បាត់ដំបង ៖ លោក ងួន រតនៈ អភិបាលរងខេត្តបាត់ដំបង បានអញ្ជើញចូលរួមជាគណៈអធិបតីក្នុងពិធីចែករង្វាន់យុវជន ឆ្នើមសិស្ស ៣ល្អ សិស្សពូកែនៃវិទ្យាល័យសម្តេចឪ កាលពីពេលកន្លងទៅថ្មីៗនេះក្នុងឆ្នាំសិក្សា២០១៣-២០១៤ ។
ក្នុងរបាយការណ៍បូកសរុបលទ្ធផលនៃការសិក្សាឆ្នាំ២០១៣-២០១៤ របស់លោក ដួង ជីវ័ន នាយកវិទ្យាល័យសម្តេចឪ បានឱ្យដឹងពីចំនួនសិស្សទទួលជ័យលាភីសរុបទាំងអស់ជាបុគ្គលមានចំនួន ៣៩៩នាក់ ក្នុងនោះ ស្រីមានចំនួន ២២៨នាក់ ចំណែកឯជ័យលាភីជាក្រុមនោះ មានសិស្ស ៦ថ្នាក់ សរុបមានចំនួន ២៧៨នាក់ ក្នុងនោះស្រីមានចំនួន ១៦៦នាក់ ។ លទ្ធផលជាផ្លែផ្កាគួរជាទីមោទនៈនេះ សុទ្ធតែបានផលឡើងពីការខិតខំប្រឹង ប្រែងអស់ពីកម្លាំងកាយកម្លាំងចិត្តរបស់លោកគ្រូ-អ្នកគ្រូ និងក្មួយៗជាសិស្សានុសិស្ស ពិសេសក៏មានការចូលរួមយ៉ាង សកម្មពីឯកឧត្តម លោក-លោកស្រី ជាថ្នាក់ដឹកនាំគ្រប់ស្ថាប័នទាំងអស់ ក្នុងខេត្ត និងក្រសួងអប់រំយុវជន និងកីឡាផងដែរ ។
ក្នុងនាមលោកគ្រូ-អ្នកគ្រូ សិស្សានុសិស្ស នៃវិទ្យាល័យសម្តេចឪទាំងអស់សូមគោរពថ្លែងនូវព្រះករុណាទិ គុណថ្វាយសម្តេចព្រះបរមរតនកោដ្ឋ សម្តេចយាយ សម្តេចយាយទួត ដែលទ្រង់បានប្រោសព្រះរាជទាននូវអគារ សិក្សា ២ខ្នង ដែលប្រកបទៅដោយក្បូរក្បាច់រចនាល្អវិចិត្រអគាររឹងមាំបំពាក់ដោយសម្ភារៈសិក្សាដ៏ល្អប្រណីត បន្ទប់បណ្ណាល័យធំល្វឹងល្វើយសូមទ្រង់យាងទៅកាន់សុគតិភព និងសូមសម្តេចយាយ យាយទួតមានព្រះជន្មាយុយឺនយូរតរៀងទៅ ។
លោក ងួន រតនៈ បានសម្តែងមនោសញ្ចោតនារីករាយអបអរសាទរចំពោះលទ្ថផលដែលប្រកបពីការខិតខំ របស់លោកគ្រូអ្នកគ្រូ សិស្សានុសិស្ស វិទ្យាល័យសម្តេចឪ នាពេលនេះហើយក៏បញ្ជាក់ឱ្យឃើញពីការវិវឌ្ឍន៍រីកចំរើន ទាំងបរិមាណគុណភាពរបស់វិទ្យាល័យសម្តេចឪ ដែលជាធនធានដ៏ថ្លៃថ្លារបស់ប្រទេសជាតិនាពេលអនាគត ។ លោកក៏បានឯកភាពផងដែរ លើទិសដៅសម្រាប់ឆ្នាំសិក្សាឆ្នាំ២០១៤-២០១៥ មានការរៀបចំផែនការអភិវឌ្ឍន៍ ដោយបន្តធ្វើការទំនាក់ទំនងជាមួយសហគមន៍ក៏ដូចជា ការរៀបចំយន្តការកាត់ បន្ថយការបោះបង់ការសិក្សា ព្រមទាំងបង្កើនគុណភាពគ្រូគោរពវិន័យការងារឱ្យបានល្អសុទ្ធសឹងជាគន្លឹះមួយយ៉ាង សំខាន់ក្នុងការបង្កើនគុណភាព នៃការសិក្សា ស្របតាមគោលនយោបាយរបស់រាជរដ្ឋាភិបាលក្នុងការកែទម្រង់លើ គ្រប់វិស័យរបស់ជាតិឱ្យដំណើរ ការកាន់តែល្អ សម្រាប់អភិវឌ្ឍន៍ប្រទេសជាតិឱ្យកាន់តែមានសន្ទុះមួយកំរិតថែមទៀត ៕
