ខេត្តកោះកុង៖ មានការលើកឡើងថាមន្ត្រីគយមួយក្រុមបានដាក់ ប៉ុស្ដិ៍ជជុះប្រចាំនៅ ផ្លូវជាតិលេខ ៤៨ នៃទឹកដី ខេត្តកោះកុង ដេកយោលអង្រឹកចាំ ប្រមូលលុយ ពីក្រុមឈ្មួញ ដឹកទំនិញឆ្លងកាត់ ដោយមានឈ្មួញ ចូលទៅបង់លុយ ទាំងកណ្ដាល ថ្ងៃចែស ហើយមួយថ្ងៃៗ រាប់សិបនាក់ ដូច្នេះគយទាំងនោះអាចរកលុយតាមរបៀបពុលរលួយ នេះបានមិនតិចទេ ក្នុងមួយថ្ងៃៗ ។
តាមសេចក្ដីរាយការណ៍ បានឲ្យដឹងថា ទំនិញខូចគុណភាព គ្រប់ប្រភេទ ដែលផ្ទុកទៅ ដោយសារធាតុគីមីមកពីប្រទេសថៃ ចូលមកក្នុង ប្រទេសកម្ពុជា តាមច្រករបៀងចាំយាមក្នុង ភួមិសាស្ត្រខេត្តកោះកុងយ៉ាងគគ្រឹកគគ្រេង បែបអនាធិបតេយ្យ គ្មានការទប់ស្កាត់ និងធ្វើការបង្ក្រាបពីមន្ដ្រីកាំកុងត្រូល ម្នាក់ណានោះឡើយ ។
ជាក់ស្ដែងបច្ចុប្បន្ន មានទំនិញ ជាច្រើនមុខដឹកពីខេត្តកោះកុង ឆ្លងកាត់គយមួយកន្លែង នៅតាមបណ្ដោយផ្លូវជាតិលេខ៤៨ នៅត្រង់ចន្លោះ គីឡូម៉ែត្រលេខ៥៤ និង៥៥ ស្ថិតក្នុងភូមិ ជីនាល ឃុំអណ្ដូងទឹក ស្រុកបូទុមសាគរ ខេត្តកោះកុង មេក្រុមគយ ខាងលើត្រូវបាន គេស្គាល់ឈ្មោះថា នេត ចន្ថា និងបានប្ដូវេនគ្នាយកលុយ ជាមួយនឹងលោក ទី សូរីវុទ្ធ ដោយយក៧ថ្ងៃម្នាក់ម្ដងៗ ចំពោះការយកលុយ នោះដែរមិនបាន ត្រួតពិនិត្យថាតើនៅក្នុងឡាន មានផ្ទុកអ្វីខ្លះនោះទេ គីគ្មានអ្វីក្រៅពីដេកយក លុយតែប៉ុណ្ណោះ។
អ្វីដែលគួរអោយភ្ញាក់ផ្អើលនោះ ត្រូវបានគេសង្កេតឃើញថា អ្នកដែលចាំយក លុយមិនដឹង ជាសមត្ថកិច្ចខាងណានោះទេ ព្រោះមិនមាន ឯកសណ្ឋាន ច្បាស់លាស់ទើបប្រជាពលរដ្ឋការ សង្ស័យថាជាប៉ុស្ដិ៍ជជុះ ។
យោងតាមសម្ដីមន្ដ្រីមួយរូប ធ្វើការនៅស្រុកបូទុមសាគរ បានបង្ហើបប្រាប់អ្នកយកពត៌មានថា នៅក្នុងឡានដឹកទំនិញទាំងអស់នោះបង្កប់ទៅដោយសារធាតុគីមីមានដូចជា សាច់មាន់ ជង្គង់មាន់ ស្លាបមាន់ ប្រហិតនឹងគ្រឿងទេស ជាច្រើនផ្សេងទៀតក្នុងនោះ មួយចំនួនបាន បង្កប់នូវ ( ឡេ និងគ្រឿងថែរក្សារ សម្រស់ ដែលក្រសួង សុខាភិបាល បានហាមឃាត់ ទៀតផង)។
មន្ត្រីដដែលបាន អោយដឹងទៀតថា ប្រាក់ចំណូល ដែលបានមក ពីបង់ក្បាលឡានក្នុង មួយឡាន ៥០០០០រៀល ទៅ៨០០០០រៀល ដោយមួយថ្ងៃៗមាន រថយន្តរាប់សិបគ្រឿង ហើយលុយដែលលោក នេត ចន្ថា នឹង លោក ទីសូរីវុទ្ធ ប្រមូលយក ទាំងយប់ទាំងថ្ងៃ នោះសង្ស័យ តែមិនបានបង់ចូលជាថវិការដ្ឋនោះទេ ឯលុយដែលឈ្មួញបង់ក្បាលឡាន រាប់សិបគ្រឿងឲ្យមន្ត្រីគយទាំង២នាក់នោះទល់តែ យកការ៉ុងទៅដាក់ បានដាក់លុយអស់ ។
ពាក់ព័ន្ធនឹងករណីនេះ គេមានការដាក់សង្ស័យថា លុយដែលប្រមូលបាន ក្រុមឈ្មួញ ត្រូវបានលោក នេត ចន្ថា និង លោក ទីសូរីវុទ្ធ ចែកពាក់កណ្ដាលឲ្យ ទៅលោក សំ កូសល់ ប្រធានសាខាគយ និងរដ្ឋាករខេត្តកោះកុង ទើបមន្ត្រីគយទាំង២នាក់ នេះអាចធ្វើព្យុះភ្លៀងតាមអំពើចិត្ត តម្រូវឲ្យអ្នករកស៊ីត្រូវបង់លុយបែបនេះ បែជាមិនមានការបញ្ចេញប្រតិកម្មណាមួយទៅវិញ ។
ជុំវិញនិងបញ្ហានេះដែរ មិនទាន់មានការបកស្រាយ បំភ្លឺពី លោក នេត ចន្ថា និងលោក ទី សូរីវុទ្ធ នៅឡើយទេ ចំពោះការចោទ ប្រកាន់ខាងលើនេះ ៕