ខេត្តកំពង់ឆ្នាំង៖ បញ្ហាបទល្មើសនេសាទក្នុងខេត្តកំពង់ឆ្នាំងត្រូវបានគេមើលថា កំពុងមានកំណើនកើនឡើងយ៉ាងខ្លាំងបើទោះជាប្រមុខរាជរដ្ឋាភិបាលបានខិតខំធ្វើកំណែទម្រង់ស៊ីជម្រៅលើគ្រប់វិស័យ និងចេញអនុសាសន៍ល្អៗដល់មន្ត្រីគ្រប់លំដាប់ថ្នាក់ដើម្បីចូលរួមទប់ស្កាត់ និងបង្ក្រាបបទល្មើសផ្សេងៗ ប៉ុន្តែមន្ត្រីជំនាញពាក់ព័ន្ធហាក់ដូចជា អនុវត្តផ្ទុយទៅហ្នឹងបទបញ្ជា និងច្បាប់ស្ដីពីជលផលទៅវិញ។
ជាក់ស្ដែងនៅពេលថ្មីៗនេះអ្នកសារពត៌មានយើង បានចុះទៅយកពត៌មានតាមដងទន្លេក្នុងចំណុចក្បាលកោះទន្លា ចំណុចគន្លង(១០០) ចំណុចព្រែកដូនតី និងចំណុចចុងព្រែកគូរ ស្ថិតក្នុងឃុំផ្លូវទូក និងឃុំប្រឡាយមាស ស្រុកកំពង់លែង ខេត្តកំពង់ឆ្នាំង បានប្រទះឃើញបទល្មើសនេសាទរបាំង(ណរាវ)ទំនើបបែបថ្មីធ្វើអំពីសាច់អួនក្រឡាញឹករាប់រយខ្សែរដែលមានប្រវែង៨០០ម៉ែតទៅ១០០០ម៉ែត។
យោងតាមប្រភពពត៌មានពីប្រជាពលរដ្ឋនេសាទលក្ខណៈគ្រួសារនៅទីនោះសុំមិនបញ្ចេញឈ្មោះបានប្រាប់ឲ្យដឹងថា: បទល្មើសទាំងនេះក្រុមជនល្មើសបានដាក់ចាប់យកត្រីតាំងពីទឹកឡើងក្នុងរដូវបិទនេសាទ មកដល់ពេលនេះគឺរយះពេលជាង៣ខែហើយ ពួកគេចាប់ត្រីល្អិតៗ៨៥%ក្នុងមួយថ្ងៃៗមិនក្រោម ៥តោនទៅ៦តោន យកទៅលក់ឲ្យថៅកែទូកឌុក ដែលជាអ្នកជួយលុយនិងសម្ភារះ ឈ្មោះផល្លា ឈ្មោះគូឆិ និងឈ្មោះប្រុស ចតទូកចាំទិញនៅចំណុចព្រែក ដូនតី និង ព្រែកគូរ ដឹកយកទៅលក់នៅយឿត្រីផ្សារក្រោមកំពង់ឆ្នាំង ដោយសេរីគ្មានការរំខានពីមន្ត្រីជលផលឡើយ បើទោះជាច្បាប់ស្ដីពីជលផលក្នុងមាត្រា១០១ជំពូក១៥បានធ្វើការហាមឃាត់មិនអោយមានការដឹកជញ្ជូនអនុផល ជលផល ដែលបានមកពីការនេសាទល្មើសច្បាប់ក៏ដោយ។
ប្រភពដដែលបន្តថា : ពួកគាត់ធ្លាប់ឃើញមន្ត្រីជលផលចុះមកបង្ក្រាបម្ដងម្កាលដែរ តែឃើញបង្ក្រាបបានតែបទល្មើសតូចតាចប៉ុណ្ណោះរួចថតរូបយកទៅបង្ហោះតាមបណ្ដាញសង្គមFacebookមើលទៅហាក់បីនៅ ក្នុងដែនសម្ថកិច្ចខ្លួនគ្មានបទល្មើសចឹង តែធាតុពិតគឺផ្ទុយស្រលះ។
ជុំវិញករណីខាងលើនេះលោកតាត សីហាក់ នាយផ្នែករដ្ឋបាលជលផលផ្សាឆ្នាំងទទួលបន្ទុកបង្ក្រាបបទល្មើសស្រុកកំពង់លែង មិនអាចសុំធ្វើការបំភ្លឺបានទេកាលពីល្ងាចថ្ងៃទី១៥កញ្ញានេះដោយទូរសព្ទ័ខលចូលច្រើនដងគ្មានអ្នកទទួល។
ចំណែកលោកម៉ុប សាម៉ុននាយរងខណ្ឌ័រដ្ឋបាលជលផលទទួលបន្ទុកបង្ក្រាបបទល្មើសនេសាទស្រុកកំពង់លែងបានប្រាប់តាមទូរសព្ទ័នៅវេលាម៉ោង៣និង៤០នាទីល្ងាចថ្ងៃទី១៥កញ្ញាឆ្នាំ២០១៦នេះឲ្យដឹងដែរថា លោកទទួលស្គាល់នៅចំណុចខាងលើពិតជាមានបទល្មើសរបាំង(ណរាវ)វែងៗពិតប្រាកដមែន ប៉ុន្តែមួយរយះនេះជាប់រវល់ លោកក៏បានសន្សា និងសហការជាមួយកម្លាំងចំរុះស្រុកដើម្បីចុះបង្ក្រាបនៅថ្ងៃខាងមុខនេះ ។ ដោយឡែក ថៅកែទទួលទិញត្រី បានមកពីនេសាទខុសច្បាប់នេះ លោកក៏បានសន្យាធ្វើការបង្ក្រាបផងដែរ។
គួររំលឹកផងដែរបទល្មើសនេសាទក្នុងខេត្តកំពង់ឆ្នាំងមិនមែនមានតែស្រុកកំពង់លែងនោះទេនៅតាមបណ្ដាស្រុកមួយចំនួនជាប់បឹងទន្លេសាបក៏មានបទល្មើសរបាំង(ណរាវ)កើតឡើងស្អេកស្កះផងដែរ សារពត៌មានយើងនឹងធ្វើការចុះផ្សាយបន្តបន្ទាប់ទៀតដើម្បីឆ្លុះបញ្ចាំងការពិតក្នុងគ្រប់គ្រងរបស់មន្ត្រីជំនាញបច្ចុប្បន្ននេះ៕ ដោយ ងិន វាសនា
