ខេត្តក្រចេះ ៖ កិច្ចព្រមព្រៀងកន្លែងនេសាទសហគមន៍ នៅក្នុងស្រុកសំបូរ ចំនួន១០ត្រូវបាននាយខណ្ឌរដ្ឋបាលជលផលក្រចេះ ចុះហត្ថលេខា ប្រគល់ជូនជូនសហគមន៍ នេសាទមូលដ្ឋានដើម្បីប្រើប្រាស់ប្រកបដោយនិរន្តរភាព នាព្រឹកថ្ងៃទី២៧ ខែកញ្ញា ២០១៦ម្សិលមិញដោយមានការជួយឧបត្ថម្ភ គាំទ្រពីកម្មវិធីជាដៃគូរលើវិស័យព្រៃឈើ និងជលផល ហៅកាត់ថា PaFF ក្រោមជំនួយរបស់ទីភ្នាក់ងារសហប្រតិបត្តិការ និងដៃគូរអភិវឌ្ឃន៍ប្រទេសស្វីសរួមមាន SDC BMZ និងCEPF តាមរយៈអង្គការ WWF កម្ពុជា ។
លោក សៀន គិន នាយខណ្ឌរដ្ឋបាលជលផលក្រចេះ បានឲ្យដឹងថា សហគមន៍នេសាទក្នុងខេត្តក្រចេះ មានសរុបចំនួន៦៦ ដោយបានធ្វើការចះុបញ្ជីទទួលស្គាល់នៅក្រសួងកសិកម្ម រុក្ខាប្រមាញ់ និង នេសាទបានចំនួន៤៥ និងកំពុងដំណើរការចះុបញ្ជីរចំនួន០៥បន្ថែម។ ការចះុកិច្ចព្រមព្រៀងកន្លែងនេសាទសហគមន៍ចំនួន១០នៅថ្ងៃនេះគឺដើម្បីប្រគល់ជូនទៅសហគមន៍មូលដ្ឋានដំណើរការចះុបញ្ជីរប្រើប្រាស់ស្របច្បាប់តាមរយៈការធ្វើនេសាទជាលក្ខណៈគ្រួសារ លើកទឹកចិត្តដល់ពួកគាត់ ដើម្បីរួមចំណែកគ្រប់គ្រងធនធានធម្មជាតិ ។
លោក ឈិត សំអាត នាយកអង្គការWWFកម្ពុជា បានអោយដឹងថា បច្ចុប្បន្នខាងអង្គការរបស់លោកបាននិងកំពុងខិតខំស្វែងរកជំនួយជាថវិកាពីបណ្តាប្រទេសនានាដែលជាដៃគូរអភិវឌ្ឍន៍ដើម្បីយកមករួមសហការជាមួយរដ្ឋបាលព្រៃឈើ និងរដ្ឋបាលជលផល ធ្វើការអភិរក្សធនធានធម្មជាតិព្រៃឈើ សត្វព្រៃនិងជាពិសេសសត្វផ្សោត ទន្លេមេគង្គ និងត្រីមេពូជ នៅក្នុងខេត្តក្រចេះ និងខេត្តស្ទឹងត្រែង ។
លោកបានបន្ថែម ទៀតថា បច្ចុប្បន្ន ទោះបីជាយើងមានឆ្មាំទន្លេនៅតាមដងទន្លេចំនួន១៦ និងមានសមាជិកឆ្មាំទន្លេសរុប៦៨នាក់ ហើយក្តី តែការធ្វើនេសាទខុសច្បាប់ដូចជាឆក់ត្រី ការ លួចដាក់មងនៅតាមអន្លង់អភិរក្សនៅតែកើតមាន ដោយសារការឆ្លៀតឱកាស របស់អ្នកនេសាទខិលខូច មួយចំនួន ដែលបណ្តាលឲ្យប៉ះពាល់ដល់សត្វផ្សោត ទន្លេមេគង្គ ដែលជាសម្បត្តិបេតិកភណ្ឌធម្មជាតិដ៏មានសារៈសំខាន់សម្រាប់វិស័យទេចរណ៍របស់ប្រទេសកម្ពុជា។
ដូច្នេះការចុះកិច្ចព្រមព្រៀងរវាងខណ្ឌរដ្ឋបាលជលផលក្រចេះ និងសហគមន៍នេសាទទាំង១០នៅស្រុកសំបូរនៅពេលនេះគឺមានសារៈប្រយោជ៍ខ្លាងណាស់ដើម្បីផ្តល់ឱកាសអោយសហគមន៍និងឆ្មាំទន្លេសហការជាមួយគ្នាដើម្បីការពារ គ្រប់គ្រង និងអភិរក្សធនធានជលផលប្រកបដោយប្រសិទ្ធភាពខ្ពស់ ។
លោក ខណ្ឌ ចំណាន អភិបាលរងខេត្តក្រចេះ និងលោកស្រី កាំង ឃីម អនុប្រធានរដ្ឋបាលជលផល ដែលជាគណៈអធិបតីនាពេលនោះ បានមានប្រសាសន៍ស្រដៀងគ្នាថា លោក លោកស្រី សូមថ្លែងអំណរគុណយ៉ាងជ្រាលជ្រៅសម្រាប់កិច្ចខិតខំប្រឹងប្រែង និងកិច្ចសហការរវាងខណ្ឌរដ្ឋបាលជលផលក្រចេះ និងអង្គការWWF ដែល បានរួមគ្នារៀបចំ បង្កើត ពង្រឹងសហគមន៍នេសាទនៅក្នុងតំបន់ដ៏មានសារសំខាន់រហូតឈានដល់ចះុកិច្ចព្រមព្រៀងនៅថ្ងៃនេះ ដើម្បីជាការលើក ទឹកចិត្តដល់ពួកគាត់ចូលរួមក្នុងកិច្ចការអភិវឌ្ឍន៍ គ្រប់គ្រង ការពារ និងអភិរក្សសត្វផ្សោត និងអន្លង់ត្រីមេពូជប្រកបដោយប្រសិទ្ធភាពខ្ពស់ និងទទួលបានជោគជ័យ សំដៅអោយធនធានជលផលនៃយើងនៅស្ថិតស្ថេរគង់វង្ស ៕
ដោយ កិះ ខន