ក្រចេះ៖ បើទោះបីជាកម្លាំងអាវុធហត្ថលើផ្ទៃប្រទេស សហការជាមួយកម្លាំងអាវុធហត្ថស្រុក ក្រុង និងអាវុធហត្ថខេត្តក្រចេះ ចុះធ្វើការបង្ក្រាប និងរឹបអូសបានរថយន្តដឹកបទល្មើសជាច្រើនករណីក្នុងរយៈជិតមួយខែកន្លងមកនេះយ៉ាងណាក្ដី ប៉ុន្តែបទល្មើសព្រៃឈើនៅក្នុងទឹកដីនៃខេត្តក្រចេះនៅតែមាន ។
ជាក់ស្ដែងកាលពីថ្ងៃទី០៨ ខែតុលា ឆ្នាំ២០១៦នេះ កម្លាំងអាវុធហត្ថស្រុកចិត្របុរី ដឹកនាំដោយលោក អ៊ឹម ចិត្រា មេបញ្ជាការស្រុកចិត្របុរី សហការជាមួយកម្លាំងអាវុធហត្ថលើផ្ទៃប្រទេស ចុះប្រតិបត្តិការចាប់ឃាត់រថយន្តម៉ាកអ៊ីណូរ៉ា ពណ៌ត្រេអ៊ី គ្មានស្លាកលេខ០១គ្រឿង ដឹកឈើប្រណិតប្រភេទធ្នង់ល្មើសច្បាប់ នៅតាមដងផ្លូវជាតិលេខ៧ ត្រង់ចំណុច ភូមិដីសម្បទានកាំពី ឃុំសំបុក ស្រុកចិត្របុរី ខេត្តក្រចេះ ។
លោក អ៊ឹម ចិត្រា មេបញ្ជាការអាវុធហត្តស្រុកចិត្របុរី បានឲ្យដឹងថា ការចុះប្រតិបត្តិការបង្គ្រាបបទល្មើសខាងលើ គឺកម្លាំងអាវុធហត្ថចម្រុះ បានធ្វើការចុះត្រួតពិនិត្យតាមដងផ្លូវជាតិហើយក៏ប្រទះឃើញ រថយន្តសង្ស័យមួយគ្រឿង មានដឹកបទល្មើស ភ្លាមនោះសមត្ថកិច្ចក៏បានឃាត់ និងធ្វើការឆេកឆេរឃើញសុទ្ធតែឈើប្រណិតប្រភេទធ្នង់ ហើយក៏សម្រេចធ្វើការឃាត់ចាប់តែម្តង ។
លោក បានបន្តឲ្យដឹងថា ក្នុងការឃាត់ចាប់រថយន្តដឹកឈើល្មើសច្បាប់ខាងលើ គឺសមត្ថកិច្ចបានធ្វើការឃាត់ខ្លួនមនុស្ស២នាក់ ម្នាក់ជាតៃកុងរថយន្តមានឈ្មោះ នៅ ធារ៉ា ភេទប្រុស អាយុ ២៨ឆ្នាំ ទីលំនៅឃុំស្នួល ស្រុកស្នួល និងម្នាក់ទៀតជាម្ចាស់ឈើ មានឈ្មោះ ថន ប៊ុនធា ហៅ ធាបាក់ ភេទប្រុស អាយុ ៤៦ឆ្នាំ រស់នៅភូមិមានជ័យ ឃុំស្រែចារ ស្រុកស្នួល ខេត្តក្រចេះ ជាប្អូនប្រុសបង្កើតរបស់ឈ្មួញឈើល្បីឈ្មោះម្នាក់ ហៅ ធីបាញ់ ។
ប៉ុន្តែបើយោងតាមចម្លើយសារភាពរបស់ឈ្មោះ ថន ប៊ុនធា ហៅ ធាបាក់ បានឲ្យដឹងថា ឈើប្រណិតទាំងនោះ គឺជាកម្មសិទ្ធរបស់ថៅកែឈើឈ្មោះ ឈី រស់នៅភូមិកោះខ្ញែរ ឃុំអូរគ្រៀង ស្រុកសំបូរ ខេត្តក្រចេះ ចំណែកឯខ្លួនគឺជាម្ចាស់រថយន្ត គ្រាន់តែស៊ីឈ្នួលដឹកជញ្ជូនឈើឲ្យឈ្មោះ ឈី នៅកោះខ្ញែរតែប៉ុណ្ណោះ ។
លោក អ៊ឹម ចិត្រា បានបញ្ជាក់ថា បច្ចុប្បន្នទាំងរថយន្ត ទាំងឈើល្មើសច្បាប់ និងមនុស្ស ត្រូវបានកម្លាំងអាវុធហត្ថ កសាងសំនុំឯកសារ និងបញ្ជូនទៅអោយជំនាញរដ្ឋបាលព្រៃឈើ ដើម្បីចាត់ការបន្តតាមច្បាប់ស្តីពីព្រៃឈើ ៕ កិះ ខន
