បាត់ដំបង÷ តាមបទបញ្ជាណែនាំរបស់ឯកឧត្តម ស ថេត ស្នងការនៃស្នងការដ្ឋាននគរបាលខេត្តបាត់ដំបង ផ្តោតសំខាន់រាល់មធ្យោបាយ ធ្វើដំណើរពេលយប់ដែល បំពាក់អំពូល (ឡាហ្សែរ)ត្រូវមានវិធានការ បង្ក្រាបដោះចេញ និងធ្វើការអប់រំណែនាំដល់ម្ចាស់មធ្យោបាយ ។
នៅរាត្រីថ្ងៃទី ៩ ខែ កញ្ញា ឆ្នាំ ២០១៦ នេះឧត្តមសេនីយ៍ត្រី ជេត វណ្ណនី ស្នងការរង ក្រោមបញ្ជាផ្ទាល់របស់ឯកឧត្តម ស ថេត ស្នងការនគរបាលខេត្តបាត់ដំបងបានដឹកនាំកម្លាំងនគរបាលជំនាញសហការគ្នា ឃាត់មធ្យោបាយទាំងឡាយណាដែលបើកបរពេលយប់ដោយបំពាក់អំពូល (ឡាហ្សែរ) ធ្វើការអប់រំណែនាំនិងដោះយកអំពូលនោះចេញ នៅលើផ្លូវជាតិលេខ៥ ក្នុងភូមិស្រាស្តស្រុកសង្កែ ខេត្តបាត់ដំបង ព្រោះថា មធ្យោបាយធ្វើដំណើរពេលយប់ដែលបំពាក់អំពូល ប្រភេទនេះ បានបង្ករឲ្យកើតមានបញ្ហាគ្រោះថ្នាក់ចរាចរណ៍មិនតិចករណីទេនាពេលកន្លងមក ។
សកម្មភាពនេះកម្លាំងនគរបាលជំនាញនឹងបន្តអនុវត្តជារៀង រាល់យប់ចាប់ពីពេលនេះតទៅដើម្បីរួមចំណែកកាត់បន្ថយករណីគ្រោះថ្នាក់ចរាចរណ៍។
ក្នុងនាមស្នងការដ្ឋាននគរបាលខេត្តបាត់ដំបង សូមបញ្ជាក់ថា រថយន្តបានបំពាក់អំពូលពីនាយ(FULL option ) ឡាហ្សែរ ត្រូវតែមានវិធានកែសម្រួលព្រោះវា នៅតែជាបញ្ហាប្រឈម។
សូមអំពាវនាវដល់មជ្ឈដ្ឋានប្រជាពលរដ្ឋសូមចូលរួមគោរពច្បាប់ចរាចណ៍ទាំងអស់គ្នា៕
