ខេត្តប៉ៃលិន៖ ព្រឹកថ្ងៃទី១១ ខែតុលា ឆ្នាំ២០១៦ គណ:កម្មាធិការសាខាកាកកបាទក្រហមកម្ពុជាខេត្តប៉ៃលិន ដឹកនាំដោយលោក សៅ សារ៉ាត់ អនុប្រធានគណ:កម្មាធិការសាខាកាកកបាទក្រហមកម្ពុជាខេត្ត និងលោក សម កុសល នាយក នាយកដ្ឋានធនធានមនុស្សកាកកបាទក្រហមកម្ពុជា បានអញ្ជើញនាំយកអំណោយមនុស្សធម៌របស់សាខាកាកបាទក្រហមកម្ពុជាខេត្តប៉ៃលិន ទៅឧបត្ថម្ភដល់ជនរងគ្រោះ ដែលគ្រោះថ្នាក់ដោយសារជាន់គ្រាប់មីន បណ្តាលឲ្យដាច់ជើងស្តាំ រងរបួសធ្ងន់ សំរាក់ព្យាបាលនៅមន្ទីរពេទ្យបង្អែកខេត្តប៉ៃលិន ។
អំណោយដែលសាខាកាកកបាទក្រហមកម្ពុជាខេត្ត ផ្តល់ជូននាពេលនោះ រួមមាន៖ អង្ករសែនក្រអូបចំនួន៥០គក្រ ,ទឹកស៊ីវ១យួរ ,ទឹកត្រី១យួរ ,មី២កេះ ,ទឹកសុទ្ធអង្គរពូរ៉ូ៤កេះ និងថវិកា១លានរៀល ។
សូមបញ្ជាក់ថា ៖ កាលពីវេលាម៉ោង០៧និង៥០នាទីព្រឹកថ្ងៃទី១១ ខែតុលា ឆ្នាំ២០១៦ មានករណីគ្រោះថ្នាក់ដោយសារគ្រាប់មីន(មីនស្មាច់) ទៅលើបុរសម្នាក់មានឈ្មោះគឹម ភឿន អាយុ៤៦ឆ្នាំ រស់នៅក្នុងភូមិបុស្អំ ឃុំស្ទឹងកាច់ ស្រុកសាលាក្រៅខេត្តប៉ៃលិន ខណៈបុរសរូបនោះទៅដើររកជីកទំពាំងយកមកហូប ព្រមទាំងលក់ នៅចំការខាងក្រោយផ្ទះចំងាយ១០០០ម៉ែត្រ នៅក្នុងភូមិ ឃុំ រស់នៅខាងលើ បណ្តាលឲ្យគ្រោះថ្នាក់ដាច់ជើងស្តាំម្ខាង និងរបួសសព្វសាច់ បច្ចុប្បន្នជនរងគ្រោះត្រូវបានក្រុមគ្រួសារបញ្ជូនមកព្យាបាលនៅមន្ទីរពេទ្យបង្អែកខេត្តតាមរយ:រថយន្តសង្គោះរបស់ការិយាល័យតំណាងរាស្ត្រមណ្ឌល់ប៉ៃលិន ផងដែរ ៕
អត្ថបទ ទូច សុខន
