ខេត្តបាត់ដំបង ៖ មានប្រភពជាច្រើន ពិសេសគឺក្រុមគ្រួសារ និងសាច់ញាតិនៃសពតែម្តង បានធ្វើការរិះគន់យ៉ាងខ្លាំងទៅលើសមត្ថកិច្ចជំនាញ នៃស្នងការដ្ឋាននគរបាលខេត្តបាត់ដំបង បន្ទាប់ពីមានការឃាត់ខ្លួនជនសង្ស័យម្នាក់តាមដីការបស់តុលាការខេត្តពោធិ៍សាត់ ពាក់ព័ន្ធនឹងករណីឆបោកលុយរបស់ពលករទៅធ្វើការនៅប្រទេសថៃ និងប្រទេសម៉ាឡេស៊ី ដែលជនសង្ស័យរូបនោះត្រូវបានគេស្គាល់ថា ឈ្មោះ សារៈ មុនី អតីត ជាពិធីករ វិទ្យុ FM 91 Mz ខេត្តបាត់ដំបង ហើយត្រូវបានធ្វើអត្តឃាតដោយចង ក សម្លាប់ខ្លួននៅក្នុងបន្ទប់ឃុំខ្លួនបណ្តោះអាសន្នលេខ០២ នៃស្នងការដ្ឋាននគរបាលខេត្តកាលពីថ្ងៃទី ៣០ ខែកញ្ញា ឆ្នាំ២០១៦ វេលាម៉ោង ៧ និង១៥នាទី យប់ ក្រោយពីសមត្ថកិច្ចធ្វើការឃាត់ខ្លួនទើបតែបានរយៈពេល២ម៉ោងតែប៉ុណ្ណោះ ។
គួរបញ្ជាក់ដែរថា ជនសង្ស័យខាងលើនេះរស់នៅភូមិដាំស្ពៃ សង្កាត់ស្លាកែត ក្រុងបាត់ដំបងហើយការឃាត់ខ្លួនគឺបានធ្វើឡើងខណ:ដែលជនសង្ស័យកំពុងជួបជុំមិត្តភ័ក្ត្រ ផឹកស៊ី នៅចំណុចចំការស្វាយ ស្ថិតនៅក្នុងភូមិ ឃុំ ដែលគេរស់នៅខាងលើ មកឃុំខ្លួនបណ្ដោះអាសន្ន ដោយសមត្ថកិច្ចមិនបានធ្វើកំណត់ហេតុដកហូតរបស់របរដែលនៅជាប់នឹងខ្លួនរបស់ជនសង្ស័យឡើយ ដែលបញ្ហានេះគឺជាការធ្វេសប្រហែសមួយយ៉ាងធ្ងន់ធ្ងររបស់សមត្ថកិច្ច ដែលធ្វើអោយជនសង្ស័យមានឱកាសយកអាវយឺតរបស់ខ្លួនចង កទៅនឹងក្បាលគ្រែ ដើម្បីសម្លាប់ខ្លួនតែម្តង ។ បើគេពិនិត្យទៅលើដងខ្លួនរបស់សពទាំងមូល គឺរបស់របរដូចជា វ៉ែនតា ខ្សែ ចិញ្ចៀនខោខៅប៊យ និងអាវយឺតស មាននៅជាប់នឹងខ្លួនទាំងអស់ដោយគ្មានសមត្ថកិច្ចណា អនុវត្តតាមនិតិវិធីធ្វើការដកហូតចេញពីខ្លួនប្រាណរបស់ជនសង្ស័យឡើយ ព្រោះវត្ថុទាំងអស់នេះគឺជាសម្ភារៈដែលអាចធ្វើអោយជនសង្ស័យធ្វើអត្តឃាតបាន ហើយនៅក្នុងទ្រុងដែកនៃបន្ទប់លេខ០២នេះ គឺមានអ្នកទោសចំនួន៣នាក់ហើយដែលបានធ្វើអត្តឃាត ដោយចង កខ្លួនឯងបែបនេះ ។
ដោយឡែក លោក អួន ហ្វៃ ប្រធានការិយាល័យព្រហ្មទណ្ឌកំរិតធ្ងន់ បានបញ្ជាក់ប្រាប់ អ្នកសារព័ត៌មានក្នុងស្រុកថា ការឃាត់ខ្លួន នេះ គឺធ្វើទៅតាមដិការបស់តុលាការ នឹងសាលក្រមតុលាការ ខេត្តពោធិសាត់ ហើយយើង ក៏មិនបានដឹង អំពីមូលហេតុនៃការស្លាប់ របស់ជនសង្ស័យដែរ មិនដឹងថាគាត់មានរឿងអ្វី បានជាសម្រេចចិត្តធ្វើអត្តឃាតខ្លួនបែបនេះ ព្រោះរឿងនេះជារឿងតូចតាច មិនមែនជារឿងអីធំដុំនោះទេ ហើយនៅក្នុងច្បាប់វិញ គ្មានច្បាប់ណាកំណត់ឲ្យដោះខោអាវពីជនសង្ស័យនោះទេ លុះត្រាតែករណីធំៗ ទើបសមត្ថកិច្ច សម្រេចដោះខោអាវ ដើម្បីកំឲ្យជនសង្ស័យ យកខោឬអាវទាំងនោះ ទៅរិតជម្រឹងបង្អួច រំដោះខ្លួនចេញ ធ្វើឲ្យលំបាកចាប់ជនសង្ស័យបន្តទៀត ។
លោកបានបន្តទៀតថា ជនសង្ស័យខាងលើនេះ ជាមនុស្សមានមុខមានមាត់ នៅក្នុងខេត្តបាត់ដំបង សូម្បីតែកូនក្មេងក៏ស្គាល់គាត់ដែរ សមត្ថកិច្ចណាក៏ស្គាល់ដែរ ហើយមុនពេលកើតហេតុ សមត្ថកិច្ចបានទិញបាយអោយហូបជាធម្មតា ប៉ុន្តែចន្លោះពេលដែលអ្នកយាមទៅរកទិញបាយដើម្បីហូបខ្លួនឯង ក៏ស្រាប់តែជនសង្ស័យបានធ្វើអត្តឃាតតែម្តង ។
ក្រោយពេលកើតហេតុ ក៏មានលោកព្រះរាជអាជ្ញារង ចុះទៅត្រួតពិនិត្យជាមួយនឹងសមត្ថកិច្ចជំនាញផងដែរ ទើបធ្វើការប្រគល់សពទៅអោយក្រុមគ្រួសារដើម្បីនាំយកទៅធ្វើបុណ្យ តាមប្រពៃណី នៅឯលំនៅដ្ឋាន ៕