បន្ទាយមានជ័យ ៖ ជនសង្ស័យប៉ុនប៉ងឃាតកម្ម គិតទុកជាមុនម្នាក់ ត្រូវបានសមត្ថកិច្ចកម្ពុជាថៃសហការគ្នា ចាប់ឃាត់ខ្លួននៅឯខេត្តសមុទ្រប្រាកាន ប្រទេសថៃ ហើយបញ្ជូនឲ្យសមត្ថកិច្ចកម្ពុជាតាមច្រកទ្វារអន្តរជាតិប៉ោយប៉ែត កាលពីវេលាម៉ោងជាង9ព្រឹកថ្ងៃទី23កញ្ញា2016 ក្រោយគេចខ្លួនជិត2ឆ្នាំ ។
ជនសង្ស័យខាងលើឈ្មោះផាត់ប៊ុន ធឿន (ហៅស្រួច) ឬអ៊ូច ភេទប្រុសអាយុ28ឆ្នាំ
មានទីលំនៅភូមិមោង ឃុំគា ស្រុកមោងឬស្សី ខេត្តបាត់ដំបង ស្នាក់នៅភូមិក្បាលកោះសង្កាត់និងក្រុងប៉ោយប៉ែត។
ជនសង្ស័យត្រូវសមត្ថកិច្ចថៃ បញ្ជូនតាមរថយន្ត1គ្រឿងពណ៌ខ្មៅ មកប្រគល់ឲ្យសមត្ថកិច្ចកម្ពុជាប៉ុស្តិច្រកទ្វារព្រំដែនអន្តជាតិប៉ោយប៉ែត ។
លោក អ៊ុំ សុផល ស្នងការរងនគរបាលខេត្តបន្ទាយមានជ័យ ប្រាប់អ្នកសាព័តិមាននៅមាត់ច្រកទ្វារអន្តរជាតិប៉ោយប៉ែត ខណៈពេលវិលត្រឡប់ពីប្រទេសថៃថា ជនសង្ស័យខាងលើត្រូវបានចាប់ខ្លួននៅស្រុកសំរោង ខេត្តសាមុទ្រប្រាកាន កាលពីវេលាម៉ោង 11 ព្រឹកថ្ងៃទី22 កញ្ញាម្សិលមិញ ។
លោកស្នងការរងរូបនេះបន្តថាជនសង្ស័យខាងលើឃាត់ខ្លួនតាមដីការបស់សាលាដំបូងខេត្តបន្ទាយជ័យ ចុះថ្ងៃទី24 ធ្នូ ឆ្នាំ2015 ដោយសម្រេចផ្តន្ទាទោស ដាក់ពន្ធនាគារកំណត់30ឆ្នាំ គិតចាប់ពីថ្ងៃអនុវត្តទោស ។
លោកស្នងការរងបន្តថា ជនសង្ស័យមុនគេចខ្លួនទៅពួនសម្ងំនៅប្រទេសថៃ គឺបានកាប់ជនរងគ្រោះឈ្មោះ ពៅ រតនា ភេទប្រុសអាយុ21ឆ្នាំមានទីលំនៅ ភូមិបាលិលេយ្យ2 សង្កាត់ប៉ោយប៉ែត របួស3កន្លែងដៃ, ក្បាលនិងជើងប៊ិះស្លាប់ ដោយប្រព្រឹត្តនៅភូមិក្បាលស្ពាន 1 សង្កាត់ប៉ោយប៉ែត កាលពីថ្ងៃទី4 ខែតុលា ឆ្នាំ2014 ។
ជនសង្ស័យក្រោយពីសមត្ថកិច្ចថៃប្រគល់ឲ្យត្រូវបាននគរបាលប៉ុស្តិ៍ច្រកទ្វារព្រំដែនអន្តរជាតិប៉ោយប៉ែតប្រគល់បន្តឲ្យនគរបាលក្រុងប៉ោយប៉ែត ដើម្បីបញ្ជូនបន្តទៅស្នងការដ្ឋាននគរបាលខេត្ត និងកសាងសំណុំរឿងបញ្ជូនទៅតុលាការតាមនីតិវិធី ៕
