ក្រចេះ៖ ឧបករណ៍នេសាទខុសច្បាប់ជាច្រើនប្រភេទ មានដូចជាស្បៃមុង សាច់អួនក្រលាញឹក និងដាយចាប់ត្រី ត្រូវបានកម្លាំងជំនាញ នៃខណ្ឌរដ្ឋបាលជលផលក្រចេះ ចុះបង្ក្រាបដូចភ្លៀងរលឹម ។
ការចុះបង្ក្រាបខាកលើនេះ គឺធ្វើឡើងក្រោមការចង្អុលបង្ហាញពីលោកនាយអធិការដ្ឋានរដ្ឋបាលជលផលមេគង្គ និងលោក សៀន គិន នាយខណ្ឌ ជលផលក្រចេះ ដោយ សហការជាមួយមន្ត្រីអធិការដ្ឋានរដ្ឋបាលជលផលមេគង្គ និងគណៈបញ្ជាកាការឯកភាពស្រុកព្រែកប្រសព្វ ដឹកនាំដោយលោកអភិបាលរងស្រុក កែម ហៀង ព្រមទាំងសហគមន៍នេសាទ បានចុះប្រតិបត្តិការចាប់បង្ក្រាបកាលពីថ្ងៃទី១៦/១៧ ខែតុលា ឆ្នាំ២០១៦កន្លងមក ស្ថិតនៅ ចំនុចព្រែករកា ព្រែក ទួលសាលា បឹងដែង ក្នុងឃុំតាម៉ៅ ស្រុកព្រែកប្រសព្វ ខេត្តក្រចេះ ។
លោក ម៉ុក ពន្លក នាយរងខណ្ឌ រដ្ឋបាលជលផលក្រចេះ ដែលបានដឹកនាំកម្លាំងមន្ត្រីជំនាញចុះសហការបង្ត្រាបបទល្មើសនេសាទនាពេលនោះ បានអោយដឹងថា ក្នុងប្រតិបត្តិការ នេះកម្លាំងសមត្ថកិច្ចចម្រុះបានធ្វើការចាប់ឃាត់ និងបំផ្លាញចោលនូវវត្ថុតាងនៃបទល្មើស មួយចំនួនរួមមាន ១, រឹបអូសដាយចាប់ត្រីដាក់តាមដងព្រែករកា ចំនួន០៣វង់ ២, របាំងស្បៃមុងចំនួន១០ខ្សែ ប្រវែងជិត១ពាន់ម៉ែត្រ និងលូស្បៃមុងចំនួន១០មាត់លូ ៣, របាំងសាច់អួនក្រលាញឹក តូចជាង១,៥សង់ទីម៉ែត្រចំនួន១១ខ្សែ ប្រវែងជិត៨០០ម៉ែត្រ ៤, លបធ្វើពីសាច់អួនក្រលាញឹកតូចជាង១,៥សង់ទីម៉ែត្រ មានចំនួន១៤គ្រឿង ៥, កាប់បំផ្លាញចោលបង្គោលចម្រឹងឬស្សីចំនួនជាង៣០០ដើម និងបានចាក់លែងត្រីចម្រុះចូលក្នុងបឹងធម្មជាតិជាង១០០គក្រ ផងដែរ ។
លោកនាយរងខណ្ឌបានឲ្យដឹងបន្តថា កិច្ចសហការរវាងមន្ត្រីជំនាញ និងអាជ្ញាធរស្រុកចុះបង្ក្រាបបទល្មើសនេសាទ នៅពេលនេះ គឺមានសារៈប្រយោជន៍ ២យ៉ាង ដែលជាគោលបំណងចង់បានរបស់ប្រជាពលរដ្ឋរស់នៅក្នុងតំបន់នោះ រួមមាន ទី១៖ លុបបំបាត់ចោលនូវឧបករណ៍នេសាទល្មើសច្បាប់ដូចជាស្បៃមុង និងសាច់អួនក្រលាញឹកដែលវាបាន បំផ្លិចបំផ្លាញធនធានជលផលយ៉ាងធ្ងន់ធ្ងរ ។ ម្យ៉ាងវិញទៀតគឺអាចធ្វើឲ្យហ្វូងធំតូចចរាចរ ចេញទៅទន្លេបានស្រួលផង។ ទី២៖ ឆ្លើយតបបានទាន់ពេលវេលានូវតម្រូវការរបស់ប្រជាពលរដ្ឋក្នុងការ បង្កបង្កើនផល ពិសេសការធ្វើស្រែប្រាំង និងដាំបន្លែបង្កាផ្សេងៗ ព្រោះតែទឹករនាមអាចហូរទៅទន្លេបានលឿន មិនបណ្តាលឲ្យចាល់ឡើយ ។
លោក សៀន គិន នាយខណ្ឌ រដ្ឋបាលជលផលក្រចេះ បានបញ្ជាក់ឲ្យដឹងថា កិច្ចការទាំងអស់ខាងលើគឺមានសារសំខាន់ខ្លាំងណាស់ ដូច្នេះលោកបានជំរុញអោយមន្ត្រីជំនាញក្រោមឱវាទទាំងអស់ត្រូវតែបង្កើនកិច្ចសហការអោយបានល្អជាមួយអាជ្ញាធរដែនដីគ្រប់ថ្នាក់ ជាពិសេសគណៈបញ្ជាការឯកភាពស្រុក សហគមន៍មូលដ្ឋាន និងប្រជាពលរដ្ឋ ដើម្បីចូលរួមថែរក្សា ការពារ អភិរក្សធនធានជលផលអោយនៅស្ថិតស្ថេរគង់វង្សសម្រាប់ពេលបច្ចុប្បន្ន និងថ្ងៃអនាគត ជាពិសេស គឺដើម្បីបំពេញតម្រូវការជាម្ហូបអាហារប្រចាំថ្ងៃសម្រាប់ប្រជាជនកម្ពុជាយើងតាមរយៈការនេសាទដោយប្រើប្រាស់ឧបករណ៍នេសាទគ្រួសារ ។
គូសបញ្ជាក់ថា នៅក្នុងរយៈពេល ៩ខែ ឆ្នាំ២០១៦ គិតចាប់ពីដើមខែមករា រហូតដល់ថ្ងៃទី១៨ ខែតុលានេះ សមត្ថកិច្ចជំនាញជលផល សហកាជាមួយអាជ្ញាធរមូលដ្ឋាន អធិការដ្ឋានរដ្ឋបាលជលផលមេគង្គ និងកម្លាំងប្រដាប់អាវុធទាំងបីប្រភេទ ចុះបង្ក្រាបបទល្មើសនេសាទបានចំនួនសរុប ៣៥ករណី ក្នុងនោះកាប់ដុតបំផ្លាញ់ចោលរបាំងស្បៃមុង និងសាច់កាវ ប្រវែង ១១៦៥០ម៉ែត្រ លូស្បៃមុង ចំនួន ១៤៥មាត់លូ បង្គោលចម្រឹង ២១៣៤ដើម និងចាក់លែងកូនត្រីចូលបឹងធម្មជាតិចំនួន ៣៨០គីឡូក្រាម ។ ដុតបំផ្លាញ់ចោលក្បាលឆក់ ២គ្រឿង មង ១៧៦ត្បូង ប្រវែង៣២៩ម៉ែត្រ សម្រាស់ចំនួន ៩គំនរ ស្មើនឹង៩៨ម៉ែត្រ លប ចំនួន ៥គ្រឿង របាំងព្រួលចំនួន ៨ផ្ទាំង ប្រវែង៥០ម៉ែត្រ មងព្រយុង ២១គ្រឿង ប្រវែង ៦៦០ម៉ែត្រ ។ រក្សាទុកឧបករណ៍ក្បាលឆក់ ចំនួន ៣គ្រឿង អាគុយ ២គ្រឿង ដងឆក់ ២គ្រឿង ទូកម៉ាស៊ីន ១គ្រឿង ឈ្នក់ចំនួន ១៦គ្រឿង និងមងព្រយុង ៦គ្រឿង ស្មើនឹង ៣៦០ម៉ែត្រ ៕
