ភ្នំពេញ ៖ នគរបាលចរាចរណ៍ខណ្ឌជ្រោយចង្វារដាក់ប៉ុស្តិ៍ត្រួតពិនិត្យចល័តនៅលើផ្លូវលេខ៦អាមុខវត្តខ្ទរ បានដកយកកាមេរ៉ាទូរស័ព្ទរបស់អ្នកយកព័ត៌មានកាសែតរស្មីកម្ពុជាម្នាក់យកទៅលុបរូបថតមួយចំនួនចោល ដោយចោទពីបទប្រើប្រាស់ទូរស័ព្ទក្នុងពេលកំពុងបើកបរ។
តែអ្នកបើកបរអះអាងថា ទូរស័ព្ទរបស់គាត់បានដាក់លើភ្លៅ និងបើកសម្លេងចេញក្រៅរួចក៏លើកមកបិទបញ្ចប់ការសន្ទនានៅពេល មកដល់កន្លែងត្រួតពិនិត្យ ។ ករណីនេះបានកើតមានឡើង នៅម៉ោងប្រមាណជា៩និង៣០នាទីព្រឹកថ្ងៃទ១៩ ខែតុលា ឆ្នាំ២០១៦ ក្នុងពេលអ្នកយកព័ត៌មានរូបនេះបើកឡាចុះទៅពិនិត្យ សកម្មភាពត្រួតពិនិត្យរបស់នគរបាលចរាចរណ៍ចំណុចខាងលើ បន្ទាប់ពីមានសេចក្តីរាយការណ៍ពីប្រជាពលរដ្ឋមកថា នគរបាលក្រុមនេះ បានវាយទៅលើកញ្ចក់ទ្វាររថយន្តអ្នកដំណើរក្នុងពេលហៅត្រួតពិនិត្យ។
ចំណែករឿងរ៉ាវរបស់អ្នកយកព័ត៌មានវិញគឹ មិនបាននិយាយទូរស័ព្ទទេ ការពិតគឺដោយសារលោកប៉ែនខុនគាត់បានថតរូបភាពស្តីពីសកម្មភាពរបស់ក្រុមត្រួតពិនិត្យ ដោយកាមេរ៉ាទូរស័ព្ទ ហើយត្រូវបាននគរបាលឯកសណ្ឋានចម្រុះ ឃាត់ឲ្យឈប់និងណែនាំឲ្យចុះពីលើរថយន្តទៅជួបមេ ដែលអង្គុយនៅកៅអីក្បែរតុក្រោមដើមត្របែកព្រៃ ដូចទម្លាប់ដែលគេបានធ្វើលើអ្នកបើកបរផ្សេងៗពីមុនៗមក។
ពេលនោះក៏មានការជជែកតវ៉ាគ្នាដោយសារអ្នកាសែតសួរពីកំហុសនៃការបើកបររបស់គាតក៏មាននគរបាលចរាចរណ៍ម្នាក់រាងធាត់មិនសូវខ្ពស់សម្បុរខ្មៅ និងដុះពោះបន្តិច បានទាញកាមេរ៉ាទូរស័ព្ទមកថតវីដេអូ ហើយនិយាយបែបបច្រងែងច្រងាងចោទអ្នកកាសែតថា ជិះឡានគ្មានឈៀក គ្មានបង់ព័ន្ធផ្លូវ និងធ្វើកាយវិការមិនសមជាអ្នកកាសែតដាក់នគរបាលទៀត។ ក្នុងពេលជជែកគ្នានេះ លោកប៉ែនខុនបានអញ្ជើញនគរបាលដែលថតវីដេអូឲ្យពិនិត្យថា ឡាននេះវាខុសអីខ្លះ តែគាត់បែរជាអត់ហ៊ានបែរកាមេរ៉ាមកថតទេ ព្រោះឡានមានឯកសារគ្រប់គ្រាន់។
ក្នុងពេលជជែកវែកញែកនេះ នគរបាលចរាចរណ៍និយាយល្មមទេ តែនគរបាលឯកសណ្ឋានជានគរបាលរដ្ឋបាលសម្តីខ្លាំងជាង ដែលតាមច្បាប់ គឺគ្មានសិទ្ធិទាល់តែសោះក្នុងការបញ្ជាឲ្យយានយន្តឈប់នោះ លើកលែងតែករណីរថយន្តមានបទល្មើសព្រហ្មទណ្ឌ ទើបគេចេញអន្តរាគមន៍បាន។ នគរបាលរដ្ឋបាលដែលធ្វើការជាមួយក្រុមនគរបាលចរាចរណ៍ កន្លងមកមិនចំពោះក្រុមខាងលើនេះទេ គឺបានបង្កបញ្ហាច្រើនណាស់ ជាពិសេសគឺដេញចាប់ជម្រិតយកប្រាក់ពីក្មេងៗដែលជិះម៉ូតូមិនបានពាក់មួក ឬអត់ស្លាកលេខ។
លោកព្រាប ច័ន្ទវិបុល ប្រធាននាយកដ្ឋានដឹកជញ្ជូនផ្លូវគោក និងជាអ្នកតាក់តែងច្បាប់ចរាចរណ៍ផ្លូវគោក និយាយឲ្យដឹងនៅថ្ងៃទី១៩ ខែតុលាថា នៅក្នុងអនុក្រឹត្យស្តីពីការផាកពិន័យត្រង់មាត្រាទី៦ មិនបានចែងច្បាស់អំពីការប្រើប្រាស់កាមេរ៉ាទូរស័ព្ទ និងទូរស័ព្ទទេ គ្រាន់តែហាមប្រើប្រាស់ទូរស័ព្ទក្នុងពេលបើកបរ។ នៅក្នុងច្បាប់ចរាចរណ៍ផ្លូវគោកត្រង់ជំពូកបី មាត្រាទី៨ ចំណុច៦ បានចែងថា ហាមប្រើប្រាស់ទូរស័ព្ទនៅពេលកំពុងបើកបរយានជំនិះ ដោយគ្មានឧបករណ៍សំឡេងភ្ជាប់ទំនាក់ទំនង។ ឯនៅក្នុងអនុក្រឹត្យស្តីពីការផាកពិន័យត្រង់ចំណុចអក្សរ”ជ” បានសរសេរថា អ្នកបើកបរយានយន្តប្រើប្រាស់ទូរស័ព្ទគ្មានឧបករណ៍សំឡេងភ្ជាប់ទំនាក់ទំនងនៅពេលកំពុងបើកបរ ត្រូវពិន័យជាប្រាក់ ២៥.០០០រៀល។ តែគ្មានចំណុចណាមួយដែលហាមមិនឲ្យប្រើប្រាស់កាមេរ៉ាទូរស័ព្ទនោះទេ។
លោកឧត្តមសេនីយឯក រុន រដ្ឋវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ ក្រសួងមហាផ្ទៃ និយាយឲ្យដឹងនៅថ្ងៃទី១៩ខែតុលាថា ប្រើប្រាស់កាមេរ៉ាថតរូបក្នុងពេលកំពុងបើកបរ គឺមិនខុសច្បាប់ទេ ហើយថតនគរបាលធ្វើការនៅលើផ្លូវសាធារណៈនោះក៏មិនខុសដែរ។ នគរបាលចរាចរណ៍ធ្វើសកម្មភាពត្រួតពិនិត្យនៅលើផ្លូវសាធារណៈ គឺជាបុគ្គលសាធារណៈ ពលរដ្ឋណាក៏អាចថតសកម្មភាពគេបានដែរ។ នគរបាលដែលរារាំងមិនឲ្យគេថតរូប គឺជានគរបាលខិលខូចខ្លាចគេថតបានសកម្មភាពមិនល្អរបស់ខ្លួន និងរឹតតែខុសធ្ងន់ថែមទៀតនៅពេលដកកាមេរ៉ារបស់គេ និង លុបរូបរបស់គេចោលនោះ។ នគរបាលចរាចរណ៍ចុះធ្វើការតាមផ្លូវសព្វថ្ងៃនេះ ពិបាកក្នុងគ្រប់គ្រងណាស់ ហេតុនេះហើយទើបបានជានាយកដ្ឋាននគរបាលចរាចរណ៍សណ្តាប់ធ្នាប់ បង្កើតហតឡាញ់ (Hot Line) ថ្មីមួយទៀត សម្រាប់ប្រជាពលរដ្ឋផ្តល់ព័ត៌មានឲ្យបានទាន់ពេលពីមន្ត្រីនគរបាលណា នៅកន្លែងណា ដែលបានអនុវត្តខុសឆ្គង។
លោក ចេវ ហាក់ ប្រធានការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ និយាយឲ្យដឹងនៅថ្ងៃទី១៩ខែតុលាថា កម្លាំងត្រួតពិនិត្យការអនុវត្តច្បាប់ចរាចរណ៍នៅលើផ្លូវជាតិលេខ៦អា ត្រង់ចំណុចវត្តខ្ទរ ជាកម្លាំងរបស់ខណ្ឌជ្រោយចង្វា មិនមែនជាកម្លាំងរបស់ក្រុងទេ។ ក្រុមដែលបានចុះធ្វើការនៅលើផ្លូវនេះ ពិបាកក្នុងការគ្រប់គ្រងណាស់។
លោកឧត្តមសេនីយ៍ ហេង ចាន់ធារី ស្នងការរង នៃស្នងការដ្ឋាននគរបាលរាជធានីភ្នំពេញ ទទួលផែនចរាចរណ៍ បាន ទទួលស្គាល់ ថា កម្លាំងនគរបាលចុះធ្វើការត្រួតពិនិត្យការអនុវត្តច្បាប់ចរាចរណ៍ នៅតាមដងផ្លូវសាធារណៈសព្វថ្ងៃនេះ មិនមែនតែនៅរាជធានីទេ ដែលបង្កឲ្យមានបាតុភាពដោយសារតែការធ្វើមិនបានត្រឹមត្រូវតាមច្បាប់៕