ខេត្តបាត់ដំបង៖ នគរបាលការិយាល័យប្រឆាំងគ្រឿងញៀនស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី២៨ ខែតុលា ឆ្នាំ២០១៦ បានចាប់បញ្ជូនយុវជន៥នាក់ដែលមានដាវសាំម៉ូរ៉ៃជាប់ចោទពីបទជួញដូរនិងប្រើប្រាស់គ្រឿងញៀនខុសច្បាប់និងថ្នាំញៀនមួយចំនួនធំយកទៅតុលាការដើម្បីចាត់ការតាមផ្លូវច្បាប់។បន្ទាប់ពីជនសង្ស័យទាំង៥នាក់កំពុងធ្វើសកម្មភាពប្រព្រឹត្តបទល្មើសគ្រឿងញៀនដោយរងការបង្ក្រាបចាប់ឃាត់ខ្លួនបានពីកម្លាំងនគរបាលស្រុករុក្ខគីរី កាលល្ងាចថ្ងៃទី២៦ ខែតុលា ឆ្នា២០១៦ នៅភូមិព្រែកតាវេន ឃុំព្រែកជីក ស្រុករុក្ខគីរី ខេត្តបាត់ដំបង។
ប្រតិបត្តិការនៃការបង្ក្រាបជនសង្ស័យគ្រឿងញៀនខាងលើកម្លាំងនគរបាលធ្វើឡើង គ្រាដែលយុទ្ធនាការប្រឆាំងគ្រឿងញៀននៅខេត្តបាត់ដំបង ត្រូវគេមើលឃើញថា សមត្ថកិច្ច កំពុងតែអនុវត្តយ៉ាងខ្លាំងក្លាដើម្បីបង្ការទប់ស្កាត់បទល្មើសគ្រប់ប្រភេទ ក្រោមការដាក់ចេញតាមបទបញ្ជារបស់លោកឧត្តមសេនីយ៍ទោ ស ថេត ស្នងការនគរបាលខេត្តបាត់ដំបង។បទល្មើសផ្តើមចេញពី គ្រឿងញៀនត្រូវគេនិយាយថាបានបង្កជាអំពើចោរកម្មលួច ឆក់ ប្លន់ អំពើហឹង្សា និងបទល្មើសរំលោភជាដើម ដែលជាហេតុធ្វើឱ្យប៉ះពាល់សន្តិសុខសណ្តាប់ធ្នាប់សារធារណៈយ៉ាងធ្ងន់ធ្ងរ ។ មិនតែប៉ុណ្ណោះ គ្រឿងក៏បង្កឱ្យពលរដ្ឋមានការព្រួយបារម្ភគ្រឿងញៀនបាននិងកំពុងរាលដាលពីទីក្រុងរហូតដល់ទីជនបទ នោះហើយ។
ជនសង្ស័យគ្រឿងញៀនទាំង៥នាក់មានឈ្មោះ១,ចយ មី ភេទប្រុសអាយុ២០ឆ្នាំ គ្មានមុខរបរពិតប្រាកដ រស់នៅភូមិខាំប្រើស ឃុំព្រែកជីក ស្រុករុក្ខគីរី ២, ធួន លីហ្វុង ភេទប្រុស អាយុ១៨ឆ្នាំគ្មានមុខរបរពិតប្រាកដ ៣,ផុន រិទ្ធី ភេទប្រុសអាយុ២៦ឆ្នាំ គ្មានមុខរបរពិតប្រាកដ អ្នកទាំង២នាក់រស់នៅភូមិព្រែកតាវេន ឃុំព្រែកជីក ស្រុករុក្ខគីរី ។ជនសង្ស័យទាំង៣នាក់ជាមុខសញ្ញាលក់ចែកចាយថ្នាំញៀន ៤,ឈ្មោះ សយ សុភ័ក្ត្រ ភេទប្រុសអាយុ២០ឆ្នាំ គ្មានមុខរបរពិតប្រាកដ និង៥,ឈ្មោះ ឈា លីឆេង ភេទប្រុសអាយុ១៧ឆ្នាំ គ្មានមុខរបរពិតប្រាកដ ជនស្ស័យទាំង២នាក់ជាមុខសញ្ញាប្រើប្រាស់គ្រឿងញៀនរស់នៅភូមិព្រែកតាវេន និងភូមិព្រែកជីក ឃុំព្រែកជីក ស្រុករុក្ខគីរី។ជាមួយនិងការបង្ក្រាបចាប់ឃាត់ខ្លួនជនសង្ស័យ សមត្ថកិច្ចរកឃើញថ្នាំញៀនមេតំហ្វេតាមីន ទឹកកកចំនួន២៧កូនថង់ ស្មើនិងទម្ងន់២.៦២ក្រាម ដាវសាំម៉ូរ៉ៃចំនួន២ដើម និងឧបករណ៍សម្រាប់ប្រើប្រាស់ថ្នាំញៀនមួយចំនួនធំផងដែរ៕