ក្រចេះ៖ នៅស្នងការរដ្ឋាននគរបាលខេត្តក្រចេះ ព្រឹកថ្ងៃទី២១ ខែកញ្ញា ឆ្នាំ២០១៦នេះ មានបើកកិច្ចប្រជុំត្រួតពិនិត្យ និងពង្រឹងការអនុវត្តច្បាប់ ស្ដីពី ចរាចណ៍ផ្លូវគោក ក្រោមអធិបតីភាពលោកឧត្តមសេនីយ៍ត្រី ហ៊ន ប៉ូច ស្នងការរង និងជាប្រធានការិយាល័យសណ្ដាប់ធ្នាប់ និងលោកឧត្តមសេនីយ៍ត្រី ឡុង ធូ អនុប្រធាននាយកដ្ឋាននគរបាលចរាចណ៍ និងសណ្ដាប់ធ្នាប់សាធារណៈ ។
កិច្ចប្រជុំនេះ ផ្ដោតសំខាន់ គឹដើម្បីត្រួតពិនិត្យ ពង្រឹងការងារផ្សព្វផ្សាយច្បាប់ ការរឹតបន្តឹងច្បាប់ ការអនុវត្តនីតិវិធីពិន័យ ការបែងចែកប្រាក់រង្វាន់ ការដោះស្រាយគ្រោះថ្នាក់ចរាច ការកសាងសមត្ថភាព ការគ្រប់គ្រងកម្លាំង មធ្យោបាយនិងឧបករណ៍ច្ចេកទេស និងចំណាត់ការចំពោះបាតុភាពអសកម្ម នៅតាមបណ្ដាគោលដៅនីមួយៗ ដល់ការិយាល័យផ្លូវគោក និងអធិការរដ្ឋាននគរបាលស្រុក ក្រុង នៃស្នងការនគរបាលខេត្តក្រចេះ ។
លោកឧត្តមសេនីយ៍ត្រី ហ៊ន ប៉ូច ស្នងការរង បានឲ្យដឹងថា គ្រោះថ្នាក់ចរាចណ៍៩ខែឆ្នាំ២០១៦ កើតឡើងចំនួន ១១៨លើក លើ ១១៧លើក កើន ១លើក ស្មើនឹង ៨,៥៤ភាគរយ ក្នុងនោះ មានមនុស្សរងគ្រោះ សរុប ២៥៧នាក់ លើ ២៨៧នាក់ ថយចុះ ៣០នាក់ ស្មើនឹង១០,៤៥ភាគរយ ។ ស្លាប់ ៦១នាក់ លើ ៨៨នាក់ ថយចុះ ២៧នាក់ របួសធ្ងន់ ១២០នាក់ លើ ១២៥នាក់ ថយ ៥នាក់ របួសស្រាល ៧៦នាក់ លើ ៧៤នាក់ កើន ២នាក់ ។
លោកស្នងការរង បានបន្តថា មធ្យោបាយធ្វើដំណើរខូចខាត សរុប ១៩៣គ្រឿង លើ ១៩៤គ្រឿង ថយ ១គ្រឿង ស្មើនឹង ៥,១៥ភាគរយ ក្នុងនោះ ម៉ូតូ ១១៩គ្រឿង លើ ១០៧គ្រឿង កើន ១២គ្រឿង រថយន្ត ៧២គ្រឿង លើ ៨១គ្រឿង ថយ ១៤គ្រឿង យានកែច្នៃ ១៦គ្រឿង កង់ ២គ្រឿង និងផ្ទះ ១ខ្នង ។ គ្រោះថ្នាក់ទាំងនោះ គឹបណ្ដាលមកពីកត្តា បើកបរលើសល្បឿន៥៨,៤៧% មិនគោរពសិទ្ធអាទិភាព ២៩,៦៦% បត់គ្រោះថ្នាក់ ៥,៨% វ៉ាជែង ៤,២៣% ស្រវឹង ១,៦៩% និងងងុយដេក ០,៨៤% ។
លោក បន្តទៀតថា ក្នុងរយៈពេល ៩ខែដើមឆ្នាំ២០១៦ ក៏ដូចជានៅក្នុងឱកាសប្រារព្ធនៃពិធីបុណ្យភ្ជុំបិណ្ឌរយៈ១៥ថ្ងៃនេះ ក្រុមការងារជំនាញការិយាល័យសណ្ដាប់ធ្នាប់ខេត្ត បានចុះអប់រំផ្សព្វផ្សាយច្បាប់ចរាចណ៍តាមទីប្រជុំជនផ្សារ ៦០លើក តាមរយកម្មវិធីវិទ្យុ ទូរទស្សន៍ ។ ផ្សព្វផ្សាយច្បាប់ និងចែកអនុក្រឹត្យ បាន ៣០.៩៨២នាក់ នៅតាមផ្ទះ វេទិការសាធារណៈ តាមគ្រឹស្តស្ថានសិក្សា ព្រមទាំងបានធ្វើការផ្សព្វផ្សាយផែនការលេខ ០២៦ របស់គសចគ ដល់មន្ទីរអង្គភាពជុំវិញខេត្ត និងមន្ត្រីនគរបាល ១៧៨ច្បាប់ ស្មើនឹង ១៧៨នាក់ ។
ជាមួយគ្នានោះ លោកឧត្តមសេនីយ៍ត្រី ឡុង ធូ បានគត់សម្គាល់ឃើញថា ចាប់ពីដើមឆ្នាំ២០១៦ រហូតមកដល់ពេលបច្ចុប្បន្ននេះ ការរឹតបន្តឹងការអនុវត្តច្បាប់ចរាចណ៍ផ្លូវគោកបានប្រព្រឹត្តទៅយ៉ាងសកម្ម និងទទួលបានលទ្ធផលវិជ្ជមានជាបណ្ដើរៗ ធ្វើឲ្យករណីគ្រោះថ្នាក់ចរាចណ៍ផ្លូវគោក ការស្លាប់ និងរបួសមានការកាត់បន្ថយគួរឲ្យកត់សម្គាល់ ដែលទាំងនោះ បានបង្ហាញឲ្យឃើញពីការប្ដេជ្ញាចិត្ត អនុវត្តការងាររបស់គណៈកម្មាធិការជាតិសុវត្ថិភាពចរាចណ៍ផ្លូវគោកគ្រប់ថ្នាក់គ្រប់ផ្នែកពាក់ព័ន្ធ ព្រមទាំងការចូលរួមគោរព និងអនុវត្តច្បាប់ពីប្រជាពលរដ្ឋផងដែរ ។
លោក ក៏បានជម្រុញដល់មន្ត្រីនគរបាលចរាចណ៍ទាំងអស់ ត្រូវគោរពនូវក្រមសីលធម៌ឲ្យបានម៉ឺងម៉ាត់ក្នុងពេលអនុវត្តការងារនៅតាមមគោលដៅ និងត្រូវបន្តចុះអប់រំណែនាំ ផ្សព្វផ្សាយច្បាប់ចរាចណ៍ផ្លូវគោកឲ្យបានទូលំទូលាយដល់ប្រជាពលរដ្ឋឲ្យបានជាប់ជាប្រចាំ ៕ កិះ ខន
