ក្រចេះ៖ សម្ព័ន្ធក្រុមគ្រូពេទ្យនៃសហភាពសហព័ន្ធយុវជនកម្ពុជា សហការជាមួយចលនាយុវជន ក១៥៧ សាខាខេត្តក្រចេះ បានចុះមកពិនិត្យព្យាបាលជម្ងឺ ជូនប្រជាពលរដ្ឋ យុវជន និងកុមារ នៅភូមិ/ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ កាលពីថ្ងៃ ០៩ ខែ តុលា ឆ្នាំ២០១៦ ។
ការចុះពិនិត្យព្យាបាលជម្ងឺជូនប្រជាពលរដ្ឋ នៅស្រុកព្រែកប្រសព្វពីសំណាក់សម្ព័ន្ធគ្រូពេទ្យ នៅព្រឹកនោះ គឺធ្វើឡើងក្រោមការដឹកនាំរបស់ឯក ឧត្ដម ហេង សុខគង់ រដ្ឋលេខាធិការក្រសួងឧស្សាហកម្ម និងជាប្រធានក្រុមគ្រូពេទ្យស្ម័គ្រចិត្ត ហើយក៏មានវត្តមានចូលរួមពីលោក វ៉ា ថន អភិបាលលរង ខេត្តក្រចេះ និងជាប្រធានសហភាពសហព័ន្ធ យុវជនកម្ពុជា សហការជាមួយ លោក មិត្ត ឆៃយុត្តិ ប្រធានបានចលនាយុវជន ក ១៥៧ សាខាខេត្តក្រចេះ ។
ក្រុមគ្រូពេទ្យស្ម័គ្រចិត្ត សរុបមានចំនួន ប្រមាណ២០០ នាក់ បានធ្វើការពិនិត្យ និងព្យាបាលជំងឺទូទៅជូនប្រជាពលរដ្ឋក្រីក្រ ដោយមិនគិតថ្លៃ និងមិនប្រកាន់អំពីនិន្នាការឬគណបក្សនយោបាយឡើយ ។
ឯកឧត្ដម ហេង សុខគង់ បានអោយដឹងថា ក្រុមគ្រូពេទ្យស្ម័គ្រចិត្តរបស់សហភាពសហព័ន្ធយុវជនកម្ពុជា បានចុះពិនិត្យ និងព្យាបាលជូនប្រជាពលរដ្ឋនាពេលនោះ មានទាំងលោកវេជ្ជបណ្ឌិត ជំនាញល្បីៗដែលមានបទពិសោធន៍យូរឆ្នាំ និងមានបំពាក់ទៅដោយបរិក្ខារពេទ្យទំនើបៗ និងឱសថមានគុណភាពខ្ពស់។ កាយវិកាទាំងនេះ គឺជាសកម្មភាព មនុស្សធម៌ក្នុងការធ្វើឱ្យសុខភាពប្រជាពលរដ្ឋនៅស្រុកព្រែកប្រសព្វកាន់តែល្អប្រសើរឡើងបន្ថែមទៀត។
ឯកឧត្ដមបញ្ជាក់ថា ក្រុមគ្រូពេទ្យទទួលការព្យាបាលជំងឺ១៤មុខ ដែលរួមមានជំងឺទូទៅ ជំងឺបេះដូង សរសៃឈម ជំងឺមនុស្សចាស់ ជំងឺភ្នែក វះកាត់ ជំងឺភ្នែក ត្រចៀក ច្រមុះនិងបំពង់ក សន្លាក់ ជំងឺកុមារ រោគស្ត្រីនិងពិនិត្យផ្ទៃពោះ ជំងឺមាត់ធ្មេញ ជំងឺផ្លូវចិត្ត កាមរោគនិងសើរស្បែក ជំងឺផ្លូវចិត្ត ពិនិត្យឈាម ព្រមទាំងផ្តល់ជូនថ្នាំពេទ្យក្រោយការព្យាបាល។
នាឱកាសនោះដែរ លោក វ៉ា ថន អភិ បាលលរងខេត្តក្រចេះ និងជាប្រធានសហភាពសហព័ន្ធ យុវជនកម្ពុជា មានប្រសាសន៍ថា ការចុះមកពិនិត្យ ព្យាបាលជំងឺប្រជាពលរដ្ឋនា ពេល នេះ គឺក្នុងគោលបំណងជួយ លើកកម្ពស់សុខុមាលភាពប្រជាពលរដ្ឋក្រីក្រនៅតាមមូលដ្ឋាន ជាពិសេសធ្វើឱ្យប្រជាពលរដ្ឋចំណេញ ពេលវេលាក្នុងការស្វែងរកសេវាសុខាភិបាល ធ្វើឱ្យប្រជាពលរដ្ឋមានសុខភាពល្អប្រសើរ ជាពិសេសគឺបាន ចូលរួមក្នុងការសន្សំសំចៃថវិកាបានមួយ ចំនួនទៀតផងដែរ។
លោក បានសំណូមពរដល់ប្រជាពលរដ្ឋនៅស្រុកព្រៃនប់ ក៏ដូច ជាស្រុកផ្សេងទៀតក្នុងខេត្តក្រចេះ អញ្ជើញមកទទួលសេវាពិនិត្យព្យាបាលពីក្រុមគ្រូពេទ្យស្ម័គ្រចិត្ត ដោយមិនប្រកាន់ពណ៌សម្បុរ និងគណបក្ស នយោបាយ គឺធ្វើយ៉ាង ណា ក្នុងការជួយពិនិត្យ ព្យាបាលជំងឺជូនប្រជាពលរដ្ឋក្រីក្រ ឱ្យមានសុខភាពល្អឱ្យបានគ្រប់គ្នា។
ជាមួយគ្នានោះ ឯកឧត្ដម ហេង សុខគង់ ក៏បានសន្យាថា នឹងនាំក្រុមគ្រួពេទ្យស្ម័គ្រចិត្តរបស់សហភាពសហព័ន្ធយុវជនកម្ពុជា ចុះជួយពិនិត្យ និងព្យាបាលជំងឺជូនប្រជាពលរដ្ឋនៅខេត្តក្រចេះបន្តទៀត៕
