ប្រទេសថៃ ៖ ទីតាំងផលិតម្ស៉ៅកាហ្វេ ណែសឡេ និងគ្រឿងឧបភោគ ណែសឡេក្លែងក្លាយដ៏ធំមួយ ត្រូវបានកំលាំងជំនាញ សហការជាមួយក្រុមតម្រួតថៃ ធ្វើការបង្ក្រាបព្រមទាំងបានដកហូតនូវសម្ភារៈពាក់ព័ន្ធជាច្រើនប្រភេទ ខណៈដែលពួកគេលួចសំងំផលិតកាហ្វេ ណែសឡេ ក្លែងក្លាយនេះ ព្រមទាំងបានចែកចាយទៅលើទីផ្សារ យ៉ាងរលូនទៅហើយបើយោងតាមរបាយការដែលកម្ពុជាថ្មីទទួលបាន បានបញ្ជាក់ថា កាលពីរសៀល ថ្ងៃទី៦ ខែតុលា ឆ្នាំ២០១៦ បន្ទាប់ពីមានការស្រាវជ្រាវយ៉ាងល្អិតល្អន់ទៅលើការផលិតទំនិញក្លែងក្លាយដែលពាក់ព័ន្ធនឹងករណីរំលោភលើកម្មសិទ្ធិបញ្ញា ទើបឈានដល់ការប្រទះឃើញទីតាំងមួយកន្លែងស្ថិតនៅឃ្លាំងលេខ៣៧ ក្នុងភូមិ៧ ឃុំប្រាក់អ៊ុដុំ ស្រុកឡាតលុំកែវ ខេត្តប៉ាធុំថានី ប្រទេសថៃ ដែលគេកំពុងលួចផលិតនូវផលិតផលដែល ពាក់ព័ន្ធនឹងគ្រឿងឧបភោគរបស់ក្រុមហ៊ុនណែសឡេ ។ ក្រោយពីបានដឹងយ៉ាងច្បាស់បែបនេះហើយ កំលាំងជំនាញបានធ្វើការសហការជាមួយនឹងក្រុមតម្រួតក្នុងមូលដ្ឋាន ចេញប្រតិបតិ្តការទៅកាន់ទីតាំងខាងលើ ព្រមទាំងបានឃាត់ខ្លួនកម្មករដែលកំពុងសំងំលួចផលិតកាហ្វេណែសឡេក្លែងក្លាយចំនួន៧នាក់ប្រុស៥នាក់ និងស្រី២នាក់ ដែលក្នុងនោះមានជនជាតិភូមា២នាក់ មានលិខិតឆ្លងដែនស្របច្បាប់ និង៥នាក់ទៀតដែលជាជនជាតិឡាវ គ្មានច្បាប់អនុញ្ញាតឡើយ ។
គួរបញ្ជាក់ដែរថាទីតាំងផលិតកាហ្វេ និងគ្រឿងឧបភោគណែសឡេក្លែងក្លាយនេះជាកម្មសិទ្ធិរបស់ឈ្មោះ អ៊ុថេន លុសា ភេទប្រុស អាយុ២៦ឆ្នាំ រស់នៅភូមិ៧ ឃុំឈៀងសែន ស្រុកឈៀងសែន ខេត្តឈៀងរ៉ាយ គឺក្នុងកិច្ចប្រតិបត្តិការនេះគេមិនបាននៅក្នុងទីតាំងផលិតនោះឡើយ ។
សមត្ថកិច្ចបានធ្វើការប្រមូលសម្ភារៈ និងដកហូតនូវរបស់របរដែលពាក់ព័ន្ធមួយចំនួនដូចជា ម៉ាសុីនច្រក ៤គ្រឿង ម៉ាសុីនលាយ៤ គ្រឿង កាហ្វេក្លែងក្លាយផ្សំរួចហើយចំនួន៤៩កេះ កាហ្វេណែសឡេ ផ្សំរួចហើយចំនួន៩ថង់ធំ ម្ស៉ៅទឹកដោះគោ ១០២ការ៉ុងកេះច្រកកាហ្វេ៤៨០កេះ ស្ករស៥ការ៉ុង ប្រអប់អូវ៉ាន់ទីន ចំនួន៦១ប្រអប់ ស្មើនឹង៤៣៩២០០កញ្ចប់ ប្រអប់កាហ្វេ ៤០ប្រអប់ ស្មើនឹង ២៨៨០០០កញ្ចប់ ថង់សម្រាប់ច្រកចំនួន៧កេះ ស្មើនឹង២៨០០០ ថង់ និង ជញ្ជីងសម្រាប់ថ្លឹង១ ។ នៅក្នុងពេលកំពុងប្រតិបត្តិការនោះដែរ ស្រាប់តែមានរថយន្តមួយគ្រឿងម៉ាកតូយ៉ូតាពាក់ស្លាកលេខបាងក ៩៥៨៨ បានដឹកសំបកកញ្ចប់អូវ៉ាន់ទីនយកមកប្រគល់អោយទីតាំងផលិតក៏ត្រូវឃាត់ផងដែរ ដែលពួកគេអាចជាមុខសញ្ញារួមគ្នាផលិតនូវផលិតផលទាំងនេះ ដើម្បីចែកចាយទៅលើទីផ្សារនោះក៏ត្រូវបានសមត្តកិច្ចធ្វើការចាប់ឃាត់ និងបញ្ជូនខ្លួនពួកគេ រួមទាំងវត្ថុតាងទៅកាន់អង្គភាពជំនាញ ដើម្បីចាត់ការតាមនិតិវិធីច្បាប់៕
