កាលពីព្រឹកថ្ងៃទី ២១ ខែកក្កដា ឆ្នាំ២០១៤ នៅសាលប្រជុំសាលាខេត្តបាត់ដំបង បានបើកសិក្ខាសាលាមន្ត្រី ជាន់ខ្ពស់ស្តីពីផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ ឆ្នាំរំកិលរបស់ខេត្ត ក្រោមអធិបតីភាពឯកឧត្តម អុក វង់ ប្រធានក្រុមប្រឹក្សាខេត្ត ព្រមទាំងមន្ត្រីរាជការទូទាំងខេត្តបាត់ដំបង ។
ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង បានមានប្រសាសន៍ថា ផ្អែកតាមបទ ពិសោធន៍ក្នុងមួយអាណត្តិកន្លងទៅនេះ ក្រុមប្រឹក្សាខេត្តបាត់ដំបង បានខិតខំប្រឹងប្រែងពុះពារប្រឈមរាល់ការលំបាកនានា ដែលកើតមានឡើង ពីការគ្រប់គ្រងរដ្ឋបាលតាមរបៀបថ្មី ដែលតម្រូវដោយច្បាប់ស្តីពីការគ្រប់គ្រងរាជធានី-ខេត្ត-ក្រុង ស្រុកខណ្ឌ និងការចាត់ចែងធនធានរបស់ខ្លួនឱ្យមាន ប្រសិទ្ធភាពសំដៅលើកស្ទួយកិច្ចអភិវឌ្ឍន៍មូលដ្ឋានក៏ដូចជា ការប្រកបរបរចិញ្ចឹមជីវិតរបស់ប្រជាពលរដ្ឋឱ្យកាន់តែមានភាពល្អប្រសើរឡើង ។
ឯកឧត្តម អភិបាលខេត្តបន្ថែមថា ស្របពេលដែលមុខងារ និងធនធានរបស់រដ្ឋបាលខេត្តត្រូវបានពង្រីក និងពង្រឹងជាបណ្តើរៗពីមួយឆ្នាំទៅមួយឆ្នាំ ទាមទារឱ្យរដ្ឋបាលសាលាខេត្តត្រូវមានសមត្ថភាពគ្រប់គ្រាន់ ដើម្បីគ្រប់គ្រងចាត់ចែងមុខងារ ព្រមទាំងធនធានទាំងនោះឱ្យមានប្រសិទ្ធភាពស្របតាមលិខិតបទដ្ឋានពាក់ព័ន្ធជា ធរមាន ។ ក្នុងនោះច្បាប់ស្តីពីការគ្រប់គ្រងរដ្ឋបាលរាជធានី-ខេត្ត-ក្រុង ស្រុក-ខណ្ឌ បានតម្រូវឱ្យក្រុមប្រឹក្សា មានសិទ្ធិអំណាចទាំងខាងបញ្ញត្តិ និងប្រតិបត្តិ ។ ហើយក្រុមប្រឹក្សាត្រូវធ្វើសេចក្តីសម្រេចពាក់ព័ន្ធទៅនឹងការប្រើ ប្រាស់សិទ្ធិអំណាចទាំងនោះក្នុងកិច្ចប្រជុំក្រុមប្រឹក្សា ដែលត្រូវធ្វើឡើងស្របតាមបទបញ្ជាផ្ទៃក្នុង និងលិខិតបទដ្ឋាន ដទៃទៀត ។
ក្នុងន័យនេះ ការពិនិត្យ និងអនុម័តផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំ រំកិលរបស់ក្រុមប្រឹក្សា ខេត្ត ជាកិច្ចការសំខាន់មួយដែលក្នុងអាណត្តិនីមួយៗត្រូវរៀបចំឡើងយ៉ាងយូរ ២ឆ្នាំ បន្ទាប់ពីក្រុមប្រឹក្សាចូលកាន់ តំណែង ។
ដោយឡែក ឯកឧត្តម អុក វង់ ប្រធានក្រុមប្រឹក្សាខេត្តបានមានប្រសាសន៍ថា ការរៀបចំសិក្ខាសាលានេះ គឺក្នុងគោលបំណងធានាឱ្យក្រុមប្រឹក្សាខេត្តអាណត្តិទី ២ អាចចាប់ផ្តើមរៀបចំផែនការ អភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំ រំកិលរបស់រាជធានីខេត្ត-ក្រុង ស្រុក-ខណ្ឌ ដែលរាជរដ្ឋាភិបាលបានដាក់ឱ្យអនុវត្តកាលពីឆ្នាំ២០១៣ កន្លងទៅ ។/