កាលពីថ្ងៃទី ៦ ខែសីហា ឆ្នាំ២០១៤ នៅសាលប្រជុំសាលាខេត្តបាត់ដំបង បានរៀបកម្មវិធីសិក្ខាសាលាផ្សព្វ ផ្សាយលិខិតបទដ្ឋានគតិយុត្តិពាក់ព័ន្ធ និងការគ្រប់គ្រងធនធានមនុស្ស និងការផ្តល់សេវារដ្ឋបាលថ្នាក់ក្រោមជាតិ ក្រោមអធិបតីភាព ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង ។
ក្នុងមតិស្វាគមន៍ ឯកឧត្តម សុខ គង់ អភិបាលរងខេត្តបានមានប្រសាសន៍ថា អង្គសិក្ខាសាលានេះ មានគោល បំណងផ្សព្វផ្សាយឱ្យបានយល់ជ្រួតជ្រាបនូវលិខិតបទដ្ឋានគតិយុត្តិមួយចំនួន ដែលពាក់ព័ន្ធទៅនឹងការគ្រប់គ្រងធន ធានមនុស្ស និងផ្តល់សេវារដ្ឋបាល នៅរដ្ឋបាលថ្នាក់ក្រោមជាតិ ជូនដល់ក្រុមប្រឹក្សាខេត្ត គណៈអភិបាលខេត្ត នាយករដ្ឋបាលនាយកទីចាត់ការ ប្រធានការិយាល័យ ប្រធានមន្ទីរ អង្គភាពនានា អភិបាល អភិបាលរងស្រុក ចំណុះឱ្យសាលាខេត្តទាំងមូលដើម្បីឱ្យពួកគេទៅផ្សព្វផ្សាយបន្តដល់ថ្នាក់ ឃុំ សង្កាត់ ភូមិ ។
ឯកឧត្តម ច័ន្ទ សុផល បានមានប្រសាសន៍ថា ការអនុវត្តន៍លិខិតបទដ្ឋានគតិយុត្តិកន្លងមក នៅមិនទាន់ បានកំណត់ជាគោលការណ៍នៅឡើយទេ ដែលជាហេតុនាំឱ្យការចាត់ចែងការគ្រប់គ្រង និងការប្រើប្រាស់ធនធាន មនុស្ស ដែលបំពេញការងារនៅក្នុងដែនសមត្ថកិច្ចរបស់ខ្លួន មានភាពមិនច្បាស់លាស់ ។ ដូចនេះហើយបានជាខេត្ត ត្រូវរៀបចំឡើង ក្នុងគោលបំណងធានានូវការអនុវត្តលិខិតបទដ្ឋានគតិយុត្តិខាងលើនេះ ប្រកបដោយត្រឹមត្រូវ និង មានប្រសិទ្ធភាពខ្ពស់ ។
ក្នុងការអនុវត្តន៍ជាក់ស្តែងអំពីការផ្តល់សេវានេះ ត្រូវខិតខំអនុវត្តឱ្យស្របតាមគោលការណ៍និតិវិធី និងទម្រង់បែបបទកំណត់ពិសេសត្រូវអនុវត្តន៍ឱ្យបាននូវកម្រៃសេវា និងការផ្តល់សេវាឱ្យបានទាន់ពេលវេលា តាមការកំណត់របស់ប្រកាសអន្តរក្រសួង ។
ឯកឧត្តម ច័ន្ទ សុផល បានបញ្ជាក់បន្ថែមថា ដើម្បីធានាឱ្យការអនុវត្តន៍នូវលិខិតបទដ្ឋានទាំងនេះ ឱ្យបានត្រឹម ត្រូវ និងប្រកបដោយប្រសិទ្ធភាពខ្ពស់ ខ្ញុំ
សូមឯកឧត្តម លោកជំទាវ លោក លោកស្រី ចូលរួមយោបល់ឱ្យបានផុស ផុល និងសួរបញ្ជាក់ឱ្យបានច្បាស់លាស់ជៀសវាងការយល់ឃើញ ឬបកស្រាយផ្សេងពីខ្លឹមសារដើម ដែលជាមូល ហេតុនាំឱ្យមានកំហុសក្នុងពេលអនុវត្តជាក់ស្តែង ។
នៅក្នុងថ្ងៃនេះផងដែរ បើយោងតាមសម្តីពីមន្ត្រីមួយចំនួន ដែលមកចូលរួមធ្វើជាសិក្ខាកាមបានប្រាប់ដំណឹង ភ្នំពេញ ក្នុងលក្ខខណ្ឌមិនបញ្ចោញឈ្មោះថា តាំងពី ឯកឧត្តម ច័ន្ទ សុផល ឡើងមកធ្វើជាអភិបាលខេត្តបាត់ដំបង គេមិនដែលឃើញបើកយុទ្ធនាការអភិវឌ្ឍន៍ខេត្តឱ្យបានជឿនលឿន ឬក៏ចុះសួរសុខទុក្ខប្រជាពលរដ្ឋក្រីក្រដល់មូល ដ្ឋានម្តងណាឡើយ ។ ឃើញថា ងាកៗបើកសិក្ខាសាលាផ្សព្វផ្សាយច្បាប់បទដ្ឋានគតិយុត្តិ បើមិនអញ្ចឹងទេ ធ្វើការដោះដូរតួនាទីមន្ត្រីរាជការ ក្រោមឱវាទដែលទង្វើទាំងនេះធ្វើឱ្យមន្ត្រីរាជការដែលបំរើការងារចំណុះឱ្យសាលា ខេត្តគេសង្ស័យពាក់ព័ន្ធ នឹងអំពើពុករលួយ ។ ម្យ៉ាងទៀតងាកៗហៅឡើងមករៀនសូត្រធ្វើដូចជា អភិបាល អភិបាលរងស្រុក ឬក៏មន្ត្រីរាជការទូទាំងខេត្តបាត់ដំបង ដែលចូលមកបម្រើការងារសុទ្ធសឹងជាមនុស្សមិនបានរៀន សូត្រទាល់តែសោះមើលទៅ ? ដែលការងារទាំងអស់នេះគេអនុវត្តរាប់សិបឆ្នាំមកហើយ ៕
