ក្នុងបរិវេណវត្តពោធិវាល ក្រុងបាត់ដំបងនាព្រឹកថ្ងៃទី ២៤ ខែកក្កដា ឆ្នាំ២០១៤ បានប្រារព្វធ្វើបុណ្យចំរើនព្រះជន្ម ព្រះវិសុទ្ធិវង្ស អ៊ុក មុត រាជាគណៈថ្នាក់កិត្តិយស និងជាព្រះមេគណ ខេត្តបាត់ដំបង គម្រប់ ៧៧ ឈានចូល ៧៨ ព្រះវស្សា ក្រោមអធិបតីភាព ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង លោកជំទាវ។
ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង មានប្រសាសន៍ឱ្យដឹងថាៈ ដើម្បីរួមចំណែកក្នុងការកសាងសេចក្តីសុខ ដល់ប្រជាពលរដ្ឋទូទៅព្រះសង្ឃក្នុងខេត្តបាត់ដំបងបានដើរតួនាទី យ៉ាងសំខាន់ក្នុងការអប់រំផ្លូវចិត្ត និងផ្តល់ចំណេះដឹង ផ្នែកព្រះពុទ្ធសាសនា ដល់ពុទ្ធបរិស័ទ្ទ តាមរយៈការផ្សព្វផ្សាយព្រះធម៌ អប់រំតាមប៉ុស្តិ៍ វិទ្យុនានា ក្នុងការផ្សាយមេត្តាធម៌ និងបានចូលរួមចំណែកលើកកំពស់ សីលធម៌ របស់យុវវ័យ ដែលកំពុងមានការធ្លាក់ចុះគួរអោយព្រួយបារម្មណ៍។ ព្រះសង្ឃបានបង្កើនកម្មវិធីចុះអប់រំដល់សិស្សានុសិស្ស នៅតាមសាលារដ្ឋ ដើម្បីឱ្យពួកគេយល់ ពីតំលៃ សីលធម៌ក្នុងសង្គម និងដើម្បីបញ្ច្រាបនូវចំណេះដឹង ព្រះពុទ្ធសាសនា ដល់ពួកគេផងដែរ។ អ្វីដែលគួរឱ្យកត់សំគាល់ នោះគឺ ដើម្បីជួយកាត់បន្ថយភាពក្រីក្រ និងទុក្ខលំបាក របស់ប្រជាពលរដ្ឋ គឺព្រះសង្ឃបានបង្កើតកម្មវីធី ប្រមូលថវិការ ក៏ដូចជាគ្រឿងឧបភោគ បរិភោគផ្សេងៗ យកទៅជួយដល់ជនក្រីក្រ ជនចាស់ជរា អ្នកជំងឺនៅតាមមន្ទីរពេទ្យ ជនរងគ្រោះដោយសារទឹកជំនន់ និងសិស្សានុសិស្សក្រីក្រ ខ្វះលទ្ធភាព ក្នុងការសិក្សាជាដើម។
ថ្លែងក្នុងឱកាសនោះ ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃមានប្រសាសន៍ថាៈ សូមសម្តែងនូវសេចក្តីជ្រះថ្លា និងកោតសសើរ ចំពោះទឹកចិត្ត សទ្ធាប្រកបដោយបញ្ញាដ៏ មោះមុត របស់ព្រះសង្ឃ សិស្សគណ និងពុទ្ធបរិស័ទ ដែលបានរួបរួម សាមគ្គីគ្នាផ្ទួចផ្តើមប្រារព្វធ្វើនូវកម្មវិធីបុណ្យចំរើនព្រះជន្ម ប្រគេនព្រះវិសុទ្ធិវង្ស ប្រកបដោយភាពឱឡារិក គគ្រឹកគគ្រេងនាពេលនេះ។
ឯកឧត្តមមានប្រសាសន៍បន្តថាៈ សកម្មភាពរួបរួមគ្នាទាំងកាយទាំងចិត្តនេះ ជាសក្ខីកម្ម បញ្ជាក់ពីភាពកតញ្ញូ ចំពោះគ្រូបាធ្យាយ និងជា គំរូដ៏ល្អ ដល់អនុជនជំនាន់ក្រោយ ឱ្យុយកតម្រាប់តាម ដើម្បីឆ្លើយតប ទៅនឹងឹកិច្ចខិតខំប្រឹងប្រែង និងការលៈបង់ យ៉ាងធំធេងរបស់ព្រះវិសុទ្ធិវង្ស ដែលស្ទើរតែមួយជីវិតរបស់ព្រះអង្គបូជា ដើម្បីការរីកចំរើន នៃព្រះពុទ្ធសាសនា និងសង្គមជាតិ។
សូមប្រគេនពរព្រះអង្គជួបប្រទះតែនឹងសេចក្តីសុខចំរើន ខ្លោចបង់នូវទុក្ខសោក រោគភ័យចង្រៃ ឧបទ្រពទាំងឡាយ សូមានព្រះសខុភាព និងព្រះកាយពលមាំមួន ព្រះជន្មាយុយ៉ឺនយូរដើម្បីគង់ជាម្លប់ ដ៏ត្រជាក់ នៃព្រះសង្ឃ សិស្សគណ និងពុទ្ធបរិស័ទ ទាំងឡាយជាពិសេស ដើម្បីការ រីកចំរើន នៃព្រះពុទ្ធសាសនា នៅក្នុងខេត្តបាត់ដំបងទាំងមូល ៕
