កាលពីថ្ងៃទី ១៥ ខែកក្កដា ឆ្នាំ២០១៤ នៅសាលប្រជុំសាលាខេត្តបាត់ដំបង មានរៀបចំកម្មវិធីប្រកាសចូល កាន់តំណែងប្រធានមន្ទីរមុខងារសាធារណៈដែលទើបនឹងបង្កើតថ្មី ក្រោមអធិបតីភាព ឯកឧត្តម ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ និងឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង ។
ក្នុងសេចក្តីប្រកាសស្តីពីការតែងតាំងមន្ត្រីរាជការដែលអាន ដោយ ឯកឧត្តម ប្រាក់ វីក្រា អគ្គនាយកនៃអគ្គ នាយកដ្ឋានរដ្ឋបាល និងហិរញ្ញវត្ថុក្រសួងមុខងារសាធារណៈ សម្រេចតែងតាំងលោក អ៊ូ គឹមព្រឹទ្ធី ជាប្រធានមន្ទីរ មុខងារសាធារណៈខេត្តបាត់ដំបង ចាប់ពីពេលនេះតទៅ ។
ក្នុងឱកាសនោះដែរ ឯកឧត្តម ច័ន្ទ សុផល បានមានប្រសាសន៍ថា រាជរដ្ឋាភិបាលកម្ពុជា ដែលមានសម្តេចអគ្គ មហាសេនាបតីតេជោ ហ៊ុន សែន ប្រមុខដឹកនាំបានខិតខំប្រឹងប្រែងកសាង និងអភិវឌ្ឍន៍ប្រទេសឱ្យកាន់តែជឿន លឿនជាលំដាប់ ។ ក្នុងនោះក៏មានការកែទម្រង់ជាបន្តបន្ទាប់នូវតួនាទីមន្ត្រីរាជការតាមឋានានុក្រម ។
ជាក់ស្តែងដូចជា លោក អ៊ូ គឹមព្រឹទ្ធី ដែលត្រូវបានក្រសួងមុខងារសាធារណៈតែងតាំងឱ្យធ្វើជាប្រធានមន្ទីរ ថ្ងៃនេះ គឺជាការប្រគល់ភារកិច្ចថ្មីមួយទៀត ដែលស្ថាប័នជាតិទម្លាក់មកឱ្យថ្នាក់ក្រោមជាតិ ទៅតាមនយោបាយចតុ កោណតំណាក់កាលទី ៣ ដែលសម្តេចប្រមុខរាជរដ្ឋាភិបាលបានដាក់ចេញ ។
មានមតិសំណេះសំណាលក៏ដូចជា ផ្តាំផ្ញើនាឱកាសនោះ ឯកឧត្តម ពេជ្រ ប៊ុនធិន បានថ្លែងថា ការប្រកាសចូល កាន់តំណែងប្រធានមន្ទីរ មុខងារសាធារណៈខេត្តនាពេលនេះ គឺជាការប្រគល់ភារកិច្ច និងការទទួលខុសត្រូវមួយដ៏ មានសារៈសំខាន់ ដែលតម្រូវឱ្យសាម៉ីខ្លួនត្រូវតែបញ្ចេញឱ្យអស់នូវចំណេះដឹងសមត្ថភាព ទេពកោសល្យដែលខ្លួនមាន ពិសេសជាងនេះទៅទៀត គឺត្រូវស្វែងយល់ឱ្យបានល្អិតល្អន់អំពីច្បាប់នានា ដែលពាក់ព័ន្ធជាមួយនឹងការងារជំនាញ របស់ខ្លួន ។
ឯកឧត្តម ពេជ្រ ប៊ុនធិន បានបន្ថែមថា ចំពោះលោកប្រធានមន្ទីរថ្មី ដែលត្រូវចូលកាន់តំណែងនៅថ្ងៃនេះ ត្រូវតែសហការជាមួយបុគ្គលិកក្រោមឱវាទ ក៏ដូចជា អាជ្ញាធរដែនដីឱ្យបានស្អិតរមួត ដើម្បីអនុវត្តន៍ការងារ របស់ខ្លួនឱ្យទទួលបានជោគជ័យគ្រប់ភារកិច្ច ។
ក្នុងឱកាសនោះដែរ លោក អ៊ូ គឹមព្រឹទ្ធី ក៏បានឡើងមកប្តេជ្ញាចិត្តថា និងខិតខំយកចិត្តទុកដាក់ក្នុងការបំពេញ ភារកិច្ចនេះ ឱ្យទទួលបានជោគជ័យសម្រាប់ជាតិមាតុភូមិ ជាពិសេសគឺសហការជាមួយមន្ត្រីរាជការក្រោមឱវាទឱ្យ បានល្អ ក៏ដូចជា អាជ្ញៅធរដែនដីគ្រប់លំដាប់ថ្នាក់ ៕