ខេត្តប៉ៃលិន៖ ក្រោយពីភាគីថៃមានបញ្ហាបិទផលិតផលកសិផលខ្មែរចំនួន២ប្រភេទផ្លែស្វាយកែវរមៀត និងផ្លែមៀន របស់ប្រជាកសិករក្នុងខេត្តប៉ៃលិនក្នុងមួយរយៈពេលប៉ុន្មានថ្ងៃចុងក្រោយនេះ នៅព្រឹកថ្ងៃទី១៤ ខែកញ្ញា ឆ្នាំ២០១៦ សមត្ថកិច្ច និងមន្ត្រីអង្គភាពពាក់ព័ន្ធ នៅខេត្តប៉ៃលិន ដឹកនាំដោយលោក ទុំ ណូ ប្រធានសាខាគយ និងរដ្ឋាករខេត្តប៉ៃលិន បានអញ្ជើញទៅខេត្តច័ន្ទបុរី ប្រទេសថៃ ដើម្បីចូលរួមកិច្ចប្រជុំពិភាក្សាជាមួយភាគីថៃ ដឹកនាំដោយលោកប្រធានសាខាគយ និងរដ្ឋាករខេត្តច័ន្ទបុរី និងប្រធានអង្គភាពពិនិត្យគុណភាពអនាម័យប្រចាំ៣ខេត្តក្នុងប្រទេសថៃ ទៅលើវិធានបទដោះស្រាយបញ្ហាដែលភាគីថៃបានហាមឃាត់ មិនឱ្យកម្ពុជានាំកសិផល ស្វាយកែវរមៀតនិងផ្លែមៀន នាំចូលទៅប្រទេសថៃ។
កិច្ចប្រជុំពិភាក្សាបានអូសបន្លាយជាច្រើនម៉ោងកាលពីព្រឹកមិញនេះ ត្រូវបានលោកប្រធានដឹកនាំគណៈ ប្រតិភូខាងកម្ពុជាប្រាប់ឱ្យដឹងថា កិច្ចប្រជុំនោះទទួលបរាជ័យ ដោយសារភាគីថៃគេនៅតែបន្តបដិសេដ្ឋ មិនឱ្យនាំចូលប្រភេទកសិផលទាំង២ប្រភេទរបស់កសិករខ្មែរ ទៅកាន់ប្រទេសថៃនោះដដែល។ ដោយភាគីថៃគេសំអាងថាផ្លែស្វាយកែវរមៀត និងផ្លែមៀន របស់កសិករខ្មែរ មានផ្ទុកមេរោគ ៣ប្រភេទ។
ភាគិថៃគេក៏ស្នើសុំ បើសិនជាចង់នាំចូលប្រភេទផលិតផលកសិផលទាំង ២ ប្រភេទនាំចូលក្នុងប្រទេសថៃ សុំឱ្យភាគីកម្ពុជា ធ្វើឡើងក្នុងកិច្ចប្រជុំរវាងរដ្ឋាភិបាលនិងរដ្ឋាភិបាល ពីព្រោះបញ្ហានេះ ហួសដែនសមត្ថកិច្ចរបស់ភាគីថៃត្រឹមជាថ្នាក់ខេត្ត ។ មិនតែប៉ុណ្ណោះ ថៃក៏ជម្រុញឱ្យកម្ពុជាយើងមានការវេចខ្ចប់ឱ្យបានត្រឹមត្រូវ និងមានការបញ្ជាក់គុណភាពអនាម័យ ពីអង្គភាពត្រួតពិនិត្យគុណភាពអនាម័យ របស់ភាគីកម្ពុជានោះផងដែរ ។
ពាក់ព័ន្ធនិងការហាមឃាត់របស់ភាគីថៃ មិនឱ្យនាំចូលកសិផលផ្លែស្វាយកែវរមៀត និងផ្លែមៀន ត្រូវបានមន្ត្រីកម្ពុជាចូលរួមប្រជុំបានប្រាប់ឱ្យដឹងថា ជាលេសសម្រាប់ការបង្អាប់បន្ថោក ផលិតផលកសិផលខ្មែរពីសំណាក់ភាគីថៃតែប៉ុណ្ណោះ ក្នុងគោលបំណងយកប្រៀបលើការធ្វើពាណិជ្ជកម្ម ។
ប្រភពពត៌មានដដែលឱ្យដឹងទៀតថា អង្គភាពត្រួតពិនិត្យគុណភាព អនាម័យ របស់ថៃ នៅពេលគេយកផ្លែស្វាយនិងផ្លែមៀនរបស់ផលិតផលកសិផលខ្មែរយកទៅត្រួតពិនិត្យ គឺគេមិនបានយកផ្លែស្វាយនិងផ្លែមៀនល្អទៅពិនិត្យនោះឡើយ ដោយគេបែរជ្រើសរើសយកផ្លែស្វាយ និងផ្លែមៀន ដែលស្អុយរើបោះចោល យកមកត្រួតពិនិត្យគុណភាពរឿងអីមិនឱ្យឃើញមេរោគ បើការពិនិត្យជាកសិផលខូចស្អុយនោះ ដោយភាគីថៃគេអនុវត្តខុសនិងការពិនិត្យគុណភាពផលិតផល ចំណែកឯផលិតផលកសិផល ពោធ ដំឡូង គឺមិនមានបញ្ហាអ្វីនោះទេ ភាគីថៃអនុញ្ញាតឱ្យនាំចូលតាមធម្មតា ៕
