បាត់ដំបង ៖ នៅវេលាម៉ោង២រសៀលថ្ងៃទី០៣ខែតុលា ឆ្នាំ២០១៦ប្រទះឃើញសពបុរសម្នាក់អណ្តែតទឹកអូរហើមស្ពីង។ ហេតុការណ៍នេះបង្ករអោយមានការភ្ញាក់ផ្អើលដល់អ្នកភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។
យោងតាមប្រភពពីសាច់ញាតិជនរងគ្រោះបានអោយដឹងថាៈ ជនរងគ្រោះដែលលង់ទឹកស្លាប់នេះមាន ឈ្មោះ ហឹម ឈឿន ភេទប្រុសអាយុ៥០រស់នៅភូមិឃុំកើតហេតុជាមនុស្សផឹកស្រាស្រវឹងទាំងយប់ទាំងថ្ងៃដើរពេញភូមិមិនចូលផ្ទះអាចនិយាយបានថាជាមនុស្សវិកលចរិកព្រោះផឹកច្រើនពេក។ ហើយអ្នកស្រី ផុន ណាវី ដែលត្រូវជាប្រពន្ធសពបានដើររកប្តីក្នុងអំឡុងបុណ្យភ្ជុំបិណ្ឌប៉ុន្តែរកមិនឃើញ។ លុះមកដល់វេលាដូចបានរៀបរាប់ខាងលើនៅថ្ងៃដដែលស្រាប់តែប្រទះឃើញសពប្តីរបស់ខ្លួនលង់ទឹកស្លាប់ក្នុងស្ថានភាពហើមស្អុយមើលស្ទើរលែងស្គាល់ទៅហើយ។
សមត្ថកិច្ចជំនាញបានធ្វើកោសល្យវិច័យរួចអះអាងថា ជនរងគ្រោះស្លាប់ដោយសារដើររអិលធ្លាក់ចូលក្នុងអូរពិតប្រាកដមែន។បន្ទាប់មកសមត្ថកិច្ចប្រគល់សពជូនក្រុមគ្រួសារដើម្បីយកធ្វើបុណ្យតាមប្រពៃណី៕
