កំពង់ធំ ៖ សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអាណិតអាសូ ដល់ប្រជាពលរដ្ឋ រួមទាំងពុទ្ធបរិស័ត ចំណុះជើងវត្តគោតត្របែក បានផ្តល់ថវិកាចំនួន ១៦ម៉ឺនដុល្លា សម្រាប់សាងសង់ព្រះវិហារ វត្តគោតត្របែកដើម្បីលើកស្ទួយវិស័យព្រះពុទ្ធសាសនា តែបែជានាំគ្នាឃុបឃិត ស៊ីដាច់លុយចំនួន៨ម៉ឺនដុល្លា ហើយសាងសង់អស់ទឹកប្រាក់ត្រឹមតែ៨ម៉ឺនដុល្លា លុះក្រោយមកព្រះវិហារប្រេះស្រាំបែកបាក់ ទើបផ្ទុះរឿងពុករលួយ នៅវត្តគោយត្របែក ឃុំស្រឡៅ ស្រុកបារាយណ៍ ខេត្តកំពង់ធំ។
ប្រជាពលរដ្ឋបានសម្តែងនូវការខកចិត្តយ៉ាងខ្លាំង ក្រោយពីព្រះវិហារថ្មីស្រឡាង នឹងសាងសង់មិនទាន់បានមួយដង្ហើមចង្រឹតផង ស្រាប់តែព្រះវិហារទាំងមូលប្រេះស្រាំជាជួរ និងជិតបាក់ទាំងផ្ទាំង ដែលគួរអោយមានការព្រួយបារម្ភ ធ្វើឲ្យអ្នកភូមិមិនហ៊ានចូលទៅក្នុងព្រះវិហារ ដោយសារតែខ្លាចអស់ជីវិតដោយសារ ដំបូលព្រះវិហារបាក់សង្កត់ស្លាប់។
ព្រះតេជគុណ គង់ចាំក្នុងវត្តគោកត្របែក បានមានសង្ឃដីកាថា វត្តនេះកាលដើមឡើយឈ្មោះវត្តគោកត្របែក ក្រោយមកមានការប្រកាសដាក់ឈ្មោះថ្មីថាវត្តតេជោ និងភូមិតេជោ ហើយប្រកាសថាកាសាងសង់នេះអស់ ១៦ ម៉ឺនដុល្លា ក្នុងថ្ងៃបញ្ចុះខណ្ទសីម៉ា រហូតមកដល់ពេលនេះអត់មានលោកទេ គឺមានតែអាត្មាមួយអង្គឯងទេ កាលមុនមាន៥អង្គតែសឹកអស់ហើយ ហើយការសាងសង់ព្រះវិហារនេះគឺរៀបនឹងជិតរួចហើយ ក៏មានទូរស័ព្ទមកពីភ្នំពេញ ដោយមិនដឹងថាលេខរបស់សម្តេចតេជោ ហ៊ុន សែន ឬលេខសម្តេច គត្តិព្រឹត្តបណ្ឌិតប៊ុនរ៉ានីហ៊ុន សែន នោះទេបានប្រាប់ថាឲ្យបន្ថែមដងទង់មួយគូរទៀត តែក្រោយមកដងទង់ ក៏មិនឃើញធ្វើដងទង់តាំងពីឆ្នាំ២០១២មកម្ល៉េះ ព្រះអង្គបានមានសង្ឃដិកាបន្តថា រហូតមកដល់ពេលនេះ ព្រះវិហារស្រុតប្រេះស្រាំបាក់បែកជុំវិញអស់ហើយ ហើយការសាងសង់នេះដោយជាងការ នៅសាលាស្រុកបារាយណ៍ គ្រប់គ្រងដោយលោក គឿនជាអ្នកទទួលខុសត្រូវ និងសូមសម្តេចជួយឲ្យអ្នកជំនាញទទួលខុសត្រូវជួយមកមើលផង។
លោក ហាក់ មុងហួត អភិបាលស្រុកបារាយណ៍ បានឲ្យដឹងនៅព្រឹកថ្ងៃទី ៦ ខែកញ្ញា ឆ្នាំ២០១៦ថា កាសាងសង់ព្រះវិហារនេះ គឺជាក្រុមការងាររបស់ថ្នាក់លើគេជាអ្នកសាងសង់ដោយផ្ទាល់ ដោយមិនបានតំកល់លុយឲ្យខាងស្រុកជាអ្នកសាងសង់នោះទេ ហើយលោកបានផ្តល់ពត៌មាននេះជូនទៅក្រុមការងារឯកឧត្តម ដែលទទួលខុសត្រូវយូរហើយ ពាក់ព័ន្ឋនឹងព្រះវិហារប្រេះស្រាំស្រុត កំពុងរងចាំមើលគេចុះមកមើល។
លោក លឹម សាវ៉ាន់ អគ្គនាយករង ក្រុមការងាររបស់ឯកឧត្តម រដ្ឋមន្ត្រីក្រសួងទេសចរណ៍ បានបញ្ជាក់ថាលោកបានដឹងពត៌មាននេះហើយ លោកនឹងចាត់កម្មវិធីឲ្យគេចុះទៅពិនិត្យផ្ទាល់ ចំណែកក្រុមបច្ចេកទេសសាងសង់លោកមិនដឹងទេ បើលោកទទួលពត៌មានបានថាព្រះវិហារនេះ គ្រាន់តែប្រេះដូចផ្លូវស្រមោចតែប៉ុណ្ណោះ៕