ប្រទេសថៃ ៖ បន្លែស្រស់ៗ និងកូនសត្វល្អិតជាច្រើនប្រភេទ កំពុងក្លាយជាអាហារ យ៉ាងពេញនិយមសម្រាប់ជនជាតិថៃ នៅភាគឥសាន និងខេត្តសុរិន្ទ ខណៈដែលមានជនជាតិខ្មែរ បាននាំរបស់ទាំងនេះ ឆ្លងតាមច្រកតំបន់ នាខ្សែបន្ទាត់ព្រំដែនកម្ពុជា ថៃដើម្បីយកទៅលក់នៅក្នុងផ្សារថៃ ។
ប្រជាពលរដ្ឋទាំងភាគីកម្ពុជា ក៏ដូចជាភាគីថៃ ដែលរស់នៅក្នុងតំបន់ក្បែរច្រកចម ក្នុងឃុំដាន ស្រុកកាបឈើង ខេត្តសុរិន្ទ ប្រទេសថៃ បាននិយាយស្ទើរគ្រប់ៗគ្នាថា បច្ចុប្បន្នក្រោយពីមានភ្លៀងធ្លាក់ជាប់ៗគ្នាអស់រយៈពេលប៉ុន្មានថ្ងៃមកនេះ បន្លែ និងកូនសត្វនានាជាច្រើនប្រភេទ គឺមានសភាពស្រស់បំព្រង ដែលសុទ្ធសឹងតែជារបស់ដែលកម្រនឹងរកបានដូចជាបន្លែផ្អែម ត្រួយព្រិច ស្លឹកបាស់ និងត្រួយល្ពៅជាដើម ក្នុងនោះផងដែរក៏មានហ៊ីង កង្កែប កន្ទាទូក ព្រមទាំងសត្វកណ្តូប ដែលជាអាហារយ៉ាងពេញនិយមរបស់ថៃឥសាន និងប្រជាជនក្នុងខេត្តសុរិន្ទ ដែលគេចូលចិត្តទិញយកទៅ ចំអិនធ្វើជាអាហារដ៏មានឱជារស ព្រោះសត្វកណ្តូបនេះមានពីរប្រភេទគឺ កណ្តូបអុីម៉ូ និងកណ្តូបប៉ាថាំងកា ។
ដោយឡែក សម្រាប់សត្វកន្ទាទូកវិញ នៅពេលដែលពលរដ្ឋខ្មែរនាំយកទៅលក់ក្នុងផ្សារ ក្បែរច្រកតំបន់ខាងលើ គឺភាគច្រើនគេយកទៅតែកន្ទាទូកណាដែលជាឈ្មោលតែប៉ុណ្ណោះ ព្រោះកន្ទាទូកឈ្មោលវាមានលក្ខណៈពិសេសត្រង់ថា វាមានក្លិនក្រវាញឆ្ងុយឆ្ងាញ់។
ប៉ុន្តែនាពេលបច្ចុប្បន្ននេះ ជនជាតិថៃឥសាន និងថៃក្នុងខេត្តសុរិន្ទ ក៏ដូចជានៅក្នុងទីក្រុងបាងកកដែរ បានងាកទៅរកសត្វកណ្តូបខ្លាំងជាង ដោយសារតែវាមានឱជារសឆ្ងាញ់ ក្នុងការចំអិនធ្វើជាម្ហូបអាហារតាមផ្ទះ ក៏ដូចជាតាមអាហារដ្ឋាននានាផងដែរ ដូច្នេះហើយបានជាបច្ចុប្បន្ននេះ គេសង្គេតឃើញថា នៅពេលដែលជនជាតិខ្មែរនាំសត្វទាំងនេះទៅដល់ទីតាំងច្រកតំបន់ខាងលើ គឺមានជនជាតិថៃចោមរោមពពាក់ពពូនដើម្បីទិញសត្វទាំងនេះយកទៅបរិភោគ ព្រោះវាគឺជាអាហារពិសេស និងកំពុងពេញនិយមនៅក្នុងប្រទេសថៃផងដែរ ៕