូមិសិរីភាព ឃុំដារ ស្រុកចិត្របុរី ខេត្តក្រចេះ ។ ទី២ ឈ្មោះយឹម គឹមយុត ភេទប្រុស អាយុ ២៧ឆ្នាំ ជនជាតិខ្មែរ រស់នៅពង្រូង ឃុំសុចិត្ត ស្រុកសណ្ដាន់ ខេត្តកំពង់ធំ។
ប្រជាពលរដ្ឋប្រមាណជាង ១០គ្រួសាដែកជីករុករករ៉ែនោះ បានឲ្យដឹងថា ពួកគាត់អត់មានកាងារធ្វើមួយរយៈពេលមកហើយ ខណៈពេលដែលក្រុមហ៊ុនរុករករ៉ែមាសរបស់ចិនមួយ បានផ្អាក់ដំណើរការមួយរយះ ទើបពួកគាត់រួមគ្នាជីរណ្ដៅតូចៗ ដែលមានចំងាយ ២០០ម៉ែត្រ ទៅ៣០០ម៉ែត្រ ពីក្រុមហ៊ុន ដើម្បីដោះស្រាយជីវភាពតែប៉ុណ្ណោះ ហើយពួកគាត់និងរៃអង្គាសគ្នា ដើម្បីធ្វើបុណ្យ និងជួយឧបត្ថម្ភគ្រួសារសព្វ ។
លោក ឡុង យឹង ប្រធានមន្ទីរយុតិ្តធម៍នៃអាវុធហត្តខេត្តក្រចេះ បានឲ្យដឹងថា ក្រោយដឹងហេតុការណ៍ថា មានករណីគ្រោះថ្នាក់រហូតបណ្ដាលឲ្យមនុស្សស្លាប់ លោកក៍បានដឹកនាំកម្លាំងក្រោមបញ្ជាផ្ទាល់របស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តចុះទៅពិនិត្យដល់កន្លែងកើតហេតុ ហើយសមត្ថកិច្ចទាំងអាវុធហត្ថទាំងនគរបាល បានធ្វើកោសល្យវិច្ឆ័យឃើញថា ជនរងគ្រោះទាំងពីរនាក់ពិតជាស្លាប់ ដោយសារពុលផ្សែងម៉ាស៊ីនប្រាកដមែន ហើយកម្លាំអាវុធហត្ថខេត្ត ក៏បានឃាត់ខ្លួនមនុស្សចំនួន ៤នាក់ បណ្ដោះអាសន្ន ពាក់ព័ន្ធនឹងម្ចាស់រណ្ដៅ យកមកសួរនាំនៅទីបញ្ជាការដ្ឋានអាវុធហត្ថខេត្តក្រចេះ ។
បច្ចប្បន្នសព្វជនរងគ្រោះទាំងពីរ ត្រូវសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
