ក្រចេះ៖ មន្ដ្រីកាំកុងត្រូលសាខាខេត្តក្រចេះ សហកាជាមួយនិងមន្ទីពាណិជ្ជកម្មខេត្ត បន្តចុះត្រួតពិនិត្យមើល ការដាក់តាំងលក់នូវផលិតផល ម្ហូបចំណីអាហារ នៅក្នុងផ្សារសាមគ្គីក្រុងក្រចេះ និងតាមផ្ទះ លក់អីវ៉ាន់មួយចំនួនទៀត នៅក្នុងទីរួមក្រុងក្រចេះ ។
ការចុះត្រួតពិនិត្យផលិតផល ម្ហូបអាហារ និងទំនិញដាក់លក់នៅតាមផ្ទះ គឺបានធ្វើឡើងកាលពីថ្ងៃទី០៨ ខែវិច្ឆិកា ឆ្នាំ២០១៦នេះ ក្រោមការដឹកនាំពីលោក យាង បាក អនុប្រធានសាខាកាំកុងត្រូលខេត្តក្រចេះ បានបញ្ជាក់ថា អាជីវករមួយចំនួន នូវពុំទាន់យល់ដឹងច្បាស់អំពីការទុកដាក់ទំនិញ ឬពិនិត្យទៅលើកាលបរិច្ឆេទ និងទំនិញដែលមានស្ដង់ដាសមស្របទៅតាមការណែនាំរបស់មន្ដ្រីកាំកុងត្រូល ក្នុងការរៀបចំទុកដាក់ និងរក្សាសុវត្ថិភាពជូនដល់អ្នកប្រើប្រាស់នៅឡើយ ។
បន្ថែមទៀតនោះ លោក បានណែនាំដល់អាជីវរកលក់ដូរទាំងអស់អោយមានការយកចិត្តទុកដាក់និងទទួលខុសត្រូវខ្ពស់ ក្នុងកាពិនិត្យមើលទៅលើគ្រប់មុខចំណីអាហារឬផលិតផលទាំងនោះ មុននិងលក់ដូរជូនដល់អ្នកប្រើប្រាស់ ឬអ្នកចែកចាយបន្ត ។
លោកបានលើកឡើងថា ការដែលអាជីវករមិនទាន់យល់ដឹងអំពីផលិតផល ម្ហូបអាហារ ទំនិញខូចគុណភាព និងការដាក់តាំងលក់ដូរ នំចំណី និងផលិតផលមួយចំនួនហួសកាលបរិច្ឆេទប្រើប្រាស់នោះ គឺវាអាចបង្កឱ្យមានជំងឺផ្សេងៗ និងប៉ះពាល់ដល់សុខភាពសិស្សានុសិស្ស និងប្រជាពលរដ្ឋអ្នកប្រើប្រាស់ទាំងអស់គ្នាផងដែរ ។
លោក យាង បាក អនុប្រធានសាខាកាំកុងត្រូលខេត្តក្រចេះ ក៍បានបញ្ជាក់ដែរថាជាមួយនិងសកម្មភាពខាងលើនេះ ក៍បានរកឃើញនំចំណីអាហារ និងផលិតផលមួយចំនួនដែលហួសកាលបរិច្ឆេទប្រើរប្រាស់ និងបានរឹបអូសយក ដើម្បីធ្វើការដុតបំផ្លាញចោល ។
លោក បន្តឲ្យដឹងទៀតថា ចាប់ពីពេលនេះតទៅបន្ទាប់ពីបានចុះណែនាំ និងអប់រំរួចមក ប្រសិនបើលើកក្រោយ រកឃើញថាមានផលិតផល ទំនិញណាដែលខូចគុណភាព និងហួសកាលបរិច្ឆេទប្រើប្រាស់ និងគ្មានស្លាកសញ្ញាត្រឹមត្រូវ មន្ដ្រីកាំកុងត្រូលនឹងដកហូតយកទាំងអស់ ហើយនឹងអាចឈានទៅពិន័យថែមទៀត។
ជាពិសេស ណែម ដែលគេបានដាក់តាំងលក់ជាហូរហែរ ត្រូវបានគេសង្ស័យថា មានផ្ទុកសារធាតុបន្ថែម (សារធាតុគីមី) ប៉ុន្តែជាលទ្ធផលក្រោយពេលមន្ត្រីជំនាញកាំកុងត្រូលធ្វើតេស្ដ មិនបានរកឃើញនូវសារធាតុគីមីឡើយ ។ ក្នុងនោះដែរ លោក ក៏បានធ្វើការអំពាវនាវដល់អាជីវករទាំងអស់ ត្រូវបន្ដយកចិត្តទុកដាក់ទៅលើផលិតផល ទំនិញ គ្រប់ប្រភេទដែលបានដាក់លក់ ត្រូវពិនិត្យលើស្លាកសញ្ញាឱ្យបានត្រឹមត្រូវ និងមានកាលបរិច្ឆេទច្បាស់លាស់ ចៀសវាងដាក់លក់ទំនិញខូចគុណភាព បង្កផលប៉ះពាល់ដល់សុខភាពអ្នកប្រើប្រាស់ ។
បងស្រី ផល្លា អ្នកលក់ក្រឡាន និងណែម នៅខេត្តក្រចេះ បានឲ្យដឹងថា រូបបងស្រី សប្បាយចិត្តទ្វេរដង នៅពេលដែលក្រុមការងារបានចុះពិនិត្យនូវគុណភាព ផលិតផល ម្ហូបចំណីអាហារ នៅក្នុងក្រុងក្រចេះ ព្រោះបានបញ្ជាក់ឲ្យដឹងថា ចំណីអាហារ (ណែម) ដែលធ្វើនៅក្នុងខេត្តក្រចេះ គ្មានជាតិគីមី ៕
