ខេត្តក្រចេះ ៖ រថយន្តដឹកឈើក្រហមប្រភេទ លេខ២ ចំនួន០៣គ្រឿងត្រូវបានសង្កាត់រដ្ឋបាលព្រៃឈើឆ្លូង សហការជាមួយកម្លាំងអធិការ ដ្ឋាននគរបាលស្រុក និងកម្លាំងយោធាស្រុកឆ្លូង ចុះប្រតិបត្តិការធ្វើការឃាត់ចាប់ទាំងយប់ព្រោះតែរថយន្តទាំងនេះលួចដឹកឈើ លោតឆ័ត្រគ្មានលិខិតអនុញ្ញាត ពីស្ថាប័នជំនាញ ។
បើយោងតាមការអោយដឹងពីមន្ត្រីជំនាញនៃសង្កាត់រដ្ឋបាល ព្រៃឈើឆ្លូង បញ្ជាក់ថា ការចុះឃាត់ចាប់រថយន្តដឹកឈើខាងលើគឺសមត្ថកិច្ចចម្រុះបានធ្វើឡើងនៅវេលា ម៉ោង៨នឹង២០នាទីយប់រហូតដល់ម៉ោង១១យប់ថ្ងៃទី១៣ ខែតុលា ឆ្នាំ២០១៦ ទើបឃាត់ ចាប់បាននៅចំនុចព្រែកឬស ភូមិហាន់ជ័យ១ ឃំុហាន់ជ័យ ស្រុកឆ្លូង ខេត្តក្រចេះ ។
លោកបានបន្តទៀតថា ភ្លាមៗក្រោយពីទទួលបានព័ត៏មាន ពីប្រជាពលរដ្ឋដែលរាយការណ៍មកទាក់ទងនឹងរថយន្តដឹកឈើល្មើសច្បាប់ទាំង៣ខាងលើ កម្លាំងជំនាញក៏បានស្នើរសំុកិច្ចសហការពីសមត្ថកិច្ចពាក់ព័ន្ធមានដូចជាកម្លាំងនគរបាល និងយោធាស្រុកឆ្លូងដើម្បីចុះពួនស្ទាក់ ចាប់បាននៅត្រង់ចំនុចខាងលើតែម្តង ។
លោក ផូង ឃុនឡាយ នាយ សង្កាត់រដ្ឋបាលព្រៃឈើឆ្លូង បានបញ្ជាក់អោយដឹងថា ឈើដែលសមត្ថកិច្ចចម្រុះឃាត់ បានពេលនេះគឺជាប្រភេទឈើលេខ២ អារជាក្តា ប៉ុន្តែនៅមិនទាន់មានតួរលេខជាក់លាក់នៅឡើយទេ ដោយរងចាំធ្វើការវាស់វែង។
លោកនាយសង្កាត់បានអោយដឹងបន្តថា បច្ចុប្បន្នរថយន្តដឹកឈើទាង៣គ្រឿងនេះ ត្រូវបានសមត្ថកិច្ចចម្រុះនាំមករក្សាទុកនៅក្នុងស្នាក់ការសង្កាត់រដ្ឋបាលព្រៃឈើឆ្លូងដើម្បីធ្វើការវាស់វែង។
ក្រោយពីវាស់វែង និងកសាងសំនំុឯកសាររួចរាល់ លោកនឹងបិទប្រកាសទុក រយៈពេល៣០ថ្ងៃដើម្បីឲ្យម្ចាស់ឈើចូលខ្លួនមកធ្វើការបង់ពិន័យតាមច្បាប់ ប៉ុន្តែក្នុងរយៈនេះ ប្រសិនបើម្ចាស់ឈើមិនចូលខ្លួនមកបង់ពិន័យទេ មន្ត្រីជំនាញនឹងសំុគោលការណ៍ពីថ្នាក់លើដើម្បីចាត់ការបន្តតាមច្បាប់ស្តីពីព្រៃឈើ ៕