ខេត្តរតនគិរី ៖ រថយន្តVigoព័ណទឹកប្រាក់ ពាក់ស្លាកលេខភ្នំពេញ 2S 0716 ត្រូវបានគេស្គាល់ច្បាស់ថា រថយន្តរបស់លោក ណាក់ ជាមន្ត្រីកងរាជអាវុធហត្ថខេត្តរតនគិរី ធ្វើចរាចរណ៍ តាមបណ្តោយផ្លូវជាតិលេខ78 ក្នុងទិសដៅពីកើតទៅលិច ខណះមកដល់ចំណុចកើតហេតុ (ផ្សារប៊េនឡានក្រុងតាយសេងឈាងខាងលិច) ស្ថិតក្នុងភូមិ3 សង្កាត់ កាចាញ ក្រុងបានលុង បានជួបនូវឩប្បត្តិហេតុអាក្រក់កើតឡើង ជាចៃដន្យតែម្តង។
គ្រោះថ្នាក់ចរាចរណ៍នេះ បានកើតឡើងកាលពីរសៀលម៉ោង1:23នាទីថ្ងៃទី14 ខែកញ្ញា ឆ្នាំ 2016 ។
តាមប្រភពនៅកន្លែងកើតហេតុបានអោយដឹងថា ឃើញរថយន្តស៊េរីទំនើបខាងលើ បើកបរពីកើតមកលិចមកឈប់ង៉ក់លើគំនូសព័ណលឿង បំណងទិញអ្វីនៅតូបចិនលក់តាមចិញ្ចើមផ្លូវ ទាំងមិនទាន់កាច់សោរពន្លត់ម៉ាស៊ីនផង ខ្វះការប្រុងប្រយ័ត្ន ប្រមាណ ៣ នាទីប៉ុណ្ណោះ ស្រាប់តែឃើញម៉ូតូម៉ាកឌ្រឹមសង់ពណ៌ខ្មៅមួយគ្រឿង ពាក់ស្លាកលេខកំពត (1A 0763 សេរីឆ្នាំ2005) បោះពួយយ៉ាងលឿន ទិសដៅស្របទិសពិកើតមកលិច ជិតមកដល់គូទរថយន្តចំងាយប្រមាណ 5 ម៉ែត្រប៉ុណ្ណោះ អ្នកបើកបរ បានងាកក្រោយរកមើលគំរបចានស្រាក់ធ្លាក់ចេញពីម៉ូតូ ពុំបានចាប់ថ្នាក់ថា រថយន្តVigo ចតទិញឥវ៉ាន់ខាងមុខក៏វ៉ាក់អឺ បុកគូទរថយន្តខាងលើចំពេញទំហឹងតែម្តង បណ្តាលអោយបុរសជាជនរងគ្រោះដួលបោកផ្ទុបនឹងគូទរថយន្តរងរបួសធ្ងន់ធ្ងរ។
ប្រភពបានបន្តថា ជនរងគ្រោះត្រូវបានគេស្គាល់ឈ្មោះរឿន សារ៉ន ប្រុស អាយុ 32ឆ្នាំ ជនជាតិខ្មែរ មានទីលំនៅ ភូមិ3 សង្កាត់ កាចាញ ក្រុង បានលុង មានមុខរបរ កម្មករសំណង់ មានប្រពន្ធនិងកូនស្រីអាយុ 5ឆ្នាំ ក្នុងបន្ទុក(គ្រួសារស្ថានភាពក្រលំបាក)។
ក្រោយពេលកើតហេតុ ជនរងគ្រោះត្រូវបញ្ចូនទៅកាន់មន្ទីរពេទ្យបង្អែក ខេត្តតាមរថយន្តសង្គ្រោះបន្ទាន់របស់ប៉ូលិសចរាចរណ៍ ។ ចំណែកវត្ថុតាងទាំងពីរគ្រឿង កម្លាំងចរាចរណ៍បាននាំទៅរក្សាទុកនៅស្នងការដ្ឋាននគរបាលខេត្តរង់ចាំដោះស្រាយជាក្រោយ ។
ដោយឡែក ក្រុមគ្រូពេទ្យសង្គ្រោះបន្ទាន់នៃមន្ទីរពេទ្យបង្អែកខេត្ត បានដឹងថា : តាមការពិនិត្យស្ថានភាព អ្នកជំងឺពិតជាធ្ងន់ធ្ងរ ដោយប៉ះទង្គិចក្បាល និង ពោះវៀន (គ្រឿងក្នុង) ត្រូវបញ្ចូលឈាមនិងការវះកាត់ជាបន្ទាន់ ។ រីឯក្រុមគ្រួសារជនរងគ្រោះ លោកស្រី ឯម សុខ ត្រូវជាម្តាយក្មេកជនរងគ្រោះបានរៀបរាប់ទាំងទឹកភ្នែកដល់អ្នកសារព័តិមានអោយចុះផ្សាយនិងសំណូមពរដល់ នគរបាលចរាចរដែលចុះដល់កន្លែងកើតហេតុ មេត្តាធ្វើការវ៉ាស់វែង អោយបានត្រឹមត្រូវសមស្របតាមច្បាប់ចរាចរផ្លូវគោកបំរើផលប្រយោជន៏ជូនប្រជាពលរដ្ធដោយសុច្ចរិច្ចយុត្តិធ័មមិនលំអៀង៘ ជៀសវាងដកហូតវត្ថុតាងទៅរក្សាទុក ពុំមានបាញ់គំនូសចំណាំ ។
បញ្ហាគ្រោះថ្នាក់ចរាចរមួយករណីខាងលើនេះ លោក មឿង សារិទ្ធ ប្រធានការិយាល័យចរាចរណ៍ផ្លូវគោកបានអោយដឹងតាមទូរស័ព្ទ នាល្ងាចថ្ងៃខែឆ្នាំដដែលនេះថា លោកនឹងចុះស៊ើបអង្កេត ដល់កន្លែងកើតហេតុ ពិនិត្យអោយបានច្បាស់បន្តទៀត ហើយទាក់ទងនិងការបាញ់គំនូស លោកបញ្ជាក់ថា មិនមែនចេះតែបាញ់នោះទេ កន្លែងខ្លះធ្វើអោយស្ទះចរាចរណ៍ និង បាត់បង់ការកែលំអក្រុង ហើយក៏អាចប៉ះពាល់សតិអារម្មណ៏ភ្ញៀវទេសចរណ៍ជាតិ អន្តរជាតិ ដែលចូលខ្លួនមកទស្សនាកំសាន្ត មិនចង់អោយគេវាយតម្លៃថាខេត្តមួយនេះពោរពេញ ដោយគំនូសពណ៌ស គ្រោះថ្នាក់ចរាចរណ៍ ៘
ដោយ ៖ ចាប សំអាន
