សៀមរាប៖ លោកឧត្តមសេនីយ៍ទោ សត ណាឌី ស្នងការនគរបាលខេត្តសៀមរាបតែងតែយកចិត្តទុកដាក់ខ្ពស់ចំពោះសុវត្ថិភាពចរាចរណ៍ផ្លូវគោក ដោយសង្កេតឃើញថា បញ្ហាគ្រោះថ្នាក់ចរាចរណ៍បង្កឡើងដោកត្តាមនុស្ស បើកបរមិនគោរពច្បាប់ចរាចរណ៍ មិនចេះយោកយល់គ្នាទៅវិញទៅមក បង្កឲ្យមានមនុស្សស្លាប់ និងរងរបួស រហូតឈានដល់ពិការភាពអស់មួយជីវិត និងបណ្ដាលឲ្យខូចខាតទ្រព្យសម្បតិ្តសាធារណៈ និងឯកជនទៀតផង។
ដោយហេតុនេះហើយទើបកាលពីថ្ងៃទី០៥ ខែកញ្ញា ឆ្នាំ២០១៦ពេញមួយថ្ងៃ លោកវរសេនីយ៍ទោ ជឹម សុវណ្ណ នាយការិយាល័យចរាចរណ៍ផ្លូវគោក ជាតំណាងលោកវរសេនីយឯក តេង ចាន់ណាត ស្នងការរងទទួលបន្ទុកចរាចរណ៍ នៃស្នងការដ្ឋាននគរបាលខេត្តសៀមរាប បានដឹកនាំកម្លាំងនគរបាលចរាចរណ៍ជាច្រើននាក់ចុះរៀបចំលើកបដាពាក្យស្លោកជាច្រើនកន្លែង នៅតាមដងផ្លូវសំខាន់ៗ ជាពិសេសនៅមុខទីប្រជុំជនក្នុងក្រុងសៀមរាប ក្នុងន័យអប់រំ ទាក់ទងទៅនិងសុវត្ថិភាពចរាចរណ៍ ដើម្បីឲ្យប្រជាពលរដ្ឋបាន ឲ្យទូរទាំងខេត្តសៀមរាប ក៏ដូចជាភ្ញៀវទេសចរណ៍ជាច្រើនទៀត បានយល់ដឹងកាន់តែច្បាស់បន្ថែមទៀត និងមានស្មារតីភ្ញាក់រលឹក បង្កើនការយកចិត្តទុកដាក់ខ្ពស់ក្នុងការបញ្ជាយានជំនិះគ្រប់ប្រភេទនៅលើដងផ្លូវសាធារណៈ។
លោកវរសេនីយ៍ទោ ក៏បានឲ្យដឹងទៀតថា ការចុះរៀបចំលើកបដាពាក្យស្លោកនាពេលនេះ គឺចង់ឲ្យបងប្អូនប្រជាពលរដ្ឋដែលប្រើប្រាស់លើដងផ្លូវទាំងអស់ចូលរួមគោរពច្បាប់ចរាចរណ៍ផ្លូវគោកឲ្យបានត្រឹមត្រូវគ្រប់វិនាទី ដូចអ្វីដែលបងប្អូនដឹងហើយថា ករណីគ្រោះថ្នាក់ចរាចរណ៍កើតឡើង ដោយសារការធ្វេសប្រហែស តែមួយព្រិចភ្នែកតែប៉ុណ្ណោះ។ ដូច្នេះការបង្កើនយកចិត្តទុកដាក់របស់បងប្អូន គឺចូលរួមកាត់បន្ថយគ្រោះថ្នាក់ចរាចរណ៍ឲ្យបាននូវកំរិតទាប ដែលប្រមុខរាជរដ្ឋាភិបាលកម្ពុជា ក្រសួងមហាផ្ទៃ អគ្គស្នងការនគរបាលជាតិ ចង់បាន។ ហើយនៅបណ្ដាតាមអធិការដ្ឋាននគរបាលស្រុកទាំង១១ និងមានរៀបចំលើកបដ្ដាពាក្យស្លោកទាក់ទង និងសុវត្ថិភាពចរាចរណ៍ជាបន្តបន្ទាប់៕
