បាត់ដំបង÷ ល្បែងស៊ីសងប្រជល់មួយកន្លែងនៅចំណុចភូមិទួល ឃុំជ្រៃ ស្រុកថ្មគោល ត្រូវបានម្ចាស់សង្វៀនអះអាងថាបានបង់លុយអោយទៅមេប៉ុស្តិ៍និងអធិការស្រុករួចអស់ហើយ។
យោងតាមប្រជាពលរដ្ឋនៅតំបន់នោះបានលើកឡើងថា ទីតាំងសង្វៀនល្បែងស៊ីសងប្រជល់មាន់មួយកន្លែងខាងលើមានការបើកលេងជារៀងរាល់ថ្ងៃច័ន្ទ និងថ្ងៃព្រហស្បតិ៍ ហើយពួកគាត់តែងឃើញក្រុមអ្នកញៀនល្បែងមួយនេះបាននាំគ្នាទាំងហ្វូងទៅលេងល្បែងស៊ីសងប្រជល់មាន់នៅទីនោះ ដោយមានអោបមាន់មកជាមួយដើម្បីយកទៅជល់យ៉ាងគគ្រឹកគគ្រេង ហូកញ្ជ្រៀវ តែមិនដែលប៉ះពាល់ឬរំខានដល់សមត្ថកិច្ចឡើយដោយសារតែម្ចាស់សង្វៀនអះអាងថាបានបង់លុយអោយទៅមេប៉ុស្តិ៍និងខាងអធិការស្រុករួចអស់ហើយ។
ពលរដ្ឋបន្តទៀតថា ដោយសាតែម្ចាស់សង្វៀនអះអាងដូច្នេះហើយទើបធ្វើអោយអ្នកញៀនល្បែងមួយនេះមិនមានការភ័យខ្លាចសមត្ថកិច្ចចុះទៅចាប់ឡើយដែលជាហេតុធ្វើអោយផ្ទុយទៅនឹងគោលនយោបាយភូមិឃុំមានសុវត្ថភាពដែលប្រមុខរាជរដ្ឋាភិបាលដាក់ចេញទៅវិញ។ ព្រោះតែមានការបើកភ្លើងខៀវពីសមត្ថកិច្ចយ៉ាងដូច្នេះ ហើយទើបធ្វើអោយក្រុមអ្នកលេងមួយចំនួនចាញ់អស់លុយអស់កាក់ ប្តីប្រពន្ធឈ្លោះបែកបាក់គ្នា និងបង្កអោយកើតមានបទល្មើសអំពើរលួចឆក់ ប្លន់ យ៉ាងច្រើនករណីក្នុងស្រុកថ្មគោល។
ពាក់ព័ន្ធទៅនឹងការលើកឡើងខាងលើ លោក ឆែម សាម៉ុន នាយប៉ុស្តិ៍នគរបាលរដ្ឋបាលឃុំរូងជ្រៃ ខាងពត៌មានយើងមិនអាចសុំការបំភ្លឺអ្វីបានទេនៅព្រឹកមិញនេះដោយសារទូរស័ព្ទមិនអាចទំនាក់ទំនងបាន។ ចំណែកលោក ផង់ សុភាព អធិការស្រុកថ្មគោលជំវិញករណីខាងលើ លោកប្រាប់សារព័ត៌មានយើងតាមរយះទូរស័ព្ទនៅព្រឹកថ្ងៃទី៨ ខែកញ្ញានេះ ថាបញ្ហាបង់លុយបង់កាក់នោះលោកមិនដឹងទេគេចេះតែនិយាយតែលោកនិងចាត់កំលាំងអោយចុះទៅចាប់៕
