ប្រទេសថៃ ៖ ពលករខ្មែរចំនួន ២៦ នាក់ ត្រូវបានកំលាំងជំនាញ សហការជាមួយក្រុមតម្រួតថៃ ធ្វើការឃាត់ខ្លួន ខណៈដែលពួកគេទាំងអស់គ្នាកំពុងរៀបចំឈើគ្រញ៉ូងដែលគេបានចូលទៅកាប់ក្នុងតំបន់ហាមឃាត់ ដើម្បីត្រៀមលើកដាក់រថយន្ត នៅក្បែនឹងតំបន់ហាមឃាត់នោះ ។
យោងតាមរបាយការណ៍របស់សារព័ត៌មានថៃ បានអោយអ្នកយកពត៌មានយើងដឹងថា នៅរសៀលថ្ងៃទី ២៥ ខែកញ្ញា ឆ្នាំ២០១៦ ក្រុមតម្រួតថៃ រួមទាំងកំលាំងយោធា ដោយមានការសហការជាមួយនឹងកំលាំងជំនាញដែលគ្រប់គ្រងក្នុងតំបន់ព្រៃឈើ នៃឧទ្យានជាតិប៉ាងសុីដា បានធ្វើការឡោមព័ទ្ធទៅលើភូមិមួយ ដែលស្ថិតនៅក្បែនឹងតំបន់ឧទ្យានជាតិនេះគឺភូមិ១០ ឃុំថាយ៉ែក ស្រុកមឿង ខេត្តស្រះកែវ ប្រទេសថៃ ក្រោយពីបានទទួលនូវព័ត៌មានថាមានការដឹកជញ្ជូនឈើគ្រញូងយកមកលាក់ទុកនៅក្នុងភូមិសាស្ត្រខាងលើនេះ ។
របាយការណ៍បានបន្តថា នៅក្នុងកិច្ចប្រតិបត្តិការនេះ គឺកំលាំងសមត្តកិច្ចបាន ធ្វើការឃាត់ខ្លួនជនជាតិខ្មែរសរុបចំនួន២៦នាក់ ដែលពួកគេកំពុងរៀបចំឈើគ្រញូងចំនួន ៨០ ដុំដើម្បីត្រៀមលើកឡើងលើរថយន្ត ។ ពាក់ព័ន្ធនឹងករណីនេះ គឺពួកគេបានសារភាពថា ការដែលពួកគេចូលទៅកាប់ឈើក្នុងតំបន់ឧទ្យានជាតិ ប៉ាងសុីដា នេះដោយសារតែមានថៅកែធំជាអ្នកជួលអោយពួកគេមក ។
បច្ចុប្បន្នក្រោយពីកំលាំងសមត្តកិច្ចថៃបាន ធ្វើការប្រមូលឈើគ្រញូងទាំង៨០ដុំនេះយកមករក្សាទុក នៅក្នុងឧទ្យានជាតិវិញ ដោយឡែកពលរដ្ឋខ្មែរទាំង២៦នាក់ ក៏ត្រូវបានបញ្ជូនទៅកាន់ស្នងការដ្ឋាន សមត្តកិច្ចថៃខេត្តស្រះកែវដើម្បីធ្វើការសាកសួរ រកប្រភពមេក្លោងដែលនៅពីក្រោយខ្នង និងយកមកផ្តន្ទាទោសតាមផ្លូវច្បាប់ ៕
