ប្រទេសថៃ៖ យ៉ាងហោចណាស់មានពលករខ្មែរចំណាក់ស្រុកចំនួន៣៦នាក់ ត្រូវបានអជ្ញាធរ ប្រទេសថៃចាប់បានកាលពីថ្ងៃទី១០កញ្ញាកន្លងមក បានបញ្ជូនមកកម្ពុជា វិញហើយនៅព្រឹកថ្ងៃទី១៥នេះ។
កំលាំងតម្រួតថៃផ្នែកអន្តោប្រវេសន៍ ប្រចាំខេត្តឈៀងម៉ៃ ត្រៀមនឹងបញ្ជូនខ្លួនពលករដែល លបលួនឆ្លងដែនខុសច្បាប់ចំនួន៣៦នាក់ ត្រឡប់មកកម្ពុជាវិញតាមច្រកអន្តរជាតិដូង ក្នុងស្រុកកំរៀង ខេត្តបាត់ដំបង ខណៈដែលពួកគេទាំងអស់កំពុងធ្វើដំណើរចេញពីខេត្តឡាំភូន ឆ្ពោះទៅកាន់ខេត្តឈៀងម៉ៃ ដើម្បីធ្វើការងារជាកម្មករ បេះផ្លែឈើ ។
យោងតាមរបាយការណ៍របស់ក្រុមតម្រួតថៃ បានបញ្ជាក់ថា នៅវេលាម៉ោង ៨ ព្រឹក ថ្ងៃទី១០ ខែកញ្ញា ឆ្នាំ២០១៦ កំលាំងតម្រួតនៃអធិការដ្ឋានស្រុកមឿង ខេត្តឡាំភូន ប្រទេសថៃ បានចេញប្រតិបត្តិការ ល្បាតក្នុងភូមិសាស្ត្ររបស់ខ្លួនបានប្រទះឃើញពលករខ្មែរមួយក្រុម ដែលក្នុងនោះមានក្មេងមានចាស់ កំពុងធ្វើដំណើរលើដងផ្លូវឈៀងម៉ៃ ក្នុងទិសដៅពីខេត្តឡាំភូន ឆ្ពោះទៅកាន់ខេត្តឈៀងម៉ៃ ត្រង់ចំណុច ភូមិ៧ ឃុំអ៊ុមោង ស្រុកឡាំភូន ។
ក្នុងរបាយការណ៍នេះដដែល ក៏បានឱ្យដឹងថា ដោយមានការសង្ស័យ ព្រោះគេសង្គេតឃើញមានឥវ៉ាន់សំពីងសំពោងផងនោះ ទើបក្រុមតម្រួតបានឃាត់ពួកគេទាំងអស់គ្នាដើម្បីធ្វើការសាកសួរទើបដឹងថា ពួកគេគឺជាពលករខ្មែរកំពុងស្វែងរកការងារធ្វើនៅក្នុងប្រទេសថៃ ព្រមទាំងគ្មានច្បាប់អនុញ្ញាតថែមទៀត ។ ដោយពុំមានច្បាប់ឆ្លងដែននោះឡើយហើយក៏ត្រូវក្រុមតម្រួតថៃឃាត់ខ្លួនតែម្តង ក្នុងនោះមានអនីតិជន៧នាក់ផងដែរ។ ហើយកំលាំងតម្រួតថៃពុំបានធ្វើទារុណកម្មលើរាងកាយ ឬរឹបអូសទ្រព្យសម្បត្តិរបស់ពលករណាម្នាក់ឡើយ ព្រមទាំងបានប្រគល់ទៅអោយខាងជំនាញធ្វើការតាមផ្លូវច្បាប់ ៕
ដោយសហការី
