ក្រចេះ ៖ ហេតុការដ៏គួរឲ្យតក់ស្លុត បានកើតឡើងកាលពីវេលាម៉ោង ៥នឹង៥៥នាទីព្រលឹមស្រាងៗព្រឹកថ្ងៃទី០៩ ខែវិច្ឆិកា ឆ្នាំ២០១៦ នៅចំនុចផ្លូវកែងដើមពោធ៍ ភូមិទំនុបដាច់ សង្កាត់ក្រចេះ ក្រុងក្រចេះ ។
សមត្ថកិច្ច បានឲ្យដឹងថា ជនរងគ្រោះមានឈ្មោះ ស៊ីថា ភេទប្រុស អាយុ ៣២ឆ្នាំ មានទីលំនៅ នៅភូមិកើតហេតុខាងលើ បានរងរបួសធ្ងន់ ដោយត្រូវគៀបជាប់ជាមួយនឹងកង់រថយន្ត ។ ក្រោយពេលកើតហេតុភ្លាមៗ ជនរងគ្រោះត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅឯមន្ទីរពេទ្យបង្អែកខេត្តក្រចេះ ។
សមត្ថកិច្ច បានបន្តថា រថយន្តបង្ករខាងលើជារថយន្តសាំយ៉ុង មានផ្ទុកឈើកែច្នែទ្វារបង្អួចពេញក្នុងរថយន្ត ក្រោយពេលបង្ករហេតុ អ្នកបើកបររថយន្ត បានរត់បាត់បន្សល់ទុករថយន្តបង្ករចោលនៅនឹងកន្លែង ។
សាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ ជនរងគ្រោះ និងប្រពន្ធ ព្រមទាំងកូនតូចៗ ៣នាក់ កំពុងដេកសម្រាកនៅក្នុងផ្ទះ ស្រាប់តែមានរថយន្តសាំងយ៉ុងមួយគ្រឿងបើកបរយ៉ាងលឿនក្នុងទិសដៅពីជើងទៅត្បូង លុះមកដល់ចំនុចកើតហេតុខាងលើ ក៏ជ្រុលចង្កូតទៅបុកចូលក្នុងផ្ទះប្រជាពលរដ្ឋតែម្តង ។
ប្រភពពីប្រជាពលរដ្ឋ ក្នុងក្រុងក្រចេះ បានលើកឡើងថា សព្វថ្ងៃនេះ ពួកគាត់មានការព្រួយបារម្ភ ជាខ្លាំងអំពីបញ្ហាសុវត្ថិភាពនៅតាមដងផ្លូវក្នុងក្រុង ដោយសារមានរថយន្តសាំងយ៉ុងដឹកឈើជាច្រើនគ្រឿងកំពុងធ្វើចរាច និងបើកបរលឿនៗ ប៉ុន្តែមិនមានអាជ្ញាធរ ឬសមត្ថកិច្ចណាមួយធ្វើការបង្ក្រាបនោះឡើយ គឺមានតែរថយន្តបើកតាមយកលុយ និងចាប់ហើយ លែងវិញតែប៉ុណ្ណោះ ៕