ក្រចេះ៖ កម្លាំងប៉េអឹមផ្ទៃប្រទេសសហការជាមួយប៉េអឹមស្រុកចិត្របុរី ក្រុង និងជំនាញរដ្ឋបាលព្រៃឈើក្រចេះ ក្រោមការសម្របសម្រួលពីលោក ធុច បញ្ចសន្តិភាព ព្រះរាជអាជ្ញារងអមសាលាដំបូងខេត្តក្រចេះ ចាប់រថយន្ដដឹកឈើចំនួន ២គ្រឿង នៅកន្លែងផ្សេងគ្នា នៅក្រុងក្រចេះ និងស្រុកចិត្របុរី ខេត្តក្រចេះ កាលពីវេលាម៉ោង៣ទៀបភ្លីឈានចូលថ្ងៃទី២៨ ខែកញ្ញា ឆ្នាំ២០១៦ ។
លោក អឹម ចិត្រា មេបញ្ជាការអាវុធហត្តស្រុកចិត្របុរី បានឲ្យដឹងថា ការចុះប្រតិបត្តិការបង្គ្រាបនេះ ឃាត់បានរថយន្ដចំនួន ២គ្រឿង គឺរថយន្ដយីឌុប ១គ្រឿង និងរថយន្ដសាំងយ៉ុង ១គ្រឿង ។
លោក បន្តឲ្យដឹងថា រថយន្តយីឌុបដឹកឈើក្រហមបង្គប់ក្រោមជ័រកៅស៊ូគ្រែប ឃាត់នៅចំនុចភូមិត្រពាំងព្រីង ក្នុងក្រុងក្រចេះ និងរថយន្ដសាំងយ៉ុងដឹកឈើសុក្រំពេញប្រៀប ឃាត់នៅចំនុចភូមិដា ឃុំដាស្រុកចិត្របុរី ខេត្តក្រចេះ ។
លោក បួយ រតនា នាយផ្នែករដ្ឋបាលព្រៃឈើក្រចេះ បញ្ជាក់ថា ប្រតិបត្តិការបង្គ្រាបនេះ មិនបានឃាត់ខ្លូនអ្នកបើកបររថយន្តនោះទេ ហើយក៏មិនស្គាល់អត្តសញ្ញាណម្ចាស់រថយន្ដ និងឈើនោះដែរ ព្រោះអ្នកបើកបររត់បាត់ចំណែកឯរថយន្ដទាំង ២គ្រឿង និងឈើយកទៅរក្សាទុកនៅស្ថានីយ៍បណ្ដុះកូនឈើខ្សារ និងកំពុងធ្វើការវាសវែង ប៉ុន្តែមិនទាន់ដឹងតួរលេខនៅឡើយទេ ។
លោក បន្តទៀតថា ជ័រគ្រែបប្រគល់ឲ្យម្ចាស់វិញ ចំណែកឈើ និងរថយន្ដរក្សាទុក ហើយលោកនឹងកសាងសំណុំរឿងបញ្ជូនទៅតុលាការចាត់ការតាមនិតិវិធីច្បាប់ ៕
