ប៉ៃលិន៖ នៅផែស្ងួតជាងហៀងស្ថិតនៅ ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន នារសៀល ថ្ងៃទី២២ ខែកញ្ញា ឆ្នាំ២០១៦ មានក្រុមអ្នកសារព័ត៌មានមកពីប្រទេសថៃ ចំនួនជាង ៣០ ស្ថាប័ន រួមមានអ្នកយកព័ត៌មានអោយ វិទ្យុ ទូរទស្សន៍ កាសែត និងទស្សាវដ្ដី បានមកទស្សនកិច្ចនៅផែស្ងួត ជាង ហៀង ដើម្បីស្វែងយល់ពីសង្វាក់ការនាំចេញ នាំចូលទំនិញ និងការផ្លាស់ប្តូរ ការផ្ទេរទំនិញរវាងកម្ពុជា+ថៃ តាមច្រកអន្តរជាតិព្រំ ខេត្តប៉ៃលិន ។
លោក ឡោ ស៊ុនជាង តំណាងក្រុមហ៊ុនផែស្ងួត ជាង ហៀង បាផ្តល់បទសំភាសន៍ជាមួយក្រុមអ្នកសារព័ត៌មានថា៖ ទំនិញដែលដឹកយកមកស្តុក និងផ្ទេរ នៅផែស្ងួត ជាង ហៀង គឺមានជាច្រើនប្រភេទ ដែលនាំចូលពីប្រទេសថៃ មកកម្ពុជា ដោយមានច្បាប់អនុញ្ញាត និងការត្រួតពិនិត្យត្រឹមត្រូវមន្ត្រីពីជំនាញ ដូចជា កាំកុងត្រូល គយ និងរដ្ឋករ ជាដើម ដែលមានទីស្នាក់ការនៅផែស្ងួតនេះតែម្តង។ ទន្ទឹមនេះក៏មានមុខទំនិញពីប្រទេសកម្ពុជា ជាពិសេសផលិតផលកសិផល គឺត្រូវធ្វើការវេចខ្ចប់ និងត្រួតពិនិត្យភូតគាមអនាម័យពីមន្ត្រីជំនាញ នៅក្នុងផែស្ងួតនេះរួចរាល់ហើយ ទើបដឹកជញ្ជូននាំចូលទៅកាន់ប្រទេសថៃ ។
តំណាងអ្នកសារព័ត៌មានថៃ បានឱ្យដឹងថា៖ ក្រុមអ្នកសារព័ត៌មានថៃមកទស្សនៈកិច្ចពេលនេះ គឺដើម្បីក្នុងគោលបំនងស្វែងយល់សង្វាក់នៃការនាំចេញ នាំចូលទំនិញ រវាងកម្ពុជា+ថៃ ជាពិសេសគឺពិនិត្យមើលទីតាំងស្តុកទុក និងផ្ទេរទំនិញរវាងកម្ពុជា+ថៃ នៅផែស្ងួត ជាង ហៀង នេះ ដើម្បីយកទៅផ្សព្វផ្សាយអោយនាយទុនរកស៊ីនៅប្រទេសថៃ ជាពិសេសអ្នករកស៊ី នាំចេញ នាំចូលទំនិញរវាងប្រទេសទាំងពីរ បានយល់ដឹង និងមករកស៊ីផ្លាស់ប្តូរទំនិញរវាងកម្ពុជា+ថៃ តាមរយៈច្រកអន្តរជាតិព្រំ ខេត្តប៉ៃលិន ខាងកម្ពុជា និងច្រកបានប៉ាកាត ខេត្តចាន់បុរី ខាងប្រទេសថៃ។
បើតាមការបញ្ជាក់របស់មន្ត្រីគយ ដែលប្រចាំការនៅផែស្ងួត ជាង ហៀង បានឱ្យដឹងថា៖ ការនាំចេញ នាំចូលទំនិញរវាងប្រទេសកម្ពុជា+ថៃ នៅក្នុងផែស្ងួតនេះ គឺមានទំហំជាទឹកប្រាក់ជាង ៣ពាន់លានរៀល ក្នុង១ខែ ហើយទំនិញភាគច្រើននាំចូលមកពីប្រទេសថៃ ភាគច្រើន ជាគ្រឿងសំណង់ គ្រឿងឧបភោគបរិភោគ ចំនែកទំនិញរបស់កម្ពុជា ដែលត្រូវនាំចូលទៅកាន់ប្រទេសថៃ ភាគច្រើនជាផលិតផលកសិផល ៕
ដោយ ៖ ទូច សុខន
