ខេត្តរតនគិរី ៖ ឈើសុក្រំចំនួន៤៣ កំណាត់ មុខយក្សធំៗមានប្រវែងចាប់ពី៥ម៉ែត្រ ទៅ១០ម៉ែត្រ ដែលឈ្មួញដឹកយកមកលាក់ទុកនៅក្នុងដីចំការកៅស៊ូរបស់ក្រុមហ៊ុនម៉ានយ៉ាងខេ ត្រូវបានកំលាំងជំនាញផ្នែករដ្ឋបាលព្រៃស្រុកវ៉ើនសៃ សហការជាមួយកំលាំងមូលដ្ឋានអាវុធ ហត្ថ ចុះបង្ក្រាបបាន កាលពីរសៀលថ្ងៃទី០៥ខែតុលាឆ្នាំ២០១៦ បន្ទាប់ក្រុមអ្នកសារព៏ត៌មាន បានប្រទះឃើញ ហើយបានរាយការណ៍ជូនសមត្ថកិច្ចនោះ ។
បើយោងតាមសេចក្តីរាយការណ៍ពីប្រជាពលរដ្ឋស្រុកវ៉ើនសៃបានអោយអ្នកសារព័ត៌មានដឹងថាៈ ឈើសុក្រំដែលឈ្មួញយកមកលាក់ទុកនៅក្នុងដីចំការកៅស៊ូរបស់ក្រុមហ៊ុនម៉ានយ៉ាងខេនេះគឺជាឈើរបស់ឧកញ្ញា ម្នាក់ដែលល្បីឈ្មោះខាងរកស៊ីធ្វើជំនួញឈើដុះស្នឹមក្នុងខេត្តរតនគិរី។
ប្រភពដដែលបានបន្តថា បើតាមការអង្កេត គឺឈើដែលឈ្មួញបានយកមកលាក់ទុកនៅទីតាំងខាងលើ គឺបណ្តាលមកពីពេលថ្មីៗមកនេះ មានការដាក់ចេញនូវបទបញ្ជាពីប្រមុខរាជរដ្ឋាភិបាល អោយការទប់ស្កាត់ និងបង្ក្រាបបទល្មើសឈើ ហើយស្ថាប័ន និងកំលាំងជំនាញដែលពាក់ពន្ធបានធ្វើការដោយយកចិត្តទុកដាក់ ទើបឈានទៅដល់ការធ្វើការបង្ក្រាប។
យោងតាមការអោយដឹងពី លោក ជា កុណារ៉ា នាយផ្នែករដ្ឋបាលព្រៃឈើបីស្រុក (ស្រុកវ៉ើនសៃ~តាវែង~អូរជុំ) បាន អោយដឹងថា មូលហេតុ ដែលអាចបង្ក្រាបបទល្មើស ឈើសុក្រំនៅចំណុចខាងលើបាន គឺដោយសារមាការ សហការណ័ពីកំលាំងសម្ងាត់ និងក្រុមអ្នកសារព័ត៌មាន ទើបលោកបានដឹកនាំកំលាំងជំនាញដោយសហការ ជាមួយកំលាំងមូលដ្ឋាន អាវុធហត្ថស្រុកធ្វើការបង្ក្រាបតែម្តង។
លោក ជា កុណារ៉ា នាយផ្នែករដ្ឋបាលព្រៃឈើបានបញ្ជាក់ថា ឈើសុក្រំទាំងនោះមានចំនួន៤៣ដើម ។ ហើយនៅព្រឹកថ្ងៃទី០៦/១០/២០១៦នេះ លោក បានស្នើអោយខាងក្រុមហ៊ុនម៉ានយ៉ាងខេ ជួយរករថយន្តដឹកយកទៅផ្ញើទុកនៅក្នុងក្រុមហ៊ុនម៉ានយ៉ាងខេជាបណ្តោះអាសន្នសិន ព្រោះលោកបានអះអាងថា បច្ចុប្ប្នននេះផ្លូវមានការលំបាក ។ យ៉ាងណាចំនួនឈើស្មើប៉ុន្មានម៉ែត្រគូបនោះ លោកនៅមិនទាន់បញ្ជាក់បាននៅឡើយទេ ៕
ចាប សំអាន