នៅព្រឹកថ្ងៃទី០២ ខែវិច្ឆិកា ឆ្នាំ២០១៦ វិទ្យាល័យព្រះមហាក្សត្រីយានី កុសុមៈ និងសាលាបឋមសិក្សា អនុវិទ្យសល័យ និងវិទ្យាល័យ នៅក្នុងខេត្តក្រចេះ ចាប់ផ្ដើមឆ្នាំសិក្សាថ្មី ជាមួយនឹងពិធីបើកបវេសនកាលជាផ្លូវការ ក្រោមអធិបតីភាពលោក ខ័ណ្ឌ ចំណាន អភិបាលរងខេត្ត តំណាងដ៏ខ្ពង់ខ្ពស់ឯកឧត្តម អភិបាលខេត្តក្រចេះ ។
សិស្សានុសិស្ស និងលោកគ្រូ អ្នកគ្រូ អ្នកស្ម័គ្រចិត្ត នៃអនុវិទ្យាល័យ និងវិទ្យាល័យទាំងអស់ក្នុងទីរួមខេត្ត ចំនួនជិត ៤ពាន់នាក់ បានជួមជុំគ្នាចូលរួមក្នុងពិធីបើកបវេសនកាលនៅក្នុងវិទ្យាល័យព្រះមហាក្សត្រីយានី កុសមៈ ។
មានមតិស្វាគមន៍ដល់អង្គពិធីទាំងមូល លោក ឡាយ បូរ៉ា ប្រធានមន្ទីរអប់រំយុវជន និងកីឡាខេត្តក្រចេះ បានឡើងអាននូវរបាយកាណ៍ឆ្នាំសិក្សាចាស់២០១៥-២០១៦ ថា ថ្នាក់មត្តេយ្យ មាន ៦៧កន្លែង មានគ្រូបង្រៀនចំនួន ១៣០នាក់ ស្រី ១៣០នាក់ មានកុមារា កុមារីសរុបចំនួន២.៨១១នាក់ កុមារី ១.៤២១នាក់, ថ្នាក់បឋមសិក្សា មានចំនួន ២០០១ថ្នាក់ មានគ្រូបង្រៀន ១,៥៧០នាក់ ស្រី ៩៤៥នាក់ មានសិស្សានុសិស្សសរុបចំនួន ៥៨.៧៤៨នាក់ ស្រី២៨.៨២១នាក់, ថ្នាក់មធ្យមសិក្សា (អនុវិទ្យាល័យ) មាន ៤១កន្លែង មានគ្រូបង្រៀនសរុបចំនួន ៥១៤នាក់ ស្រី ២៧៨នាក់ និងមានសិស្សសរុបចំនួន ៧.៧៨០នាក់ ស្រី ចំនួន ៤.១៥១នាក់ និងថ្នាក់វិទ្យាល័យ មានចំនួន ១០កន្លែង មានគ្រូបង្រៀនសរុបចំនួន ៥៣១នាក់ ស្រី ២១៦នាក់ និងមានសិស្សានុសិស្សសរុប ចំនួន ៧.១៤៧នាក់ ស្រី ៣.៣៩១នាក់ ។
លោក បានបញ្ជាក់ថា បេក្ខជនប្រឡងសញ្ញាបត្រ័មធ្យមសិក្សាទុតិយភូមិសរុប មានចំនួន ១.៣៨៦នាក់ ស្រី ៧២៣នាក់ និងបេក្ខជនប្រឡងជាប់សរុបមានចំនួន ៩៥៦នាក់ ស្រី ៥៣២នាក់ ស្មើនឹង ៦៨.៩៨ភាគរយ ។
ជាមួយគ្នានោះ លោក ខ័ណ្ឌ ចំណាន អភិបាលរងខេត្ត តំណាងឯកឧត្តមអភិបាលខេត្ត បានអាននូវខ្លឹមសារទាំស្រុងនៃសាលិខិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសបើកបវេសនកាលឆ្នាំសិក្សាថ្មី ២០១៦-២០១៧ ។ លោក អភិបាលរងខេត្ត ក៏បានផ្ដល់នូវប្រសាសន៍ល្អដល់ប្អូនសិស្សានុសិស្ស ឲ្យខិតខំយកចិត្តទុកដាក់ស្តាប់ដំបូន្មានឪពុកម្ដាយ ចាសព្រឹទ្ធាចារ្យ លោកគ្រូ អ្នកគ្រូ គោរពវិន័យ គោរពបទបញ្ជាផ្ទៃក្នុងរបស់សាលា ត្រូវធ្វើខ្លួនជាកូនល្អ មិត្តល្អ សិស្សល្អ និងជាយុវជនគំរូនៅក្នុងសង្គម ។ ជាពិសេសត្រូវជៀសឆ្ងាយពីការសេពគ្រឿងញៀន និងអំពើឧបាយមុខនានា ដែលសង្គមស្អប់ខ្ពើម ដើម្បីអនាគតភ្លឺស្វាយ ។
លោក អភិបាលរងខេត្ត បានបន្តជម្រុញឲ្យសិស្សានុសិស្សទាំងអស់ ត្រូវឆ្លើយថាទេចំពោះគ្រឿងញៀន គ្មានក្មេងទំនើងទាំងនៅក្នុងសាលា និងសង្គម មិនលេងល្បែងស៊ីសង់ មិនសេពគ្រឿងស្រវឹង និងត្រូវគោរពច្បាប់ចរាចទាំងអស់គ្នា ដើម្បីជៀសវាងនូវគ្រោះថ្នាក់ចរាចនៅតាមដងផ្លូវនានា ៕
