ក្រចេះ៖ លោកយាយ បុត្រ នឿន អាយុ ៨៩ ឆ្នាំ រស់នៅភូមិកំបោរ ឃុំគោលាប់ ស្រុកចិត្របុរី ខេត្តក្រចេះ ដែលសព្វថ្ងៃលោកយាយកំពុងរស់នៅតែម្នាក់ឯង និងគ្មានទីពឹង ។
ជីវិតនិងការរស់នៅរបស់លោកយាយ បុត្រ នឿន គឺអាស្រ័យពឹងផ្អែកពីការចែករំលែកម្ហូបអាហាររបស់អ្នកជិតខាង ហើយរយៈពេលកន្លងមក លោកយាយធ្លាប់ទទួលបានការយកចិត្តទុកដាក់គិតគូរអំពីសុខទុក្ខ និងសុខភាពផងដែរ អំពីសំណាក់អាជ្ញាធរខេត្ត ស្រុក និងអាជ្ញាធរមូលដ្ឋាន ក្រុមយុវជនសហភាពសហពន្ធ័យុវជនកម្ពុជា ក្រុមចលនាយុវជនកម្ពុជា ក ១៥៧ ក្រុមយុវជនស្រឡាញ់សន្តិភាព និងសមាគមនិស្សិតអាហារូបករណ៍សម្ដេចអគ្គមហាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី បានឧបត្ថម្ភបន្តបន្ទាប់នូវអំណោយមនុស្សធម៌មានសម្ភារៈប្រើប្រាស់ និងគ្រឿងឧបភោគបរិភោគជាដើម ។
ជាក់ស្ដែងកាលពីថ្ងៃទី១៨ ខែតុលា ឆ្នាំ២០១៦នេះ ក្រុមយុវជនសហភាពសហព័ន្ធយុវជនកម្ពុជា និងសមាគមនិស្សិត អាហារូបករណ៍ សម្ដេច អគ្គមហាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ដឹកនាំដោយលោក សែម ម៉ារឌី សមាជិកអចិន្ត្រៃយ៍នៃយុវជនសហភាពសហព័ន្ធយុវជនកម្ពុជាខេត្តក្រចេះ បាននាំយកអំណោយ និងសម្ភារៈ ថវិការមួយចំនួន ជូនដល់លោកយាយ បុត្រ នឿន ។
លោក សែម ម៉ារឌី បានឲ្យដឹងថា កន្លងមក ក្រុមយុវជន ក៏ដូចជាសមាគមន៍និស្សិតអាហារូបករណ៍សម្តេច បាននាំយកអំណោយ និង ម្អូបអាហារមកជូនគាត់ នៅពេលបុណ្យភ្ជុំបិណ្ឌ និងបានរាយការជូនថ្នាក់លើ ។ ពេលនោះដែរ លោកយាយ ក៏បានស្នើរសុំនូវ បាឡុង ដែលជាសម្ភារៈសម្រាប់ជីវិតចុងក្រោយរបស់លោកយាយ ។ ក្រោយពីទទួលបាននូវដំណឹងនេះ លោក វ៉ា ថន អភិបាលរងខេត្ត និងជាប្រធានសហភាពសហព័ន្ធយុវជនកម្ពុជាខេត្តក្រចេះ បានចាត់តាំងឲ្យក្រុមការងារបានចុះទៅដល់មូលដ្ឋានផ្ទាល់របស់លោកយាយ បុត្រ នឿន ដេីម្បីឆ្លើយតបទៅនឹងសំណូមពរចុងក្រោយរបស់លោកយាយកំសត់ទុរគតឥតទីពឹង ។
គូសបញ្ជាក់ថា តាមរយៈសកម្មភាពមនុស្សធម៌ទាំងអស់នេះ បានឆ្លុះបញ្ចាំងឲ្យឃើញកាន់តែច្បាស់ពីការដឹកនាំរបស់រាជរដ្ឋាភិបាលកម្ពុជា ដែលមានសម្ដេចអគ្គមហាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចគិតិ្តព្រឹទ្ធបណ្ឌិត ដែលលោកទាំងពីរតែងតែគិតគូរនិងយកចិត្តទុកដាក់ខ្ពស់ចំពោះ សុខទុក្ខ និងការរស់នៅ របស់ប្រជាពលរដ្ឋទូទាំងប្រទេសកម្ពុជា ៕ កិៈ ខន
