ក្រចេះ៖ ពិធីបើកការរដ្ឋានសាងសង់អគារសិក្សា ១ខ្នង ចំនួន ២បន្ទុប់ ដែលជាអំណោយរបស់លោក គង់ ក្រឹង មេបញ្ជាការរងវរសេនាតូចការពារព្រំដែន ២០៤ ក្រោមអធិបតីភាពលោក ម៉ែន វណ្ណា អភិបាលស្រុកស្ដីទីស្រុកស្នួល និងកងកម្លាំងទាំងបីប្រភេទនៅស្រុកស្នួល ។
ពិធីបើកការរដ្ឋាននេះ ធ្វើឡើងនៅព្រឹកថ្ងៃទី៣០ ខែតុលា ឆ្នាំ២០១៦ នៅភូមិត្រពាំងស្បែកកើត ឃុំ២ធ្នូ ស្រុកស្នួល ខេត្តក្រចេះ ដែលមានបងប្អូនប្រជាពលរដ្ឋខ្មែរឥស្លាមចំនួន ២០០នាក់ ។
លោក គង់ ក្រឹង បានឲ្យដឹងនៅព្រឹកការបើកការរដ្ឋាននេះ លោកបានផ្ដល់ដីមួយកន្លែង ដែលមានទំហំ ៣០×៥០ម៉ែត្រជូនប្រជាពលរដ្ឋនៅក្នុងភូមិនោះទុកជាសម្បត្តិ៍រួមសម្រាប់ការអភិវឌ្ឍន៍នាបច្ចុប្បន្ន ។
លោក បានបន្តថា ការផ្ដល់អគាសិក្សាមួយខ្នងនេះ និងដីមួយកន្លែងនេះ លោកបានចំណាយថវិកាផ្ទាល់ខ្លួនប្រមាណជិត ៣ម៉ឺនដុល្លាសហរដ្ឋអាមេរិច ។ ហើយការផ្ដល់ជូននេះ មិនមែនទើបតែធ្វើជាលើកទីមួយ និងនៅកន្លែងនេះនោះទេ ប៉ុន្តែកន្លងមកលោកបានចំណាយនូវធនធានទ្រព្យសម្បត្តិ៍ផ្ទាល់ខ្លួន ក្នុងការជួសជុលផ្លូវលំ ធ្វើអណ្ដូងទឹក ជាច្រើនកន្លែងនៅក្នុងស្រុកស្នួល ដែលសកម្មភាពទាំងនេះ បានឆ្លុះបញ្ចាំងឲ្យឃើញពីការចូលរួមចំណែកក្នុងកិច្ចការងារអភិវឌ្ឍន៍សង្គមមួយជាមួយរាជរដ្ឋាភិបាល ។
ជាមួយគ្នានោះ បងប្អូនប្រជាពលរដ្ឋដែលជាជនជាតិខ្មែរឥស្លាម បានសាទរយ៉ាងខ្លាំងចំពោះទឹកចិត្តសប្បុរសធម៌របស់លោក គង់ ក្រឹង ។
ពួកគាត់ បានបញ្ជាក់ទៀតថា នេះជាលើកដំបូងហើយដែលនៅក្នុងភូមិរបស់គាត់មានអគារសិក្សា ដែលកន្លងមកកូនៗរបស់ពួកគាត់ធ្លាប់តែរៀននៅតាមព្រះវិហារ ៕
