បន្ទាយមានជ័យ ៖ នៅវេលាម៉ោង២និង៣០នាទី ថ្ងៃទី១៣ ខែកញ្ញា ឆ្នាំ២០១៦ នៅចំនុច ក្បាលស្ពានមិត្តភាពកម្ពុជា.ថៃ.ច្រកទ្វារអន្តរជាតិប៉ោយប៉ែត មានប្រជាពលរដ្ឋចំនួន៨នាក់ ដែលជាអ្នកលក់កណ្ដូបនិងចង្រិត បានធ្វើការបិទផ្លូវតវ៉ា ដើម្បីទាមទារឲ្យអាជ្ញាធរ កម្ពុជាជួយរកដំណោះស្រាយ ចំពោះសមត្ថកិច្ចថៃដែលបានចាប់អជីករខ្មែរលក់ដូរកណ្ដូបនិងចង្រិត ឲ្យបង់ប្រាក់ក្នុងម្នាក់៤៤០០បាត ដោយអាជីវករដែលត្រូវបានសមត្ថកិច្ចថៃឃាត់ខ្លួន កាលពីម្សិលមិញនោះមានចំនួន៦នាក់ ។ បន្តថ្ងៃនេះកើនឡើងដល់ទៅ១១នាក់ ក្នុងនោះ មានស្រីចំនួន១០នាក់ និងប្រុស១នាក់ទៀត ។
សមត្ថកិច្ចថៃបានទាមទារឲ្យអ្នកលក់កណ្ដូប និងចង្រិតបង់ប្រាក់ចំនួន៦០០០បាត ក្នុង១នាក់បន្ថែមទៀត អជីវករខ្មែរដែលលក់កណ្ដូបនិងចង្រិតទាំង១១នាក់នេះ កំពុងតែជាប់ឃុំឃាំងនៅថៃនៅឡើយ ទើបបានអាជីវករធ្វើការបិទផ្លូវយ៉ាងដូច្នេះ គឺដោយសារតែខាងសមត្ថកិច្ចថៃបានចាប់ខ្លួន ហើយ ទាមទារឲ្យបង់ប្រាក់ទៀតហួសហេតុពេក ។ ណាមួយ ពួកគាត់ជាអ្នកលក់កន្តូប និងចង្រិត មានលុយឯណាយកមកឲ្យពួកគេនោះ (រកមួយថ្ងៃហូបមួយថ្ងៃ) ពលរដ្ឋសុំឲ្យអាជ្ញាធរកម្ពុជាជួយរកដំណោះស្រាយជូនពួកគាត់ផង។
តែចំពោះបញ្ហានេះ សមត្ថកិច្ចនៅច្រកទ្វារអន្តរជាតិប៉ោយប៉ែត បានប្រាប់ថា ពេលនេះកំពុងតែចរចារជាមួយភាគីថៃ ដើម្បីរកដំណោះស្រាយពីបញ្ហានេះហើយ ៕